1
ඡන්ද ව්‍යාපාරය අවසන් වේගෙන එන විට උඩින්ම සිටිනුයේ ජාතික ජන බලවේගය බවත්, ජාතික ජන බලවේගයේ ආණ්ඩුව, පවතින මජර දේශපාලනය අතුගා දමන බවත් එහි නායක සහ ජනාධිපති ධුර අපේක්ෂක අනුර කුමාර දිසානායක මහතා පැවසීය. ඔහු මේ බව ප්‍රකාශ කළේ ඊයේ (18) හිරියාල, මැල්සිරිපුර පැවති ‘රට අනුරට’ ජාතික ජන බලවේගයේ ජන රැලියක් අමතමිනි.
එහිදී වැඩිදුරටත් අදහස් දැක්වූ අනුර කුමාර දිසානායක මහතා මෙසේද පැවසීය:
“ඡන්ද ව්‍යාපාරය අවසන් වේගෙන එන විට අද උඩින්ම ඉන්නේ ජාතික ජන බලවේගයයි. මේ සිද්ධ වෙන්න යන්නේ සාමාන්‍ය දෙයක් නොවෙයි. දශක ගණනාවක් අපේ රට පාලනය කළ මේ පාලකයන් අපට අවසානයේ ඉතුරු කර තිබෙන්නේ හැම අතින්ම කඩාවැටුණු රටක්. ජනතාවගෙන් 68%කට පෝෂ්‍යදායි ආහාර වේලක් නෑ කියලා මහා බැංකු වාර්තාවෙම තිබෙනවා. හරිහමන් අධ්‍යාපනයක් නැති දරුවන්, සිහින කඩාවැටුණු තරුණයන්, හරිහමන් බෙහෙතක් හේතක් ගන්න බැරි හව්හරණක් නැති මවුපියන් ඉන්න රටක් බවට අපේ රට පත් වෙලා. නීතියක් නැති, විනයක් නැති, අපරාධවලින් ගහන රටක්, සියල්ල විනාශයට පත් වෙච්ච රටක් බවට අපේ රට පත් වෙලා තිබෙනවා. මේක තමයි අපි කියන 76 වසරක ශාපය. මේ 21 දා එළඹෙන්නේ අපේ රට අන්න ඒ ශාපයෙන් මුදාගන්නා දිනයයි.
“මීට කලින් ආණ්ඩු හැදුවේ මාධ්‍ය විසින්. ඔවුන් විසින් ගොතන ලද ප්‍රබන්ධ මඟින්. මාධ්‍ය විසින් ප්‍රබන්ධ නායකයන් හදනවා. මාධ්‍ය විසින් බිය, සැකය, අවලාද පතුරුවනවා. එහෙම කරලා තමයි මෙතෙක් ආණ්ඩු හැදුවේ. අද සමහර මාධ්‍යවලින් යම් තරමකට අපට සහයක් තිබෙනවා. හැබැයි ඊට එහා ගිය ජනතාවගේ ස්වයං ක්‍රියාකාරිත්වය මඟින් තමයි අපට ජයග්‍රහණය ගෙන දෙමින් සිටින්නේ. ඒ නිසා ශ්‍රී ලංකාවේ පළමු වතාවට මැර බලය, රාජ්‍ය බලය, ධන බලය, මාධ්‍ය බලය පරදමින් ජනතා බලය පෙරට පැමිණ තිබෙනවා.
“ජාතික ජන බලවේගයේ අරමුණ අපේ රටටත්, රටේ ජනතාවටත් යහපත් තත්ත්වයක් උදා කර දීමයි. මා කියන්නේ මේ උදාර කර්තව්‍යයේ කුඩා කොටසක් පමණයි. ඔබ සියලු දෙනා තමයි විශාලම කොටස. අසාධාරණයට, අයුක්තියට එරෙහිව මේ රටේ ජනතාව දිගු කාලයක් තිස්සේ සටන් කරමින් ඉන්නවා. ඒත් අපට ජයග්‍රහණය අත්පත් කරගන්න බැරි වුණා. අද අපට ජයග්‍රහණය කරන්න හැකියාව ලැබී තිබෙනවා. අපේ ජයග්‍රහණය පිළිබඳ කිසිදු සැකයක් තබාගන්න එපා. මෙවර අප ජයග්‍රහණය කරනවා නියතයි. මේ 21 උදා වන්නේ ජාතික ජන බලවේගය මේ රටේ ආණ්ඩු බලය ගැනීමේ ආරම්භයයි.
