43
බංග්ලාදේශයේ දෛනික විදුලි හිඟය මෙගාවොට් 2000 ඉක්මවා ඇතැයි ද, පැය 12කට අධික කාලයක් දෛනික විදුලි කප්පාදුවකට මුහුණදීමට සිදුවීමෙන් එරට නිෂ්පාදන ක්‍රියාවලියට සහ ජනතාවගේ දෛනික ජීවිතයට දැඩි බාධා එල්ල වී ඇතැයි ද විදෙස් මාධ්‍ය වාර්තා කළේය. පසුගිය දින කිහිපයේදී දිනකට මෙගාවොට් 1500ක පමණ විදුලි හිඟයකට මුහුණ දුන් බංග්ලාදේශයේ තත්ත්වය තවත් උත්සන්න වීම එරට ආර්ථිකයට දැඩි බලපෑමක් එල්ල කරනු ඇතැයි ද වාර්තා වේ. රාංග්පූර් නුවර පිහිටි බරපුකුරියා ගල් අඟුරු බලාගාරය පසුගියදා තාක්ෂණික ගැටලුවක් හේතුවෙන් වසා දැමීමට සිදුවීමෙන් තත්ත්වය තවත් බරපතළ වී ඇතැයි ද වාර්තා වේ.
එම බලාගාරයේ ටර්බයින ක්‍රියාත්මක කිරීමට විදත් හයිඩ්‍රොලික් පොම්ප දෙකක් අවශ්‍ය බවත්, මේ වනවිට එක් පොම්පයක් බිඳ වැටීමෙන් බලාගාරය දින තුනක් පුරා වසා දැමීමට සිදුවී ඇති බවත් එහි ප්‍රධාන ඉංජිනේරුවරයා ප්‍රකාශ කර ඇත. එහි අලුත්වැඩියා කටයුතු සිදු කරන තුරු එක් විදත් හයිඩ්‍රොලික් පොම්පයකින් පමණක් ටර්බයින ක්‍රියාත්මක කළ බවත්, එම පොම්පය ද බිඳ වැටීමෙන් බලාගාරය වසා දැමීමට සිදුවූ බවත් ඔහු වැඩිදුරටත් සඳහන් කර තිබේ. එරට දෛනික විදුලි ඉල්ලුම මෙගාවොට් 16,200ක් බවත්, මේ වන විට පවතින ආර්ථික අර්බුදය හේතුවෙන් සැපයුම්කරුවන්ගේ හිඟ මුදල් ගෙවීමට නොහැකිවීම මත දිනකට නිපදවනු ලබන්නේ මෙගාවොට් 13,900ක් පමණක් බවත් වැඩිදුරටත් වාර්තා වේ.
