4
දකුණු අප්‍රිකා ‘ඒ’ කණ්ඩායම සමඟ බිනෝනිහිදී පැවැත්වෙන දෙවැනි නිල නොවන සිව්දින ටෙස්ට් ක්‍රිකට් තරගය කඩුලු 5කින් ජය ගැනීමට ශ්‍රී ලංකා ‘ඒ’ කණ්ඩායම සමත් විය.
මේ සමඟ තරග දෙකකින් සමන්විත නිල නොවන සිව්දින තරගාවලිය 2-0ක් ලෙස ජය ගැනීමට ශ්‍රී ලංකා පිල සමත් වූ අතර, දෙපිල අතර එක්දින තරගාවලිය 2-1ක් ලෙස ජය ගත්තේ ශ්‍රී ලංකාවයි.
තරගයේ අවසන් දිනය වූ ඊයේ ජයග්‍රහණය සඳහා හිමි වූ ලකුණු 254ක ඉලක්කය හඹාගිය ශ්‍රී ලංකා පිල කඩුලු 5ක් දැවී තිබියදී ජය තහවුරු කර ගැනීමට සමත් විය.
තරගයේ අවසන් දිනය වූ බැවින් ශ්‍රී ලංකාවට වේගයෙන් ඉලක්කය හඹා යෑමට සිදු වූ අතර, මුල් කඩුලු 3 ලකුණු 63ක් තුළ බිඳ දැමීමට දකුණු අප්‍රිකා පන්දු යවන්නෝ සමත් වූහ. එහෙත් සිව්වැනි කඩුල්ලට පිටියේ එක් වූ නායක පසිඳු සූරියබණ්ඩාර සහ පවන් රත්නායක ලකුණු 136ක සබඳතාවක් පිහිටුවමින් ජයග්‍රහණයේ අඩිතාලම දැමූහ. පසිඳු පන්දු 67කදී හතරේ පහර 6ක් සමඟ ලකුණු 52ක් රැස් කර සිටියදී දැවී යෑමෙන් එම සබඳතාව නිමා වුවද වේගවත් පිතිහරඹයක නිරත වූ පවන් ශතකයක් රැස් කරමින් ශ්‍රී ලංකා ජය තහවුරු කළේය.
පන්දු 61කින් සිය ශතකය සම්පූර්ණ කරගත් පවන් නොදැවී ලකුණු 116ක් රැස් කළේ පන්දු 67කදී හතරේ පහර 11ක් සහ හයේ පහර 7ක් සමඟිනි.
ලකුණු 15ක පළමු ඉනිමේ වාසියක් සමඟ පෙරේදා සිය දෙවැනි ඉනිම ඇරඹූ දකුණු අප්‍රිකා ‘ඒ’ පිල කඩුලු 9ක් දැවී තිබියදී ඉනිම අත්හිටුවන විට ලකුණු 238ක් රැස් කර තිබිණි. ඒ අනුව ශ්‍රී ලංකාවට ලකුණු 254ක ජයග්‍රාහී ඉලක්කය හිමි විය. මේ තරගයේ පළමුව පන්දුවට පහරදුන් දකුණු අප්‍රිකා ‘ඒ’ පිල පළමු ඉනිමට ලකුණු 334ක් රැස් කළ අතර, ශ්‍රී ලංකා ‘ඒ’ පිලට රැස් කළ හැකි වූයේ ලකුණු 319ක් පමණි.
තරගයේ තෙවැනි දිනය (පෙරේදා) නිමා වන විට කඩුලු 3ක් දැවී ලකුණු 112ක් රැස් කර සිටි දකුණු අප්‍රිකා ‘ඒ’ පිල ඊයේ තවත් කඩුලු 6ක් දැවී ලකුණු 126ක් එක් කර ගත්තේය. ලකුණු 45ක් රැස් කර සිටි ජීන් ඩු ප්ලෙසිස් තවත් ලකුණු 3ක් රැස් කිරීමෙන් පසු දිනයේ පළමු කඩුල්ල ලෙස දැවී ගිය අතර, ඩෙවල්ඩ් බ්‍රෙවර්ස් සිය ඉනිම ලකුණු 74 දක්වා ඉදිරියට ගෙන ගියේය. ඉනිමේ වැඩිම ලකුණුලාභියා වූ ඔහු පන්දු 75කදි හතරේ පහර 5ක් සහ හයේ පහර 4ක් එල්ල කර තිබිණි. සෙසු පිතිකරුවන්ට ලකුණු 20 සීමාවට පිවිසීමට ශ්‍රී ලංකා පන්දු යවන්නන්ගෙන් අවස්ථාවක් නොලැබිණි. පන්දු යැවීමේදී ඉසිත විජේසුන්දර, මොහොමඩ් ශිරාස් සහ ඒෂාන් මාලිංග කඩුලු 2 බැගින් දවා ගත්හ.
දකුණු අප්‍රිකා ‘ඒ’ පළමු ඉනිම – 334 (ඕවර 92.1) නීල් බ්‍රෑන්ඩ් 129, ඩෙවල්ඩ් බ්‍රෙවිස් 49, මාර්කස් ඇකර්මන් 37 (සොනාල් දිනූෂ 48/3, ඒෂාන් මාලිංග 68/3, ඉසිත විජේසුන්දර 60/2) සහ දෙවැනි ඉනිම – 238/9 (ඕවර 51.2) ඉනිම අත්හිටුවන ලදි. ඩෙවල්ඩ් බ්‍රෙවර්ස් 74, ජීන් ඩු ප්ලෙසිස් 48 (ඉසිත විජේසුන්දර 23/2, මොහොමඩ් ශිරාස් 43/2, ඒෂාන් මාලිංග 55/2)
ශ්‍රී ලංකා ‘ඒ’ පළමු ඉනිම – 319 (ඕවර 91) ළහිරු උදාර 129, පසිඳු සූරියබණ්ඩාර 92 (ප්‍රෙනෙලන් සුබ්‍රයින් 64/6, නීල් බ්‍රෑන්ඩ් 45/2) සහ දෙවැනි ඉනිම – 254/5 (ඕවර 41.3) පවන් රත්නායක නොදැවී 116, පසිඳු සූරියබණ්ඩාර 52 (ප්‍රෙනෙලන් සුබ්‍රයින් 108/3, බේයර්ස් ස්වැන්පෝල් 30/2)