“අප පියවරෙන් පියවර මේ රට හදනවා. පළමුව දේශපාලනඥයන් ඒ සඳහා ආදර්ශය දිය යුතුයි. අපේ රටේ දේශපාලනය කිවුවේ බදාගැනීමට. එහෙම කළේ වෙන කිසිවක් කරලා නොවෙයි; භාණ්ඩාගාරයේ ධනය හොරකම් කරලා, මහජනතාවට ලැබිය යුතු ධනය හොරකම් කරලා. අපේ රට හදන්න නම් පළමුව මේ මජර දේශපාලනය රටින් අතුගාදැමිය යුතුයි. ජාතික ජන බලවේගයේ ආණ්ඩුව සහතික ලෙසම එය ඉටු කරනවා.
“පාර්ලිමේන්තුවට ගියාම අවුරුදු 5ටම දින 20යි සහභාගි වෙන්න ඕනෑ. ඊට පස්සේ ජීවිතාන්තය දක්වා විශ්‍රාම වැටුපක් හම්බ වෙනවා. අපේ ගොවි ජනතාව කොන්ද කුදු වෙලා, හම ඇකිළිලා, අවුරුදු 70ක් 75ක් වෙලත් අමාරුවෙන් කුඹුරු කොටනවා; විශ්‍රාම වැටුපක් නෑ. මේක සාධාරණද? ජාතික ජන බලවේගයේ ආණ්ඩුව මන්ත්‍රීවරුන්ගේ විශ්‍රාම වැටුප කපාහරිනවා. ජනතාවට නැති සියලු ප්‍රභූ වරප්‍රසාද අහෝසි කරනවා. ජනාධිපතිවරයාගේ සිට එය කරනවා. හිටපු ජනාධිපතිවරුන් ජනතා මුදලින් නඩත්තු කරන එක හා ඔවුන්ට දෙන වරප්‍රසාද කපාහරිනවා. සජිත් ප්‍රේමදාස මහතා අප කරන කියන හැම දෙයක්ම කොපි කරනවා. හැබැයි මේවා නම් කොපි කරන්නේ නැහැ. එයා කිවුවොත් මන්ත්‍රීවරුන්ගේ වාහන පර්මිට් අහෝසි කරනවා කියලා ඔක්කොම වේදිකාවෙන් බැහැලා යනවා.
“ජනතාවට, දේශපාලකයා කෙරෙහි විශ්වාසයක් ගෞරවයක් තිබෙන රටක් ජාතික ජන බලවේගයේ ආණ්ඩුවකින් අප හදනවා. ලෝකය දිනන්න පුළුවන් විදියට අප අපේ රටේ දරුවන්ගේ අධ්‍යාපනය සැලසුම් කරනවා. මේ විනාශයේ මුවදොරට රැගෙන ගිහින් තිබෙන රට, ජාතික ජන බලවේගයේ ආණ්ඩුව විසින් ඉන් මුදාගෙන දියුණුව කරා රැගෙන යන දිනය තමයි මේ විසිඑක. කිසි දැක්මක් නැති අපේ රටේ දේශපාලකයන් පැරණි ජාතිවාදි, ආගම්වාදි මඩ ගොහොරුව නැවත අවුස්සන්න පටන් අරගෙන තිබෙනවා.
“නුවර දළදා පෙරහර කියන්නේ අපේ රටේ සංස්කෘතික උරුමයක්; අපේ රටේ ජනතාවගේ ඓතිහාසික උරුමයක්; ජාතියේ උරුමයක්. ඒත් දේශපාලකයෝ කරන්නේ මොකක්ද? ඒවා ගේනවා ඡන්ද වේදිකාවට. අපි ආවාම පෙරහර නතර කරනවලු. හැබැයි කට්ටිය පෙරහරේ බලා ඉන්න, අපි ආපුවහම උසාවි යන්න; හිරගෙවල් ඇතුළට යන්න. ජාතික ජන බලවේගයේ ආණ්ඩුව ආපුවහම පන්සල්වලට දානය නැති වෙනවලු. දානෙ දෙන්නේ පක්ෂද? ආණ්ඩුද? ගැසට් ගහලද? ඒවා අපේ ශිෂ්ටාචාරයට අයිති දේවල්; ආගම පිළිබඳ ශ්‍රද්ධාව. සජබ වේදිකාවේ ඒවා දේශපාලන සටන් පාඨ බවට පත් කරගෙන. ඒවා ජාතික උරුමයන්. ජාතික කොඩිය පවා ඡන්ද වේදිකාවට ගේන්න ඕනෑ එකක් නොවෙයි. ඒවා රටේ ජාතික උරුමයන්. ඒවාට නිසි ගෞරවය අප දෙන්න ඕනෑ. ජාතික කොඩිය අයිති පක්ෂවලට නොවෙයි. සිංහල, දෙමළ, මුස්ලිම් අපි හැමෝටම අයිති ජාතික දෙයක්. ඒ ගොල්ලන් කියනවා අපි ආවාම ජාතික කොඩිය වෙනස් කරන්න යනවලු. සජබ වේදිකාවේ අද තිබෙන්නේ මඩ හා අවලාද පමණයි.
