දඹුල්ල, හබරණ ප්‍රධාන මාර්ගයේ මිරිස්ගෝනියාව හන්දිය අසලදී අද (මාර්. 4) උදෑසන බස් රථයක් සහ විදේශිකයින් රැගත් මෝටර් රථයක් එකිනෙක ගැටීමෙන් අනතුරක් සිදුවී ඇති බව පොලිසිය පවසයි.
අනතුරට ලක්වී ඇත්තේ, ත්‍රිකුණාමලයේ සිට කොළඹ බලා ධාවනය වෙමින් තිබූ බස් රථයක් හා දඹුල්ලේ සිට හබරණ දක්වා ගමන් කරමින් තිබූ විදේශිකයින් රැගත් මෝටර් රථයකි.
පොලිසිය සඳහන් කළේ, අනතුරට ලක් වූ මෝටර් රථයේ ප්‍රංශ ජාතික එක ම පවුලේ මව, පියා සහ 12 හැවිරිදි පිරිමි දරුවෙකු ගමන් කරමින් සිට ඇති අතර අනතුරින් පිරිමි දරුවා සහ මෝටර් රථයේ රියැදුරු සුළු තුවාල ලබා දඹුල්ල රෝහලට ඇතුළත් කර ඇති බව ය.
බස් රථයේ ගමන් කරමින් සිටි මෙහෙණින් වහන්සේ නමක සුළු තුවාල ලබා දඹුල්ල රෝහලට ඇතුළත් කර ඇති බව පොලිසිය තවදුරට ත් සඳහන් කළේ ය.
පොලිසිය සඳහන් කළේ, බස් රථයේ රියැදුරු අත්අඩංගුවට ගෙන ඇති බව ය.
මේ පිළිබඳව දඹුල්ල පොලිසිය වැඩිදුර විමර්ශන සිදු කරයි.
