68
සිය පක්ෂයේ ජනාධිපති ධුර අපේක්ෂකයා කවුරුන්ද යන්න එළැඹෙන සතියේ ප්‍රකාශයට පත් කරන බව එක්සත් ජනරජ පෙරමුණේ නායක පාර්ලිමේන්තු මන්ත්‍රී පාඨලී චම්පික රණවක මහතා පැවැසීය.
ඊයේ (09) මාධ්‍ය හමුවකදී මන්ත්‍රීවරයා මේ බව කියා සිටියේය. ජනාධිපතිවරණය සම්බන්ධයෙන් පසුගිය පෙබරවාරි මස 14 වැනිදා පොදු වැඩපිළිවෙළක් ඉදිරිපත් කළ බවත් ඒ සම්බන්ධයෙන් විවිධ දේශපාලන පක්ෂ සමඟ කළ සාකච්ඡාවන්හිදී ධනාත්මක මෙන්ම ඍණාත්මක ප්‍රතිඵල ලැබුණු බවත් ඒ මහතා කීය. ඒ සියල්ලම විශ්ලේෂණය කර, පක්ෂයේ සාමාජිකයන් සමඟ සාකච්ඡා කර ජනාධිපතිවරණයේ අපේ අපේක්ෂකයා කවුද යන්න එළැඹෙන සතියේ ප්‍රකාශයට පත් කරන බව රණවක මහතා කියා සිටියේය.
සරත් ෆොන්සේකා මහත්තයට අපි ගරු කරනවා. මේ රටේ මිනිස්සුත් ගරු කරනවා. මොකද මේ රටේ තිබුණු දැවැන්ත ත්‍රස්තවාදී පිළිකාව නැති කර දමන්න එතුමා ශ්‍රී ලංකා සන්නද්ධ හමුදාවලට දුන් නායකත්වය ගැන. එතුමා ජනාධිපතිවරණයට ඉදිරිපත් වන බව ප්‍රකාශ කර තිබෙනවා. එතුමාගේ අරමුණ හැටියට මේ දූෂණය තුරන් කිරීම යන අදහස ඉදිරිපත් කර තිබෙනවා. එතුමා සමඟ අපි දේශපාලන සාකච්ඡාවක් කර නෑ. නමුත් අපි පෞද්ගලික මට්ටමෙන් එතුමා එක්ක සාකච්ඡා කර තිබෙනවා. එතුමාගේ අරමුණු සාක්ෂාත් කරගන්න ඉදිරිපත් වී තිබෙනවා. එතුමාට අපි සුබ පතනවා. අපේ අපේක්ෂකයා එතුමාද? නැත්නම් වෙන කෙනෙක්ද කියන එක අපි ලබන සතියේ ප්‍රකාශ කරනවායි යැයි ද ඔහු පැවසීය.
නුවන් කොඩිකාර
