17
උතුරේ ධීවර කර්මාන්තය නඟාසිටුවීම පිණිසත් රටේම ධීවරයන්ට සහනාධාර රැසක් ලබා දීමටත් විශාල කැප කිරීමක් කළ ජනාධිපති රනිල් වික්‍රමසිංහ මහතාට මෙවර ජනධිපතිවරණයේදී පූර්ණ සහය ලබා දීමට යාපනයේ ධීවර සමුපකාර සමිති සම්මේලනය තීරණය කොට තිබෙන බව එහි සභාපති ශාන්ත ප්‍රකාශ් මහතා පැවසීය. ඔහු මෙම ප්‍රකාශය සිදු කරන ලද්දේ පසුගියදා (27) යාපනයේදී පැවති විශේෂ මාධ්‍ය හමුවකට සහභාගි වෙමිනි.
“පසුගිය කාලයේ උතුරේ ධීවරයන්ට ඉන්ධන සපයා ගැනීමට නොහැකි වූ අවස්ථාවේදී පවුල් 65000කට පමණ ධීවර රැකියාව අතහැර කුලී රැකියා තෝරා ගන්නට සිදු වුණා. නමුත් රනිල් වික්‍රමසිංහ මහතා ජනාධිපති තනතුර භාරගෙන බලයට පත් වූ වහාම ධීවරයින්ට අවශ්‍ය ඉන්ධන පමණක් නෙවෙයි බොහෝ සහනාධාර ලබා දුන් බව මේ අවස්ථාවේදී සෑම ධීවරයෙකුම මතකයේ තබා ගත යුතුයි. විශේෂයෙන්ම භූමිතෙල් මිල ඉතා විශාල අගයකින් පහත දැමීමටත් එම මිලටත් වඩා අඩු සහනාධාර ක්‍රමයකට භුමිතෙල් ලබා දීමටත් රනිල් වික්‍රමසිංහ ජනාධිපතිවරයා කටයුතු කළා.
රටේ ආර්ථිකය ඉතාම පහත් අඩියකට වැටී තිබුණු මොහොතක එතුමා ධීවරයින් වෙනුවෙන් ගත් ක්‍රියාමාර්ගවලට උතුරේ ධීවරයින් පමණක් නෙවෙයි මේ රටේ සියලුම ධීවරයින් කළගුණ සැලකිය යුතුයි. ඉන්දියාවේ ධීවරයින්ගෙන් උතුරේ ධීවරයින්ට හානි පාඩු වගේම විශාල හිරිහැරයක් සිදුවෙනවා. බලහත්කාරයෙන් ඉන්දියාවේ සිට උතුරු මුහුදට ට්‍රෝලර් යාත්‍රාවලින් පැමිණෙන ඉන්දීය ධීවරයින් උතුරේ අපට අයත් මුහුදු සම්පත් මංකොල්ලකෑම නිසා මසකට රුපියල් කෝටි ගණනක පාඩුවක් සිදු වෙනවා. මේ නිසා අපි රනිල් වික්‍රමසිංහ මහතාගෙන් බලාපොරොත්තු වන්නේ එකම එක දෙයක් පමණයි.
ඒ ඉන්දීය ධීවරයන්ගේ බලහත්කාර ආක්‍රමණය නතර කරවා දෙන ලෙසයි.මෙවර ජනාධිපතිවරණයට ඉදිරිපත් වී සිටින ප්‍රධාන අපේක්ෂකයින් අතරින් හොඳම රාජ්‍යතාන්ත්‍රිකභාවයක් හා ඉතාම සමීප ගනුදෙනුවක් ඉන්දියාව සමඟ ඇත්තේ රනිල් වික්‍රමසිංහ මහතාට පමණක් නිසා ඔහුට මේ ක්‍රියාව ඉතා පහසුවෙන් කළ හැකි බව අපි තරයේම විශ්වාස කරගෙන අපි එතුමාව යළිත් මේ රටේ ජනාධිපතිවරයා කිරීමට කැපවීමෙන් යුතුව කටයුතු කරනවා’ යැයි සභාපතිවරයා වැඩිදුර අදහස් දක්වමින් මෙහිදී පැවසීය.
උතුරු පළාත් විශේෂ – රසුල දිල්හාර ගමගේ
