12
ජනාධිපති මැතිවරණයේදී ඓතිහාසික ජයග්‍රහණයක් වාර්තා කරමින් නුවරඑළිය දිස්ත්‍රික්කය ප්‍රකාශිත ඡන්දවලින් 85%ක ප්‍රතිශතයක් ලබා ගනිමින් නුවරඑළිය දිස්ත්‍රික්කයේ විශිෂ්ට ජයක් වත්මන් ජනාධිපති රනිල් වික්‍රමසිංහ මහතා ලබාගන්නා බවත්, සමස්ත රටේ ඡන්ද ප්‍රතිඵලය එයට සාපේක්ෂ වන බව නුවරඑළිය දිස්ත්‍රික් සම්බන්ධීකරණ කමිටුවේ සභාපති පාර්ලිමේන්තු මන්ත්‍රී එස්.බී. දිසානායක මහතා පැවසීය.
එස්.බී. දිසානායක මහතා ඒ බැව් කියා සිටියේ නුවරඑළිය මැතිවරණ කොට්ඨාසයේ ඡන්ද මධ්‍යස්ථාන මට්ටමෙන් කටයුතු කරන ක්‍රියාකාරී සංවිධායකවරුන්ට ඉදිරි මැතිවරණයේ සැලසුම් පිළිබඳ නුවරඑළිය දිස්ත්‍රික් මැතිවරණ මෙහෙයුම් කාර්යාලයේදී (26) දැනුම්වත් කිරීමේ වැඩසටහනින් අනතුරුව මාධ්‍ය වෙත අදහස් දක්වමිනි.
මෙහිදී වැඩිදුරටත් එස්.බී. දිසානායක මහතා මෙසේද පැවසීය.
කලින් වතාවේදී ගෝඨාභය රාජපක්ෂ දින්නේ පොදුජන පෙරමුණේ ඡන්ද විතරක් අරන් මේ පාර ශ්‍රී ලංකා පොදු ජන පෙරමුණ නියෝජනය කළ 11 හැරෙන්න අනිත් සියලු දෙනාම ඉන්නේ වත්මන් ජනාධිපති රනිල් වික්‍රමසිංහ මහතාත් එක්කයි. ඒත් එක්කම අපිත් සමඟ එකතුවෙලා ඉන්නවා එක්සත් ජාතික පාක්ෂිකයන් හා ශ්‍රී ලංකා නිදහස් පක්ෂයේ අය.
මේ වෙනකොට දිගම්බරම් මන්ත්‍රීවරයාගේ පක්ෂයත් දෙකට කැඩිලා. ඔවුන්ගේ ක්‍රියා කලාපයට අකමැති අය අපිත් එක්ක කතා කර තිබෙනවා.
මන්ත්‍රීවරුන් එකොළහක් මේ වන විට රනිල් වික්‍රමසිංහ මහතාගේ ජයග්‍රහණය වෙනුවෙන් අත්වැල් බැඳ ගන්න සූදානම් වෙලා සිටිනවා. ඔවුන් හෙට අනිද්දා අපත් එක්ක එකතු වෙන්න නියමිතයි.
මේ හැම දේ එක්කම වත්මන් ජනාධිපති රනිල් වික්‍රමසිංහ මහතාගේ ජයග්‍රහණය තහවුරු වෙලා තිබෙන්නේ, අපි අනිවාර්යයෙන්ම 85%ක ජයග්‍රහණයක් අත්කර ගන්න එක ඉර හඳ වගේ විශ්වාසයි යනුවෙන් පැවසීය.
හැටන් රංජිත් රාජපක්ෂ
