15
රාජ්‍ය සේවක වැටුප් වැඩිකිරීමේ යෝජනා පත්කළ කමිටු වාර්තාව අනුව මිස කිසිදු දේශපාලන අරමුණක් අනුව ඉදිරිපත් නොකළ බව මුදල් රාජ්‍ය ඇමැති, ආචාර්ය රංජිත් සියඹලාපිටිය මහතා ප්‍රකාශ කළේය.
මේ පිළිබඳව වැඩිදුරටත් අදහස් දැක්වූ රාජ්‍ය ඇමැතිවරයා මෙලෙස ද කීවේය.
“රජය හැකි සෑම විටකම ජනතාවට දිය හැකි උපරිම සහන දීමට කටයුතු කර තිබෙනවා. රාජ්‍ය සේවක වැටුප් වැඩි කිරීමේ යෝජනා තුළ කිසිදු දේශපාලන අරමුණක් නෑ.
කලක පටන් පැවති ඉල්ලීම් සලකා බලා හිටපු ජනාධිපති ලේකම් උදය ආර්. සෙනවිරත්න මහතාගේ ප්‍රධානත්වයෙන් පත් කළ විශේෂඥ කමිටුවෙන් දුන් නිර්දේශ සහ තීරණ අනුව ඉදිරිපත් කළ මේ යෝජනාවට කැබිනට් මණ්ඩලයේ අනුමැතිය ලැබුණා.
එහිදී පවතින ජීවන තත්ත්වය, ආර්ථික තත්ත්වය, ගෙවීමේ හැකියාව ආදී සෑම පැතිකඩක් පිළිබඳවම අවධානය යොමු කර මේ කමිටු වාර්තාව සකස් කර තිබෙනවා. එමෙන්ම සමෘද්ධි සංවර්ධන නිලධාරීන්ගේ ගැටලු කිහිපයක් සම්බන්ධයෙන් පැවති සාකච්ඡාවලින් අනතුරුව පත්කළ කමිටුවෙන් දුන් විසඳුම් යෝජනා මීළඟ කැබිනට් මණ්ඩලයට ඉදිරිපත් කිරීමට කටයුතු කරනවා.”
ජයසිරි මුණසිංහ