“අපේ ප්‍රතිපත්ති ප්‍රකාශනය අතේ තියාගෙන කියනවා අපේ පාලනයක් යටතේ අපි නිරාගමික රාජ්‍යයක් හදනවලු. එක හාමුදුරු නමක්, පොතේ නැති පට්ටපල් බොරු දෙසාබානවා. අපි ඒ පොඩි හාමුදුරුවන්ට නම් යැවුවා එන්තරවාසියක්. අපි කවදාවත් හාමුදුරුවන් වහන්සේලා සමඟ නඩු කියන්න කැමැති අය නොවෙයි. නමුත් මේ කැත වැඩය කොතනින් හෝ නතර විය යුතුයි. හිස්බුල්ලා මහතා එරාවුර්වලට ගිහිල්ලා ඒ වගේම බේගල් මුස්ලිම් ජනතාවට කියනවා. මුස්ලිම් ජනතාවගේ අවුරුද්දකට රාමසාන් සහ හජ්ජි කියලා ප්‍රධාන ආගමික උත්සව දෙකක් තිබෙනවා. අපි ආවාම එකක් කරනවාලු. මුස්ලිම් ජනතාව දවසකට පස්වතාවක් වන්දනා කරනවා. අපි බලයට ආවොත් ඒක නතර කරනවලු. අපිට වෙන වැඩ නැහැනෙ. අපි ආපුවහම මුස්ලිම් ජනතාවට රැවුල් වවන්න දෙන්නෙ නැතිලු. මම එරාවුර්වලටත් ගිහිල්ලා කිවුවා මමත් රැවුල වවාගෙන ඉන්නෙ කියලා!
“ජාතිය, ආගම වැනි දේවල් කිසි දිනෙක දේශපාලන වේදිකාවට ගත යුතු දේවල් නොවෙයි. ඒවා ජාතික උරුමයන්. අපේ ශිෂ්ටාචාරය. ඒවා දේශපාලනික සටන් පාඨ කරගත යුතු නැහැ. නමුත් සජබ මුළු වේදිකාවම අද ඒවා අතට අරගෙන. මේ රට ගොඩනඟන හැටි, ආර්ථිකය ගොඩනඟන හැටි, විදේශ සමග රාජ්‍යතාන්ත්‍රික සබඳතා ගොඩනඟන හැටි වැනි ගැඹුරු දේවල් සජිත් ප්‍රේමදාස මහතාට සාකච්ඡා කරන්න පුළුවන්ද? බැහැ. ඉස්කෝල ටික විදෙස් කෝටිපතියන්ට බාරදෙනවාලු. අන්තිමට සජිත් කියයි මුළු රටම විදේශවලට බාර දෙනවා කියලා. ඒ වගේ සිඟිති ආතල් කතා තමයි සජිත් මහතා කියන්නේ.
“මේ රට බේරාගන්න තමයි මාලිමාවේ ආණ්ඩුව එන්නේ. අපට විශ්වාසයි මේ රටේ ජනතාව මේ 21 දාට තියෙන ජනාධිපතිවරණයේදී ඡන්ද පෙට්ටි මාලිමාවේ ඡන්දවලින් පුරවනවා. දැන් නම් ජාතික ජන බලවේගයේ ජයග්‍රහණය කිසිවකුටත්, මොන දේ කළත් වළක්වන්න බැහැ. ඒක ඒ තරමටම සහතිකයි. අපේ ජයග්‍රහණයෙන් පස්සේ අපි ඔක්කෝම එකතු වෙලා මේ රට හදමු.”
ජාතික ජන බලවේගයේ ‘අදිටන’ සාමූහිකයේ රියර් අද්මිරාල් ෆ්‍රෙඩ් සෙනෙවිරත්න මහතා:
“දූෂිත දේශපාලන පක්ෂ තමන්ගේ රැස්වීම් සඳහා මහජනතාව එකතු කරගැනීමට අරක්කු කාලක්, බත් පැකට් එකක්, අතට මුදලක් දී රැලිවලට කැඳවාගන්නා පරිසරයක් තුළ කිසිම ප්‍රතිලාභයක් අපේක්ෂා නොකර මෙතනට රැස් වී සිටින දස දහස් සංඛ්‍යාත ඔබ දුටු විට මා තුළ විශාල ගෞරවයක් ඇති වනවා. ඔබ අපට ශක්තියක්. මගේ කතාවට ප්‍රථම ඔබට සුභ ආරංචියක් දැනුම් දීමට තිබෙනවා. මම අදිටන සමූහයේ ක්‍රියාකාරිකයකු ලෙස පසුගිය අවුරුදු එක හමාරක පමණ කාලය තුළ රට වටේම ඇවිද්දා. අපේ ව්‍යාපාරය වෙනුවෙන් අප ත්‍රිවිධ හමුදාවේ විශ්‍රාමිකයන් හමු වුණා. ඒ වගේම ඔවුන්ගේ පවුල්වල උදවිය සහ වටපිටාවේ මහජනතාව සමඟත් කතාබහ කළා. ඒ අනුව අපේ දේශපාලන ගණන් බැලීමට සහ ඒ ලද අත්දැකීම්වලට අනුව මේ වන විට ජාතික ජන බලවේගය දිනවීම සඳහා කෝටියකට ආසන්න ජනතාවක් පෙළගැසී සිටින බව මම නිර්භයවම ප්‍රකාශ කර සිටිනවා.
