15
වතු කම්කරු වැටුප් ඉහළ නැංවීමේ ගෞරවය ජනාධිපති රනිල් වික්‍රමසිංහ මහතාට හිමි විය යුතු බව මධ්‍යම පළාත් සභාවේ හිටපු මන්ත්‍රී අශෝක හේරත් මහතා ප්‍රකාශ කළේය.
මේ පිළිබඳව වැඩිදුරටත් අදහස් දැක්වූ හිටපු මන්ත්‍රීවරයා මෙලෙස ද කීවේය.
“මධ්‍යම පළාතේ නුවරඑළිය දිස්ත්‍රික්කයේ දේශපාලනය කරන පිරිස් හැටියට මේ වැටුප් වැඩිවීම සිදු කළ යුතු බවට නිරන්තරයෙන්ම ජනාධිපතිතුමා දැනුම්වත් කළා. වැවිලි ආර්ථිකය ශක්තිමත් කිරීමට දහ දුක් විඳින වතු කම්කරු ජනතාවගේ වැටුප් වැඩි කිරීම සාධාරණයි. වතු කම්කරුවන්ගේ දිනෙක වැටුප රුපියල් 1700ක් බවට පත්කිරීමට පඩිපාලක සභා ගත් තීරණය ඉතා අගය කරනවා. කවුරු කුමක් කීවත් ජනපති රනිල් වික්‍රමසිංහ මහතා නොහිටින්නට වතු කම්කරුවන්ගේ වැටුප ඉහළ නැංවීම සිදු නොවන්න ඉඩ තිබුණා.
වැවිලි ආර්ථිකය ශක්තිමත් කිරීමට ඉන්දියාවෙන් මෙරටට පිරිස් පැමිණ අවුරුදු දෙසීයක් වෙනවා. අදටත් ඔවුන් තේ ආර්ථිකය ශක්තිමත් කිරීමට මහත් වෙහෙසක් දරනවා. තාමත් ඔවුන්ගේ ජීවිත දුක් කම්කටොලුවලින් අඩුවක් නෑ. අපි එවන් දිරිමත් පිරිසට සහන දිය යුතුයි. ඔවුන්ගේ දූ දරුවන්ගේ සෞඛ්‍ය සහ අධ්‍යාපන පහසුකම් වැඩිදියුණු කළ යුතුයි. ඔවුන්ටත් තමන්ගේම කියා නිවෙසක අයිතිය දිය යුතුයි.”
ජයසිරි මුණසිංහ
