14
“අද වන විට මෙරට වාමවාදී ජාතික දේශපාලනයක් පිළිබඳ කතා කරන්න කඳවුරක් නෑ. අන්න ඒ හිඩැස පුරවන්න අපි සූදානම්. හැබැයි මමත් සාමාන්‍ය පවුලකින් බිහිවූ කෙනෙක්. මගේ තාත්තා රජයේ සේවකයෙක්. 80 ජූලි වර්ජකයෙක්. අම්මා පාසල් ගුරුවරියක්. ඒ නිසා අපට ගැළපෙන සාමාන්‍ය මිනිසුන්ගේ දේශපාලනය ගැන කවුරුත් කියාදෙන්න අවශ්‍ය නෑ. සෑම පවුලකටම මාසයකට අවම වශයෙන් ලක්ෂයක ආදායමක් ලැබෙන විදියේ වැඩ සැලැස්මක් ඇතිවයි අපි ජනාධිපතිවරණය ඉදිරිපත් වෙන්නෙ.” යැයි සර්ව ජන බලයේ ජනාධිපති අපේක්ෂක, නීතිඥ දිලිත් ජයවීර මහතා ප්‍රකාශ කළේය.
ඒ මහතා මෙසේ පැවැසුවේ අයගම සතිපොළ භූමියේ පසුගිය 09 වැනිදා පැවැත් වූ ජනාධිපතිවරණ ප්‍රචාරක රැලියක් අමතමිනි.
ශ්‍රී ලංකා කොමියුනිස්ට් පක්ෂයේ රත්නපුර දිස්ත්‍රික් ලේකම්, අයගම ප්‍රාදේශීය සභාවේ හිටපු සභාපති ජී. එම්. ජයසුන්දර මහතා ඇතුළු කොමියුනිස්ට් පක්ෂ සංවිධානයෙන් මේ රැස්වීම සංවිධාන කර තිබිණි.
එහිදී වැඩිදුරටත් අදහස් දැක්වූ ඒ මහතා මෙසේ ද ප්‍රකාශ කළේය.
“මමත් කලක සිටම ක්‍රියාකාරීව දේශපාලනය කරන අයෙක්. 1985දී තමයි උසස් පෙළ සමත් වුණේ. ඔබේ ප්‍රදේශයේ හිටපු දීප්තිමත් මන්ත්‍රීවරයකු වූ සරත් මුත්තෙට්ටුවේගම මහතා කොළඹදී දැන හඳුනාගත්තා. ඔහු තුළ තිබූ අව්‍යාජත්වය, නිර්භීත බව සහ නිවැරදි දෘෂ්ටියට අපි හැමදාම ආදරය කරනවා. ඔහුගේ ලකුණ වූයේත් තරුව. අපට ආලෝකය දෙන්නෙත් ඒ ලකුණම තමයි. මේ යුගයේ මන්ත්‍රීවරුන්, ප්‍රාදේශීය සභා සභාපතිවරුන්, උප සභාපතිවරුන්, ප්‍රාදේශීය සභා මන්ත්‍රීවරුන් විවිධ ලංසුවලට අලෙවි වෙනවා. ඒත් මේ වේදිකාවේ ඉන්න විමල්ලා, වලේබොඩලා, වීරසුමනලා එහෙම අලෙවි වුණේ නෑ. ඒ අයට ආත්ම ගරුත්වයක් තියෙනවා. ඒ අය දේශපාලනය කරන්නේ ප්‍රතිපත්තිය එක්ක, පොඩි මිනිහගේ දේශපාලනය තමයි.
මේ ජනාධිපතිවරණය තවත් ජනාධිපතිවරණයක් පමණක් නෙවෙයි. ඔන්න ඔහේ කාට හරි ඡන්දය දීලා දානවා කියලා හිතන්න එපා. මේ අහිංසක පොඩි මිනිසුන් බේරාගන්න ඕනෙ කියලා හිතාගෙන මේ පණිවිඩය ගම්වලට ගිහින් දැනුම්වත් කරන්න. තරුව ලකුණට ඡන්දය දෙන්න.