“ඔබේ ආසනයත් ජනාධිපතිවරණයේදී වැඩි ඡන්ද 30,000කට වඩා වැඩි ප්‍රමාණයකින් අපේ අනුර සහෝදරයා ජයග්‍රහණය කරන බව මා ස්ථිරවම ප්‍රකාශ කර සිටිනවා. එහෙම කියන්නේ මිනිසුන්ගේ සිතුම් පැතුම්වලින් මා උකහාගත් දේවල්වලින්. මා ඔබගෙන් ප්‍රශ්න කිහිපයක් අහනවා. ඒක නිසා මා සමඟ අමනාප වෙන්න එපා. පළමු ප්‍රශ්නය: ඔබලා මේ දවස්වල කන්නේ බොන්නේ කොහොමද? මේකට උත්තර දෙන්න බොහෝ අයට අපහසුයි කියලා මා දන්නවා. අම්මා තාත්තා නොකා හිටියත් දරුවට කන්න දෙන මවුපියන් ඉන්න රටක් මේක. මගේ දෙවැනි ප්‍රශ්නය: මෑතදී ඔබ අලුත් ඇඳුමක් පැලඳුමක් ගත්තාද? පවුලේ අයට එහෙම අරන් දුන්නාද? ඒකටත් දැන් ඔබේ හිතේ තිබෙන උත්තරය මම දන්නවා. මම ඊළඟට අහනවා: ඔබ කොපමණ කලකින් චිත්‍රපටයක් බැලුවාද? කියලා. පවුලේ අය සමග නාට්‍යයක් බලන්න ගියාද? ඒකට ඔබේ උත්තරයත් මම දන්නවා. ඔබ විනෝද ගමනක්, වන්දනා ගමනක් ගියාද? ඒ ගැන හිතන්නවත් පුළුවන්ද? අප කවුරුත් ආසයි පිටතට ගිහිල්ලා හෝ ගෙදරට ගෙන්නාගෙන විශේෂ කෑමක් බීමක් පරිභෝජනය කරන්න. ඒත් අද අපට එහෙම කරන්න පුළුවන්ද? මේවාට උත්තර ඔබේ හිත ඔබට කොඳුරා කියාවි. ඇයි අපට මෙහෙම වුණේ? මේකට මෙතෙක් මේ රට පාලනය කළ දේශපාලනඥයන් මෙන්ම මහජනතාව හැටියට අපත් වගකිව යුතු නොවේද?
“නැවතත් මේ පාලකයන්ම පත් වුණොත් මේ රටට කුමක් වේවිද? හැබැයි හොඳ වෙලාවට මේ සැරේ එහෙම වෙන්නේ නැහැ. මේ සැරේ ඒ ඔක්කෝම ගෙදර. මේ 21 දායින් පසු ජාතික ජන බලවේගයේ රජයක් මේ රට තුළ ගොඩනඟනවා නියතයි. ඒ සඳහා අපට තිබෙන සහතිකය කුමක්ද? ඒ තමයි ජාතික ජන බලවේගයේ නායකයාගේ සිට පහළම සාමාජිකයා දක්වා තිබෙන දේශපාලන භාවිතය. ඔවුන්ට නිවැරදි දැක්මක් තිබෙනවා රට හදන්න. ඔවුන්ට හොඳ කණ්ඩායමක් ඉන්නවා. අවසාන වශයෙන් අප ඔබට එකක් කියනවා. මේ 21 දා අපේ අනුර සහෝදරයා ස්ථිර ලෙසම ජනාධිපති වෙනවා. ඊළඟට එන මහ මැතිවරණයත් අප දිනනවා. ඒ වගේම මේ රට ඉතිහාසයේ ප්‍රථම වතාවට නව පුනරුද යුගයකට පා තබනවා.”
මේ අවස්ථාවට ජාතික ජන බලවේගයේ නායකයන්, මහා සංඝ රත්නය ඇතුළු පාක්ෂිකයෝ විශාල පිරිසක් සහභාගි වී සිටියහ.
ඡායාරූප – සුදත් නිෂාන්ත
උපාලි කරුණාරත්න
