12
පාර්ලිමේන්තු මන්ත්‍රී ඒ.එල්.එම්. අතාවුල්ලා මහතාගේ නායකත්වයෙන් යුත් ජාතික කොංග්‍රසය ඉදිරි ජනාධිපතිවරණයේදී ජනාධිපති රනිල් වික්‍රමසිංහ මහතාට සහාය පළ කිරීමට එක්ව ඇත.
ඒ.එල්.එම්. අතාවුල්ලා මහතා ඇතුළු එහි නියෝජිතයන් පිරිසක් ඊයේ (14) ජනාධිපති රනිල් වික්‍රමසිංහ මහතා හමු වී මේ පිළිබඳ නිල වශයෙන් දැනුම් දුන්නේය.
මෙරට ජනවාර්ගික ගැටලුව විසඳීමට නම් රට තුළ ආර්ථික සහ දේශපාලන ගැටලු විසඳීම අත්‍යවශ්‍ය බව මෙහිදී පෙන්වා දුන් අතාවුල්ලා මහතා ඒ වෙනුවෙන් ජනාධිපති රනිල් වික්‍රමසිංහ මහතා ක්‍රියාත්මක කර තිබෙන වැඩපිළිවෙළ කෙරෙහි තමන් තුළ විශ්වාසයක් ඇති බවත් එබැවින් ඉදිරි ජනාධිපතිවරණයේදී ජනාධිපතිවරයාගේ ජයග්‍රහණය තහවුරු කිරීමට කැප වන බවත් සඳහන් කළේය.
මෙරට ජනවාර්ගික ගැටලුව විසඳීමට අදාළව ජාතික කොංග්‍රසයේ අදහස් ඇතුළත් යෝජනාවලියක් ද මෙහිදී ජනාධිපතිවරයා වෙත පිළිගැන්විණි. එසේම එළඹෙන ජනාධිපතිවරණයේදී ජනාධිපති රනිල් වික්‍රමසිංහ මහතාගේ ජයග්‍රහණය තහවුරු කිරීමට කැප වන බව දේශප්‍රේමී ජන බලවේගය පක්ෂය ද ප්‍රකාශ කරයි.
එම පක්ෂයේ ප්‍රධාන ලේකම් සුගත් හේවාපතිරණ මහතා ඇතුළු නියෝජිත පිරිසක් ඊයේ (14) ජනාධිපති රනිල් වික්‍රමසිංහ මහතා හමුවී මේ පිළිබඳ දැනුම් දුන්හ.
බිඳවැටුණු මෙරට ආර්ථිකය, නීතිය හා සාමය ස්ථාපිත කිරීමට පසුගිය වසර දෙකක කාලය තුළ ජනාධිපතිවරයා ක්‍රියාත්මක කළ වැඩපිළිවෙළ අගය කරන බවත් මින් ඉදිරියට ද රට ඉදිරියට ගෙන යෑමට ජනාධිපතිවරයාගේ නායකත්වය අවශ්‍ය බවත් සුගත් හේවාපතිරණ මහතා පෙන්වා දුන්නේය.
ඒ අනුව එළැඹෙන ජනාධිපතිවරණයේදී තම පක්ෂයේ අනුබද්ධ සංවිධාන සහ සමස්ත සාමාජිකත්වය එක්ව ජනාධිපති රනිල් වික්‍රමසිංහ මහතාගේ ජයග්‍රහණය තහවුරු කිරීම වෙනුවෙන් කැපවී කටයුතු කරන බව ද ඒ මහතා වැඩිදුරටත් සඳහන් කළේය.
