13
තරාතිරම නොබලා විනය ක්‍රියාමාර්ග ගන්නා බවට පක්ෂ නායකයා නමක් නොකියා විවිධ අවස්ථාවල ප්‍රකාශ කළ බවත් ඔහු පවසන්නේ තමන් ගැන යැයි හැඟී ගිය නිසා පක්ෂයේ තනතුරුවලින් තමන් ඉවත් කිරීම වළක්වාලමින් අධිකරණය මඟින් වාරණ නියෝගයක් ලබාගත් බවත් සමගි ජනබලවේගයේ සභාපති, පාර්ලිමේන්තු මන්ත්‍රී ෆීල්ඩ් මාෂල් සරත් ෆොන්සේකා මහතා පවසයි.
තමන්ට එරෙහිව පක්ෂය මඟින් විනය ක්‍රියාමාර්ග ගන්නා බවට මාධ්‍ය මඟින් ද නොයෙක් වාර්තා පළ වූ බවත් ඒ සියල්ල සලකා වළට වැටී ගොඩ එනවාට වඩා වළට නොවැටී බේරීම සඳහා අදාළ තීරණය ගත් බවත් ඒ මහතා කීය.
මහනුවර පැවැති නිර්පාක්ෂික උද්ඝෝෂණයකට එක්වෙමින් මන්ත්‍රීවරයා මේ බව පැවසුවේය.
මේ ආකාරයේම තීන්දුවක් ජේ.ආර්. ජයවර්ධන මහතා විසින් ද ඩඩ්ලි සේනානායක මහතාට විරුද්ධව ලබාගෙන තිබෙන බව ද හෙතෙම අවධාරණය කළේය.
ඔළු ගෙඩි ගණන වැඩිකර ගැනීමට ඕනෑම කුණු ජරාවක් බදා ගනිමින් සිදු කරන දේශපාලනය අනුමත කළ නොහැකි බවත් විවිධ පුද්ගලයන්ගේ සහය ලබා ගැනීම පක්ෂයකට අවශ්‍යය වුවත් දේශපාලනඥයින් ප්‍රතිපත්තිගරුකව වැඩ කිරීම ඊට වඩා වැදගත් බවත් ෆොන්සේකා මහතා කීවේය.
අසේල කුරුළුවංශ
