16
ජනාධිපති අපේක්ෂක අනුර කුමාර දිසානායක ඉදිරිපත් කර තිබෙන්නේ ප්‍රතිපත්තියක් නැති ප්‍රතිපත්ති ප්‍රකාශනයක් බව පාර්ලිමේන්තු මන්ත්‍රී හෙක්ටර් අප්පුහාමි මහතා ප්‍රකාශ කරයි.
එම ප්‍රතිපත්ති ප්‍රකාශනය අනුර කුමාර මහතා වේදිකාවල කතා කරන කතාවක් වැනි බවත් ඔහුගේ කතාවල ද කිසිම හරයක් නැති බවත් බංකොලොත් වූ රටක් නැවත ගොඩගන්න ඔවුන්ට වැඩපිළිවෙළක් නැති බවත් හෙක්ටර් අප්පුහාමි මහතා සඳහන් කළේය.
පෙරේදා (27) සමගි ජන සන්ධාන කාර්යාලයේ පැවැති මාධ්‍ය හමුවට සහභාගි වූ පාර්ලිමේන්තු මන්ත්‍රී හෙක්ටර් අප්පුහාමි මහතා මේ බව පැවසීය.
එහිදී වැඩිදුරටත් පාර්ලිමේන්තු මන්ත්‍රී හෙක්ටර් අප්පුහාමි මහතා මෙසේද පැවසීය.
‘රට විනාශ කරපු කණ්ඩායමක් තමයි නැවත රට පාලනය කරන්න ඉල්ලන්නේ. ඒ නිසා රටේ ජනතාව තීරණය කරන්න කොහොමද මේක කරන්නේ කියලා. පැහැදිලි පිරිසුදු කණ්ඩායමක් ඉන්නේ සමගි ජන බලවේගයේ කියලා කියන්නේ ඒකයි.
අනුර කුමාර දිසානායක ජනාධිපති අපේක්ෂකවරයා ඉදිරිපත් කර තිබෙනවා ප්‍රතිපත්තියක් නැති ප්‍රතිපත්ති ප්‍රකාශනයක්. ඒක අනුර කුමාර මහත්තයා වේදිකාවල කතා කරන කතාවක් වගෙයි. හැබැයි ඒ කතාවල කිසිම හරයක් නෑ. බංකොලොත් වූ රටක් යළි ගොඩගන්න වැඩපිළිවෙළක් නෑ. දැන් මේ වෙනවිට ගම්වල කසිප්පු ගහලා එක එකාට ගෝරි දාගෙන කප්පම් අරන් කීයක් හරි හොයාගෙන රෑට බූරු ගහන කණ්ඩායම් දැන් ජවිපෙ වෙලා. අපි 88-89 කරපුවා තමයි මේ සැරේ කරන්නේ කියන ප්‍රකාශය කරමින් ගම්වල අහිංසක මිනිසුන් බියවද්දමින් සැරිසරනවා. ජවිපෙ එදා කළේ මොකක්ද කියා දැන් පැහැදිලිව පේනවා. එදා මේ රටේ ජනතාවට බෙහෙත් නැතිව බරපතළ විදිහට ප්‍රශ්න ඇතිවුණු මොහොතේ ජේ.ආර්. ජයවර්ධන මහතා ප්‍රමුඛ ආණ්ඩුව ග්ලැඩිෂ් ජයවර්ධන මැතිනිය පත් කළා රාජ්‍ය ඖෂධ නීතිගත සංස්ථාවට. ඒ බරපතළ අවස්ථාවේ ජවිපෙ ඉන්දියාවෙන් බෙහෙත් ගෙනාවොත් ගෙනාපු අය මරනවා කීවා. ඉන්දියාවෙන් කිසිම දෙයක් ලංකාවට ගේන්න බැහැ කිව්වා. අවසානයේ ග්ලැඩිෂ් ජයවර්ධන මහ දවල් මහ පාරේ මැරුවා. එදා කිසිම දෙයක් ඉන්දියාවත් එක්ක සම්බන්ධ වෙන්න එපා කියපු ජනතා විමුක්ති පෙරමුණ අද අනුර කුමාර දිසානායක මහත්තයා යනවා ඉන්දියාවේ ඒ බෙහෙත් කර්මාන්ත ශාලාවටම. මතක් වෙන්නේ නැද්ද එදා ඉන්දියාවෙන් ලංකාවට ඖෂධ ගෙනාවා කියලා මේ රටේ මිනිස්සු මැරුවා කියන එක. මොකක්ද මේ පක්ෂයේ දෙබිඩි පිළිවෙත.
