14
ඉහළ සිට පහළට ක්‍රියාත්මක දූෂණය වංචාව හොරකම අල්ලස ඉවත් කර ජනතාව රැකගනිමින් ජනතාව ජීවත් කරවන පොදුජන යුගයක් ලබන 21 දා නිර්මාණය කරන බව සමගි ජන බලවේගයේ සහ සමගි ජන සන්ධානයේ ජනාධිපති අපෙක්ෂක විපක්ෂ නායක සජිත් ප්‍රේමදාස මහතා ප්‍රකාශ කළේය.
ගරුසරු රටක පදනම ගොඩනඟන සැමට ජයක් සමගි රටක් ප්‍රතිපත්ති මාලාවේ මැද මාවත හරහා රැකී රක්ෂා ඇති කර දුගී දුප්පත්කම තුරන් කර සාඩම්බර රටක් ගොඩනඟන බවත් විපක්ෂ නායකවරයා පැවසීය. 2024 ජනාධිපතිවරණය ඉලක්ක කර ගනිමින් සමගි ජන බලවේගය සහ සමගි ජන සන්ධානය සංවිධාන කරන ජන රැලි මාලාවේ තවත් ජන රැලියක් පෙරේදා (29) පූගොඩ දී පැවැත්විණි.
එහිදී වැඩිදුරටත් සමගි ජනබලවේගයේ සහ සමගි ජන සන්ධානයේ ජනාධිපති අපේක්ෂක විපක්ෂ නායක සජිත් ප්‍රේමදාස මහතා මෙසේ ද පැවසීය.
‘‘දළදා වහන්සේගේ සහ මහානායක හිමිවරුන්ගේ ආශිර්වාදය ලබාගෙන රට ගොඩනඟන, ප්‍රජා කේන්ද්‍රීය, ප්‍රජා සංවර්ධන, ප්‍රජා නායකත්ව වැඩපිළිවෙළ, සැවොම ජයග්‍රහණය කරවන ප්‍රතිපත්තිය අපි අද එළිදැක්වූවා. මේ ප්‍රතිපත්තිය සකස් කළේ වෘත්තියවේදීන්, විශේෂඥයන්, විෂයානුබද්ධ උගතුන් බුද්ධිමතුන් වගේම බිම් මට්ටමෙන් අදහස් යෝජනා ලබාගෙනයි. පොදුජන යුගයක් සැප්තැම්බර් 21 වැනිදා නිර්මාණය කරන බව අපි දළදා වහන්සේ ඉදිරියේ පොරොන්දු වුණා.
අපට වැදගත් දර්ශනයක් තිබෙනවා. ජනතාවාදී සංකල්පයක් තිබෙනවා. දක්ෂතම කණ්ඩායමක් සිටිනවා. ජන සමාජයේ සියලු දෙනාට ශක්තිය දෙන ප්‍රතිපත්ති මාලාව සෑම නිවසකටම අපි රැගෙන එන්න කටයුතු කරනවා. එළඹෙන ජනාධිපතිවරණ ජයග්‍රහණයත් සමඟ මේ වැඩපිළිවෙළ මහ පොළොවේ සත්‍යයක් යථාර්ථයක් බවට පත් කරනවා. සමගි ජන සන්ධානයේ ප්‍රතිපත්ති මාලාව අපි ඉදිරිපත් කරන්නේ සක්වළ හුස්ම වැනි වැඩසටහන්වලින් රටට ලක්ෂ 10,000ක සේවයක් කරලයි. වර්තමාන රජයට විදේශ ගමන් බලපත්‍ර ලබාදෙන්න නොහැකි වෙලා තිබෙනවා. අද රටේ විදේශ ගමන් බලපත්‍ර පෝලිමක් නිර්මාණය වී තිබෙනවා.
