10
එක්සත් ජාතික පාක්ෂිකයන් කලකිරී ඇති බවත්, ඒ හේතුවෙන් එක්සත් ජාතික පක්ෂයේ ප්‍රතිපත්ති තිබෙන කණ්ඩායම සහ නායකයා සිටින සමගි ජන බලවේගය සමඟ ඔවුන් එකතුවෙමින් සිටින බවත් පාර්ලිමේන්තු මන්ත්‍රී එස්. එම්. මරික්කාර් මහතා පැවසීය.
මන්ත්‍රීවරයා මේ බව පැවසුවේ සමගි ජන සන්ධාන කාර්යාලයේදී පෙරේදා (10) පැවති මාධ්‍ය හමුවට සහභාගි වූ අවස්ථාවේදීය.
එහිදී වැඩිදුරටත් අදහස් දැක්වූ මන්ත්‍රීවරයා මෙසේ ද පැවසීය.
“අද වන විට එක්සත් ජාතික පාක්ෂිකයන් කලකිරීමකට ලක්ව සිටිනවා. ඒ නිසා ඔවුන් එක්සත් ජාතික පක්ෂයේ ප්‍රතිපත්ති තිබෙන කණ්ඩායම සහ නායකයා සිටින සමගි ජන බලවේගය සමඟ එකතු වෙමින් සිටිනවා. රනිල් වික්‍රමසිංහ මහත්තයා පසුගිය දවසක ජන රැලියකදී ප්‍රකාශ කරනවා ඔහුත් ඡන්දය දෙන්න ඉන්නේ අනුර දිසානායකට කියලා. රනිල් වික්‍රමසිංහ එක්සත් ජාතික පාක්ෂිකයන්ට නොකියා කියන්නේ සජිත් ප්‍රේමදාස මහතාට ඡන්දය නොදී අනුර දිසානායකට ඡන්දය දෙන්න කියලා.
එක්සත් ජාතික පාක්ෂිකයන් කවදාවත් ජනතා විමුක්ති පෙරමුණට ඡන්දය දී නෑ. ජනතා විමුක්ති පෙරමුණ වෙනුවෙන් පෙනී ඉඳලත් නෑ. රනිල් සහ අනුර අතර තිබෙන දේශපාලන ගනුදෙනුව තේරුම්ගෙන රට ගොඩගැනීමට වැඩපිළි‍වෙළක් තිබෙන, කණ්ඩායමක් සිටින, නායකත්වයක් තිබෙන සමගි ජන බලවේගය සමඟ එකතු වෙන්න කියලා එක්සත් ජාතික පාක්ෂිකයන්ට ආරාධනා කරනවා.
ශ්‍රී ලංකාව ස්ථාවර රටක් බවට පත් කර, ජනතාව ශක්තිමත් කරන ආර්ථික වටපිටාවක්, සමාජ වටපිටාවක්, නිෂ්පාදනය දියුණු වන වටපිටාවක් රටේ නිර්මාණය කිරීමට හැකියාව තිබෙන්නේ සමගි ජන බලවේගයේ කණ්ඩායමට පමණයි. දැනට රුපියල් ලක්ෂයේ සිට තමයි උපයන විට ආදායම් බද්ද අය කරන්නේ. සජිත් ප්‍රේමදාස මහතාගේ නායකත්වයෙන් බිහි කරන රජයකින් එය එක්ලක්ෂ පනස්දහස දක්වා බදු සීමාව නිදහස් කරන්න කටයුතු කරනවා. සියයට 6 සිට සියයට 36 දක්වා ක්‍රියාත්මක වන බදු සූත්‍රය වෙනුවට සියයට 1 සිට සියයට 24 දක්වා රාජ්‍ය සේවකයන්ට සහ මධ්‍යම පන්තියට සහන ලැබෙන බදු සූත්‍රයක් නිර්මාණය කරනවා.
පසුගිය වසරේ රාජ්‍ය ආදායමට උපයන විට ආදායමෙන් බලාපොරොත්තු වුණේ රුපියල් බිලියන 100යි. නමුත් රජය රුපියල් බිලියන 144ක් පමණ එකතු කර තිබෙනවා. මේ වසරේ උපයන විට ආදායම හරහා රජය උපයන්න බලාපොරොත්තු වෙන්නේ රුපියල් බිලියන 200 ක්. උපයන විට ආදායම් බදු ගෙවන පිරිසට වැටුප ලබද්දී බදු ගෙවීමට සිදුවෙනවා වගේම භාණ්ඩ මිලදී ගැනීමේදීත් වැට් බදු ගෙවීමටත් සිදු වෙනවා. පොදු මහජනතාවට සහනයක් වන ආකාරයට සියයට 18 තිබෙන වැට් බද්ද සියයට 15 දක්වා අඩු කරන්න කටයුතු කරනවා.
රේගු ආදායම වැඩිපුර ලැබෙන්නේ වාහන ආනයනයෙන්. ඒ නිසා සමගි ජන සන්ධාන රජයකින් වාහන ආනයනය විවෘත කර ඒ හරහා ලැබෙන රේගු බදු ආදායම රටේ පොදු මහජනතාවට දෙන්න කටයුතු කරනවා. දරිද්‍රතා රේඛාවේ පහළම සිටින පිරිසගේ සමාජ ආරක්ෂණය වෙනුවෙන් රුපියල් 20,000ක දීමනාවක් සහ ගොවීන්ට කිලෝ 50 පොහොර මිටියක් රුපියල් 5000ට දීමට කටයුතු කරනවා.”
රක්ෂණ ශ්රියන්ත
