61
එළැඹෙන ජනාධිපතිවරණය සම්බන්ධයෙන් සමාජ මාධ්‍යවල විවිධ පළ කිරීම් සම්බන්ධයෙන් පැමිණිලි රැසක් ලැබී ඇති බව මැතිවරණ කොමිෂන් සභාවේ නියෝජ්‍ය මැතිවරණ කොමසාරිස් (මැතිවරණ ආරවුල් නිරාකරණ) පියුමි ආටිගල මහත්මිය පවසයි.
මැතිවරණ නීති හා මාධ්‍ය උපමාන බලාත්මක කිරීම පිළිබඳව ඊයේ (09) රජයේ ප්‍රවෘත්ති දෙපාර්තමේන්තුවේ පැවැති වැඩමුළුවට එක් වූ ඒ මහත්මිය මේ බව කියා සිටියාය.
තවදුරටත් ඇය මෙසේද පැවසීය.
ඉදිරියේදී ආචාර ධර්ම ඇතුළත් ගැසට්ටුවක් නිකුත් කිරීමට කොමිසම පියවර ගන්නවා. අසත්‍ය පුවත්, මඩ ගැසීම්, විකෘති කරන ලද පුවත් පළ කිරීම් වැනි පළ කිරීම් බොහොමයක් සමාජ මාධ්‍යයන්හි පළ වන බවට කොමිසමට පැමිණිලි ලැබී තිබෙනවා. ඒවා නිරීක්ෂණයට කොමිසමේ නිරීක්ෂණ කණ්ඩායම් යොදා තිබෙනවා. රාජ්‍ය නොවන කණ්ඩායම්වල සහාය ඊට ලබා ගන්නවා.
මේ හේතුවෙන් මැතිවරණ කාල සීමාවේදී විශේෂ අවධානයක් සමාජ මාධ්‍ය සඳහා යොමු කර ඇති බව කියා සිටි ඒ මහත්මිය ඉන්ස්ටග්‍රෑම් සහ ටික්ටොක් සමාජ මාධ්‍ය සඳහා විශේෂ අවධානයක් යොමු කර ඇතැයි ද කියා සිටියාය.
ඒ ආයතන සමඟ ඍජුව සම්බන්ධ වී සාකච්ඡා පවත්වා ඇති බවත් සමාජ මාධ්‍ය නියාමනයේදී අපි නිකුත් කරන උපදෙස් සහ නියෝගවලට අනුකූල නොවෙනවා නම් ඒ ගොල්ලන්ගෙන් සම්මුතීන්වලින් ඔබ්බට ගිහිල්ලා අපිට සහයෝගය දක්වන්න ඒ ආයතන කැමැත්ත පළ කර තිබෙනවා.
මැතිවරණ කොමිෂන් සභාවේ මාධ්‍ය නියාමන කමිටුවක් ඇති කර තිබෙනවා. කොමිසමට ලැබෙන පැමිණිලි සියල්ල ඒ කමිටුවට යොමු කර සුදුසු උපමානවලින් පරීක්ෂා කරනවා. මැතිවරණ නිති උල්ලංඝනය වන බව අනාවරණය වන්නේ නම් ගත යුතු පියවර ගන්නවා. ෆේස්බුක් භාවිතා කරන්නේ මැද වයස් කාණ්ඩ. අද වනවිට තරුණ ප්‍රජාව වැඩි වශයෙන් යොමුව ඇත්තේ ඉන්ස්ටග්‍රෑම් සහ ටික්ටොක් සමාජ මාධ්‍ය සඳහායි. මෙවර මැතිවරණයේදී තරුණ ප්‍රජාව විශාල වශයෙන් සම්බන්ධ වෙනවා වගේම ඒ අයගේ ඡන්දය ඉතා වැදගත් වෙනවා නිවැරදි තීරණ ගැනීමට. ඉන්ස්ටග්‍රෑම් සහ ටික්ටොක් සමාජ මාධ්‍යවල දුස් තොරතුරු සහ අපේක්ෂකයන්ට වෛරී ප්‍රකාශ නිකුත් කිරීමෙන් තරුණයන්ට හරි දේ වටහා ගන්නට ලැබෙන්නේ නැහැ. දුස් තොරතුරු ලැබීම බරපතළ තත්ත්වයක්. එම තොරතුරු පිටවීමට පෙර ඉන් වන බලපෑම අවම කර ගැනීමට මුලින්ම අවධානය යොමු කරනවා. සමාජ මාධ්‍ය කියන්නේ තියුණු අවියක්. මඩ ගැසීම් චෝදනා කිරීම් ඉන් කළ හැකියි. එමෙන්ම නිහඬ කාලයේ සමාජ මාධ්‍ය බලපෑම වැඩියි. එම කාලය විශේෂයෙන් අධීක්ෂණය කරන බව ද ඇය වැඩිදුරටත් කියා සිටියාය.
සුභාෂිණී සේනානායක