ලංකාවේ සෑම ආසනයකම තරුණ සංවර්ධන මධ්‍යස්ථාන නිර්මාණය කර, සෑම පාසලක්ම සුහුරු පාසලක් බවට පත් කර, සෑම රෝහලක්ම සුහුරු රෝහලක් බවට පත් කර, ජන ජීවිතය ශක්තිමත් කරමින් තාරුණ්‍යය සවිබල ගන්වමින් අනිවාර්යෙන් නව ව්‍යවසායකින් ලක්ෂ 10ක් සමඟ රට ගොඩගන්න වැඩපිළිවෙළ ක්‍රියාත්මක කරනවා. සෑම මැතිවරණ කොට්ඨාසයකම නිෂ්පාදන කර්මාන්තශාලා ඇති කරන්නත් කටයුතු කරනවා. ඒ වගේම කළමනාකරණය තාක්ෂණය කේන්ද්‍ර කරගෙන තරුණ සංවර්ධන වැඩපිළිවෙළක් ක්‍රියාත්මක කරන්න කටයුතු කරනවා. රටේ කර්මාන්ත පද්ධතිය ශක්තිමත් කරන අතර කෘෂිකර්මාන්තයේ නියැළෙන සියලු දෙනාගේ ජන ජීවිතය ශක්තිමත් කරන්න කටයුතු කරනවා.
කුඩා මධ්‍ය පරිමාණයේ කර්මාන්තකරුවන්ට දිරිගැන්වීම් ලබා දී ආර්ථිකය ශක්තිමත් කර ජනතාවට සුබවාදී හෙට දවසක් උදා කරන්න කටයුතු කරනවා. ඔබ සියලු දෙනාට ගරුසරු රටක පදනම ගොඩනඟන සැමට ජයක් සමගි රටක් අපේ ප්‍රතිපත්තියක සමාජ ප්‍රජාතන්ත්‍රවාදය තුළින් රැකීරක්ෂා බිහි කරමින් කර්මාන්ත බිහිකරමින්, දුප්පත්කම තුරන් කරමින් අභිමානවත් ශක්තිමත් දේශයක් අපි ගොඩනඟනවා.”
පාර්ලිමේන්තු මන්ත්‍රී රංජිත් බණ්ඩාර මහතා –
අපි ජීවත් වෙන්නේ බංකොලොත් වූ රටක. අද මොනරාගල රනිල් වික්‍රමසිංහ මහත්තයාගේ රැස්වීමක් තිබෙනවා කතාව කියන්න කනගාටුයි සෙනඟ දාහක්වත් නැති තරම්. අපේ ඊයේ රැස්වීමක් තිබ්බා සෙනඟ දහදාහකට වැඩියි. මේක තමයි වෙනස. විපක්ෂයේ ඉදගෙන කරපු කාර්යය මොනවද කියා ඔබ හොඳින් දන්නවා. බලයට පැමිණි පසු කොහොමද කියා අමුතුවෙන් කියන්න අවශ්‍ය නැහැ.
අපේ ප්‍රතිපත්ති ප්‍රකාශය අද ඉදිරිපත් කළා දළදා වහන්සේ වැද නමස්කාර කරගෙන. මල්වතු අස්ගිරියේ මහානායකවරුන්ට ප්‍රදානය කර තමයි ආරම්භ කළේ. ජවිපෙ ප්‍රතිපතත්ති ප්‍රකාශයේ ඉදිරිපත් කළේ තරු පහේ හෝටලයක. රනිල් වික්‍රමසිංහ මහත්තයත් තරු පහේ හෝටලයක තමයි ප්‍රතිපත්ති ප්‍රකාශය එළිදැක්වූයේ.
අපේ ප්‍රතිපත්ති ප්‍රකාශයෙන් අද අඩු ආදායම්ලාභි පවුල් සම්බන්ධයෙන් විශේෂ අවධානයක් යොමු කර තිබෙනවා. රජයේ සේවකයන්ට අද ලැබෙන වැටුපෙන් ජීවත් වෙන්න අමාරු තත්ත්වයක් තිබෙන නිසා සියයට 24කින් වැටුප් වැඩිවීමක් කිරීමට බලාපොරොත්තු වෙනවා.