මේ දවස්වල ප්‍රතිපත්ති ප්‍රකාශන කිහිපයක් නිකුත් කර තියෙනවා. ඒවා බොහොම සාමාන්‍යයි. රනිල් කරන හැමදේම ඊට වඩා හොඳින් කරන්නත් කට්ටියක් සූදානම්. තව කට්ටියක් නිකුත් කර තියෙන එකේ සංස්කෘතියක් නෑලු. ඇත්ත නේන්නම් ඒ අයට සංස්කෘතියක් නෑ. ඒත් අපට රැකගත යුතු, දියුණු කර ගත යුතු සංස්කෘතියක් තියෙනවා. අප කාටත් වැරදීම් වෙනවා. හැබැයි ඒවා නිවැරදි කරගන්නත් පුළුවන්. 21 වැනිදාට ව්‍යවසායක රාජ්‍යයක් බිහි කර ගැනීමට තරුව ලකුණට ඡන්දය දෙන්න.”
හිටපු ඇමැති, පාර්ලිමේන්තු මන්ත්‍රී, ජාතික නිදහස් පෙරමුණේ නායක විමල් වීරවංශ මහතා
“අපේ දේශපාලකයන් බොහෝ දෙනකුට හිතුණ හිතුණ විදිහට කතා කරන්න පුළුවන් වෙලා. අපි හදපු ආණ්ඩුව වැරදි පෙන්වා දෙනකොට අපව ආණ්ඩුවෙන් එළියට දැම්මා. ඒ වෙනුවට එයාලට අවශ්‍ය අය ළං කර ගත්තා. මේ වේදිකාවේ ඉන්න අයට විතරයි අවංකව දේශපාලනය කතා කරන්න පුළුවන්. දුප්පතා තවදුරටත් හූරන් කාලා බදු වැඩි කරගෙන තම තමන්ගේ සුඛ විහරණය පමණක් කර ගන්නා දේශපාලනයට අපි කැමති නෑ. නොගැළපෙන කණ්ඩායම්වලට දීලා මේ රට තවත් බංගලිදේශයක් කරන්න එපා කියා මා ඉල්ලා සිටිනවා.”
ශ්‍රී ලංකා කොමියුනිස්ට් පක්ෂයේ නියෝජ්‍ය සභාපති, මාතර දිස්ත්‍රික් පාර්ලිමේන්තු මන්ත්‍රී වීරසුමන වීරසිංහ මහතා
“2020 මහ මැතිවරණයේදී තෝරාගත් පාර්ලිමේන්තුව තමයි තවමත් තියෙන්නේ. ඒත් එදා අපේ කණ්ඩායමට තෝරාගත් අයගෙන් වැඩි දෙනෙක් දැන් ඒ ආණ්ඩුවලින් පමණක් නෙමෙයි, කණ්ඩායමෙනුත් පිට ගිහින්. ඉතින් ජන නියෝජනයක් සිදු වෙනවාද? අයගම ජනතාව හැමදාම ප්‍රගතිශීලි තීන්දු ගන්නා අය. අපි තවමත් ඔබලා ඡන්දය දීපු අරමුණ වෙනුවෙන් පෙනී සිටිනවා. අයගම ඔබත් මුදලට විකිණෙන්නේ නැති නිසා 21 වැනිදා තරුව ලකුණ ජයග්‍රහණය කරවන්නැයි මා ඉල්ලා සිටිනවා.”
ශ්‍රී ලංකා කොමියුනිස්ට් පක්ෂයේ ප්‍රධාන ලේකම් ජී. වීරසිංහ, රත්නපුර දිස්ත්‍රක් පාර්ලිමේන්තු මන්ත්‍රී ගාමිණී වලේබොඩ, අයගම ප්‍රාදේශීය සභාවේ හිටපු සභාපති ජී. එම්. ජයසුන්දර සහ මංජුල සුසන්ත මහත්වරු ද මෙහිදී අදහස් දැක්වූහ.
කලවාන සමූහ – ඩබ්ලිව්. ඒ. සේනාරත්න