ඉන්දු – ලංකා ගිවිසුම නිසා ඉන්දියාව තහනම් කර මේ රටේ විද්වතුන් උගතුන් මරා මිනිසුන්ගේ බෙලි කපලා වැටවල්වල ගහලා සමහර තැන්වල ටයර් සෑය දාලා මැරුවා. රටේ හොඳම මොළ ටික මරලා මේ අය බලාපොරොත්තු වුණේ මොකක්ද? ලාල්කාන්ත කියනවා අපි ගමට අධිකරණ බලය දෙන්න යනවා කියලා. රටේ අධිකරණයක් තිබෙනවා, රටේ නීතියක් තිබෙනවා. ඒ නීතිය ක්‍රියාත්මක කරන පිරිසක් ඉන්නවා. පොලිසිය ඇතුළු කණ්ඩායමක් තිබෙනවා. හැබැයි මේ ගොල්ලෝ කියන්නේ ඒ කණ්ඩායම් දෙකම නෙමෙයි. ජනතා විමුක්ති පෙරමුණ තමයි මේ වැඩ කොටස ගමේ කරන්න ඕනෑ. 88-89 ජනතාවට මතක් කර දෙනවා අපි උඹලගේ දේවල් කාලා තමයි රට පාලනය කරන්න හදන්නේ කියලා. මේ රටේ මිනිස්සු වැඩ කරන්නේ හෘද සාක්ෂියට අනුවයි. හෘද සාක්ෂියට බිය වෙන ප්‍රධාන කාරණාව තමයි ආගමට දහමට ගරු කරන විනය ගරුක කණ්ඩායමක් තමයි රටක අනෙක් අයට ගරු කරලා ජීවත් වෙන්නේ. අපේ රටේ ජනතාව බෞද්ධ වේවා, හින්දු වේවා, කතෝලික වේවා, ඉස්ලාම් වේවා මේ හැම එකක්ම ආගමට දහමට ළැදිව තමයි ජීවත් වෙන්නේ.
ඒ නිසා තමයි මේ රටේ මෙච්චර කාලෙකට විනයක් තිබෙන්නේ. ජවිපෙ කියනවා ඒ ගොල්ලන්ගේ රජයකින් ආගමට කිසි ඉඩක් ලැබෙන්නේ නැහැ කියලා. ඒ නිසා එතැන තිබෙන්නේ පැහැදිලිවම ත්‍රස්තවාදය. ප්‍රජාතන්ත්‍රවාදය සහමුලින්ම උපුටා දමා මිනිසුන්ට ආගම අදහන්න ඇති අයිතිය නැති කරන්න වැඩසටහනක් ගැන කතා කරනවා. අනුර කුමාර දිසානායකලා මේ ක්‍රියාත්මක කරන්න හදන්නේ මහා බබාගේ මුහුණු දෙකේ ප්‍රතිපත්තිය. රට ඉදිරි කාලයේ බරපතළ ලෙස විනාශ වෙන්න ක්‍රමයක් කියා කියන්න පුළුවන්.
ලේ තැවරිච්ච නැති, වෛරය, ක්‍රෝධය නැති පිරිසුදු එකම පක්ෂය සමගි ජන බලවේගය කියලා කියනවා. සියලුම ආගමිකයන්ගේ ඉදිරි අනාගතය භාර ගන්න ඉන්න එකම දේශපාලන නායකයා සජිත් ප්‍රේමදාස මහතායි. සැප්තැම්බර් 21දා අපි ජයග්‍රහණයෙන් සතුටු වුණාට ඊට එහා ගිය වගකීමක් අපට පැවරෙනවා යැයිද පැවසීය.
රක්ෂණ ශ්රියන්ත
