13
ජනතා විමුක්ති පෙරමුණට සම්බන්ධ අවි ගත් කණ්ඩායමක් දානයක් දෙන මුවාවෙන් එදා ශ්‍රී දළදා මැඳුරට පැමිණ සිදු කළ වෙඩි ප්‍රහාරවල සලකුණු තාමත් හේවිසි මණ්ඩපය අසල ගල් කණුවල ඇතැයි හිටපු දියවඩන නිලමේ නෙරංජන් විජයරත්න මහතා පවසයි.
හිටපු දියවඩන නිලමේවරයා මේ බව පැවැසුවේ මහනුවර මධ්‍යම වෙළෙඳපොළ ඉදිරිපිට පැවති සමගි ජන සන්ධානයේ ජන රැලියකදීය.
එහිදී වැඩිදුරටත් අදහස් දැක්වූ හිටපු දියවඩන නිලමේවරයා මෙලෙස ද කීවේය.
“ශ්‍රී දළදා වහන්සේ උදෙසා රාජරාජ මහාමාත්‍යාදීන් පූෂ්පෝපහාරයක් ලෙස පවත්වාගෙන ආ ඇසළ පෙරහර මංගල්‍යය කරන්න නොදුන් අය අද මේ රට පාලනය කරන්න බලය ඉල්ලනවා. දළදා වහන්සේට දානයක් පූජා කරනවා වගේ ඇවිත් මේ දේශපාලන ත්‍රස්තවාදී කණ්ඩායම එදා මාලිගාවට බෝම්බ ගහලා පොලිස් මුරපොළට පහර දුන්නා. 1989 ඇසළ පෙරහර මංගල්‍යය කරන්න දුන්නේ නෑ. ඒක කන්ද උඩරට ජනතාව දන්නවා. එදා මේ අවි ගත් කණ්ඩායම් කළ තර්ජන නිසා කුඹල් පෙරහර පහම දළදා මාලිගාව තුළට සීමා කරන්න සිද්ධ වුණා. සතර මහා දේවාල පෙරහර දේවාල පරිශ්‍රයට සීමා කළා. පෙරහරට සම්බන්ධ වෙන්න කලාකරුවන්ට එන්න දුන්නේ නෑ. එදා පෙරහර කරඬුව අරන් කුඹල් පෙරහර පහම දළදා මාලිගාවේ වැඩ සිටින මහලේ හේවිසි මණ්ඩලය ඇතුළේ තමයි කළේ. රන්දෝලි පෙරහර පහෙන් හතරක් කරන්න දුන්නේ නෑ. වාහල්කඩින් පහළට කරඬුව ගේන්න නොදුන්න පිරිසක් තමයි අද මේ රටේ පාලනය ඉල්ලන්නේ. එදා අන්තිම රන්දෝලි පෙරහර ආදාහන මළුව දක්වා ගිහින් එහි කරඬුව තැන්පත් කළේ ජනපතිවරයාගේ මූලිකත්වයෙන් මුළු නුවරම ආරක්ෂාව තර කරලයි.
සුදු ජාතිකයන් සමඟ 1815දී අත්සන් කළ උඩරට ගිවිසුමේ පස්වන වගන්තියේ තිබෙනවා, බුද්ධ ශාසනය ආරක්ෂා කරන්න ඕනෙ කියලා. 1972 සහ 78 ව්‍යවස්ථාවේ 09 වැනි වගන්තියේ බුද්ධ ශාසනය ආරක්ෂා කිරීම සහ පෝෂණය කිරීම රජයේ වගකීම කියලා තියෙනවා. ජනතා විමුක්ති පෙරමුණ ආවොත් ආගම්වලට නිසි තැන දෙන්නේ නෑ. අන්තර් ආගමික කමිටුවක් පත් කරන බව ඔවුන් කියනවා. මේ රටේ ජීවත්වන සියලු ජනතාව අදහන ආගම්වලට පහර වදිනවා. බුද්ධශාසන අමාත්‍යාංශය අහෝසි කරන්න ඉඩ තිබෙනවා. හින්දු, මුස්ලිම් සහ ක්‍රිස්තියානු කටයුතු දෙපාර්තමේන්තු නැති කරයි. පිරිවෙන්වලට දෙන අධාර පවා අහෝසි කිරීමේ අවදානමක් තිබෙනවා.”
අසේල කුරුළුවංශ
