21
සෑම පුරවැසියකුගේ ම දිවිපෙවෙත සමග අත්‍යන්තයෙන් ම බැඳී පවතින ජනාධිපතිවරණය මෙවර අන් කවරදාටත් වඩා රටේ ආර්ථික වර්ධනය මූලික වශයෙන් පදනම් කරගෙන ඇති බවත් වත්මන් ජනාධිපති ධුර අපේක්ෂක රනිල් වික්‍රමසිංහ මහතාට එම රාජ්‍ය පාලන කටයුතු සම්බන්ධයෙන් කිසිවකුගෙන් උපදෙස් අවශ්‍ය නැති බවත් එය ක්‍රියාවෙන් ම එතුමා ඔප්පු කර ඇති බවත් අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා පැවසී ය.
අමාත්‍යවරයා මේ බව ප්‍රකාශ කළේ ජනාධිපති රනිල් වික්‍රමසිංහ මහතාගේ ජයග්‍රහණය වෙනුවෙන් කඩුවෙල නවගමුව -දකුණ සමූපාකාර මාවත ජනතාව දැනුම්වත් කිරීමේ හමුවකට එක් වෙමිණි.
මෙහි දී වැඩිදුරටත් අදහස් දක්වමින් අමාත්‍යවරයා කියා සිටියේ 1977 වර්ෂයේ සිට අමාත්‍යවරයෙක් වශයෙන් මෙන් ම අගමැතිවරයෙක් වශයෙන් ද අද්දැකීම් සමූහයක් හා මනා පරිචයක් රනිල් වික්‍රමසිංහ මහතා ලබා ඇති බවයි. වත්මන් ජනාධිපතිවරයාගේ වසර දෙකහමාරකට ආසන්න ධුර කාලය තුළ සැලසුම්ගත අධ්‍යාපන, ආර්ථික හා සමාජ ප්‍රතිපත්ති මත මේ වන විට රටේ පාලනය සිදු වන බවත් අධ්‍යාපන ක්ෂේත්‍රය තුළ ද එම සැලසුම් ක්‍රියාත්මක වෙමින් පවතින බවත් සුසිල් ප්‍රේමජයන්ත මහතා මෙහි දී පැවසී ය.
වැසී තිබූ පාසල් විවෘත වී මේ වන විට පාසල් පෙළපොත්, නිල ඇඳුම්, පාසල් දිවා ආහාරය දරුවන්ට නිසි කලට ලබා දෙමින් විභාග කාල සටහන යථාවත් කර ගුරු හිඟය පියවා ඩිජිටල්කරණය හරහා නව අධ්‍යාපන පරිවර්තනීය වෙනසකට පදනම සකස් කරමින් පවතින අවස්ථාවක එහි ඉදිරියට යෑමට නම් වත්මන් ජනාධිපතිවරයා තව දුරටත් රැඳී සිටිය යුතු බව අමාත්‍යවරයා වැඩිදුරටත් කියා සිටියේ ය. ඒ සියල්ල කළ හැකි වූයේ රටේ බංකොලොත් ආර්ථිකය යථාවත් කර රට අරාජික අවස්ථාවක වගකීම් භාරගෙන ක්‍රියා කළ නිසා බව කී ඒ මහතා කිසි දු දේශපාලන පක්ෂයකට කොටු නොවූ නිර්පාක්ෂික නිර්වාර්ගික ස්වාධීන අපේක්ෂකයකු වූ රනිල් වික්‍රමසිංහ මහතා වටා සියලු ජනතාවට පාට, පක්ෂ භේදයකින් තොර ව ඒකරාශී විය හැකි බවයි. එසේ ම ජාත්‍යන්තර මූල්‍ය අරමුදලේ සහාය ලබාගෙන රටේ ආර්ථිකය ගොඩගත් වත්මන් ජනාධිපතිවරයා ලබන වසරේ දී තවදුරටත් රජයේ සේවකයන්ගේ වැටුප් වැඩි කිරීම සඳහා ද දැනටමත් ක්‍රියාත්මක වෙමින් සිටින බව ඒ මහතා පැවසූවේ ය. තව ද රාජ්‍ය පාලනය කෝඩුකාරයන්ට කළ නොහැකි බව ද අමාත්‍යවරයා මෙහි දී පැවසී ය.
