1
‘දේශය වෙනුවෙන් එක්වන පියවරක්’ මැයෙන් එක්සත් ජනරජ පෙරමුණ එළිදැක්වූ ප්‍රකාශනය සමඟි ජන බලවේගයට පිළිගැන්වීම සමඟි ජන බලවේග පක්ෂ මූලස්ථානයේ දී ඊයේ (26) සිදු කෙරිණි.
මේ අවස්ථාවට සමඟි ජන බලවේගය වෙනුවෙන් එහි මහ ලේකම් රංජිත් මද්දුම බණ්ඩාර, ජාතික සංවිධායක තිස්ස අත්තනායක, පාර්ලිමේන්තු මන්ත්‍රීවරුන් වන ගයන්ත කරුණාතිලක, හිටපු මන්ත්‍රී මුජිබර් රහුමාන්, එක්සත් ජනරජ පෙරමුණ වෙනුවෙන් එහි නායක පාඨලී චම්පික රණවක, සභාපති විශේෂඥ වෛද්‍ය අජිත් අමරසිංහ, මහ ලේකම් බන්දුල චන්ද්‍රසේකර, ජ්‍යෙෂ්ඨ උප සභාපති නීතිඥ ශිරාල් ලක්තිලක, ජාතික සංවිධායක ඉංජිනේරු සුමේධ රත්නායක මහත්වරු ද එක්ව සිටියහ.
රට ගොඩනැඟීමේ වැඩපිළිවෙළක් සකස් කිරීමේ අරමුණින් එළිදැක්වූ මේ ප්‍රකාශනය පිළිබඳ සාකච්ඡා කිරීමට ශ්‍රී ලංකා පොදුජන පෙරමුණට හැර සියලු පක්ෂවලට ආරාධනා කළ බවත් එහි නායක පාඨලී චම්පික රණවක මහතා පැවැසීය.
එහිදී වැඩිදුරටත් අදහස් දැක්වූ පාඨලී චම්පික මහතා මෙලෙස ද පැවැසීය.
“ඉදිරි අවුරුදු තුනේදී රට ගොඩනැඟීමේ අරමුණින් දේශය වෙනුවෙන් එක්වන වැඩපිළිවෙළක් සකස් කළා. මේ රටේ සියලුම දේශපාලන පක්ෂවලට, ශ්‍රී ලංකා පොදුජන පෙරමුණට හැර අපි ආරාධනා කළා. ඒකට එදා සමඟි ජන බලවේගයත් සහභාගි වුණා. අද ඒ පිළිබඳව සාකච්ඡා කිරීමට සමඟි ජන බලවේගයේ මහ ලේකම්වරයා ඇතුළු නායකත්ව කණ්ඩායම් එක්ක සාකච්ඡා කිරීමට පැමිණියා. අපේ අරමුණ ඉදිරි මහ මැතිවරණය සහ ජනාධිපතිවරණයට මනුෂ්‍යත්වයේ සන්ධානයක් බිහි කර ගන්න. ”
නුවන් කොඩිකාර