පූගොඩ, කිරිඳිවැල බහුතරයක් අයගේ ජීවිකාව වන්නේ පොල් සහ රබර් කර්මාන්තය යෙදිලා ඉන්න අය. රාජපක්ෂ සහ රනිල්ගේ ආණ්ඩුවෙන් මේ කර්මාන්තය නැත්තටම නැතිවෙලා අමාරුවෙන් කරගෙන යන සුළුතරයක් අද ඉන්නේ. තමන් සතු කනකර උකස් කර ඒවා අද සින්න වෙලා කර කියා ගන්න දෙයක් නැතිව ඉන්නේ. රටක් ඉදිරියට ගෙන යන්න නම් හොඳ පළපුරුදු දක්ෂ කණ්ඩායමක් ඉන්න අවශ්‍යයයි.
ජවිපෙ ඉන්නේ 88 – 89 මිනීමරලා, ගෙවල් ගිනි තියපු, කර්මාන්ත ශාලා ගිනි තියපු බැංකු කඩපු පරණ සෙට් එක තමයි ජ.වි.පෙ. කැබිනට් එකේ ඉන්නේ. නමුත් සමගි සන්ධානයේ ඉන්නේ පිරිසුදු දක්ෂ දූෂණයෙන් තොර පළපුරුදු කණ්ඩායමක්. ඒ නිසා ලබන 21 වැනිදා සජිත් ප්‍රේමදාස දිනවන්න කටයුතු කරන ලෙස ඉල්ලා සිටිනවා.
පාර්ලිමේන්තු මන්ත්‍රී නලීන් බණ්ඩාර මහතා –
පූගොඩට අව්වත් තිබෙනවා වැස්සත් තිබෙනවා. ඒ කියන්නේ මඟුල් ගෙයක් ළඟයි කියලා. සුබ ලකුණක්. ලබන 21 වැනිදා කියන්නේ පුංචි මිනිසා දිනවන දවස. අවුරුදු ගණනාවකට පස්සේ තමයි පුංචි මිනිසුන්ගේ නායකයෙක් බිහිවන්නේ. එදා රණසිංහ ප්‍රේමදාස මහතා පුංචි මිනිසුන්ගේ නායකයා විදිහට ආණ්ඩුවක් කළා. ජනසවිය, නිවාස ව්‍යාපෘති ගම්උදා ගණනාවක් කළා. එදා රණසිංහ ප්‍රේමදාස ජනාධිපතිගේ පාලන කාලයේ පාසල් නිල ඇඳුම්, සපත්තු, දිවා ආහාර වේල සෙවණ සරණ මාපිය රැකවරණ ක්‍රමය ලබාගත් අය තමයි අද මෙතැන වැඩිහිටියන් බවට පත් වෙලා ඉන්නේ.
තමන්ගේ ආණ්ඩුවේ ව්‍යාපෘතිවලින් සියයට 99ක්ම පුංචි මිනිසා වෙනුවෙන් කරපු ප්‍රේමදාස ජනාධිපතිගෙන් පස්සේ අවුරුදු ගණනාවකට පස්සේ සැප්තැම්බර් 21දා පස්සේ පුංචි මිනිසුන්ගේ මිනිහා සජිත් ප්‍රේමදාස මේ රටේ ජනධිපතිවරයා බව මේ සුබ ආරංචිය පූගොඩට, දොම්පෙට ආවාම අපට පේනවා. ජේ.ආර්. සහ ප්‍රේමදාස ජනාධිපතිවරු අපනයන ආරථිකයක් හදලා ගමට කර්මාන්තශාලා ගෙනැත් ගමට ඩොලර් ගෙනැල්ලා නතර කළ තැන 1994. එතැන ඉදලා වැඩ බැරි ටාසන්ලත් ජනාධිපති වෙන්න හදනවා. 1994 චන්ද්‍රිකාගේ ආණ්ඩුවේ ඒකට දායකවුණු පිරිස තමයි ජනතා විමුක්ති පෙරමුණ. අවුරුදු 10ක් ආණ්ඩුව කළා. චන්ද්‍රිකා උදේ 10ට නැඟිටින්නේ. ඉන් පස්සේ ජනතාව භාර දුන්නා තව අවුරුදු 10ක් අසාර්ථක ව්‍යාපෘති කර මේ රට බංකොලොත් කරන්න වැඩිම දායක වුණු මහින්ද රාජපක්ෂ යුගය පාලනයට වැඩිම දායක වුණේ කවුද ජනතා විමුක්ති පෙරමුණ.
පාර්ලිමේන්තු මන්ත්‍රී තිස්ස අත්තනායක මහතා –
රනිල් වික්‍රමසිංහ මහතා හැම දේශපාලන රැස්වීමකදීම සජිත් ප්‍රේමදාස මහතාට විරුද්ධව කතා කරනවා. ඒ නිසා රනිල් වික්‍රමසිංහ මහතා බොරු තොගයක් කියන්න පටන් අරගෙන. එතුමා කියනවා රට භාර ගන්න කියපු වෙලාවේ සජිත් ප්‍රේමදාස මහතා පැනලා ගියාලු. රාජපක්ෂ පවුලත් එක්ක ඩීල් දාන්න ගියේ නැහැ. සජිත් ප්‍රේමදාස මහතා කිව්වේ මම රට භාරගන්නම් හැබැයි කොන්දේසි 4ක් තිබෙනවා. එකක් තමයි ගෝඨාභය රාජපක්ෂ ඉවත් වන දවස පැහැදිලිව කියන්න ඕනෑ. දෙවන කාරණය කැබිනට් මණ්ඩලය පත් කරන විට ගෝඨාභය ආණ්ඩුවේ හිටපු දූෂිත අය පත් කරන්න බැහැ. පොහොට්ටුවෙන් 15ක් දාලා අපෙන් 5ක් දාන්න කියා යෝජනාව ආවා. ඒක කරන්න බැහැ. ඒක අගමැතිවරයාට සම්පූර්ණයෙන් පවරන්න ඕනෑ. තුන්වන කාරණය විධායක ජනාධිපති ක්‍රමය අහෝසි කරන්න. හතරවන කාරණය අපට ජනවරමක් නැති නිසා මාස 6කින් පාර්ලිමේන්තු මැතිවරණයකට ගිහින් අලුත් ආණ්ඩුවක් තෝරන්න ඉඩකඩ දෙන්න කියලා. මේ කාරණා ලියා ලියුම භාරදීලා පැයක් ගියේ රනිල් වික්‍රමසිංහ දිවුරුම් දෙනවා. රාජපක්ෂලා ආරක්ෂා කරන්න රනිල් වික්‍රමසිංහ තමයි හොඳම තේරීම කියා ඔවුන් තීරණය කළා.පාර්ලිමේන්තු මන්ත්‍රී හර්ෂණ රාජකරුණා මහතා –
මේ රටේ සියලුම ජනකොටස්වල හා බහුතරයක් පක්ෂ එක්ව සිටින්නේ සැප්තැම්බර් 21 වැනිදා නියත ජනපති ලෙස සජිත් ප්‍රේමදාස මහතා පත් කරන්නයි. සජිත් ප්‍රේමදාස මහතා අවුරුදු 24ක් පාර්ලිමේන්තුවේ මන්ත්‍රීවරයෙක් හැටියටත්, නියෝජ්‍ය ඇමැතිවරයෙක් හැටියටත්, කැබිනට් ඇමැතිවරයෙක් හැටියටත්, විපක්ෂ නායකවරයා හැටියටත් මේ රටට විශාල සේවයක් ඉටු කර තිබෙනවා.
රක්ෂණ ශ්‍රියන්ත
