15
ජාතික රග්බි කණ්ඩායමේ ප්‍රධාන පුහුණුකරු ලෙස ස්වේච්ඡාවෙන් කටයුතු කිරීමට අයදුම්පත් යොමු කරන්නැයි ක්‍රීඩා සංවර්ධන දෙපාර්තමේන්තුව විසින් මෙරට සුදුසුකම් ලත් රග්බි පුහුණුකරුවන්ට කළ දැනුම්දීමට අනුව ජාතික රග්බි පිලේ හිටපු පුහුණුකරුවකු වන නිල්ෆර් ඉබ්‍රාහිම් මහතා ඉදිරිපත් වී ඇතැයි ආරංචි මාර්ග සඳහන් කළේය.
2014 වසරේදී ඉතිහාසයේ පළමු වතාවට ශ්‍රී ලංකා රග්බි පිල ආසියාවේ තුන්වැනි ස්ථානය දක්වා රැගෙන යෑමට සමත්වූ නිල්ෆර් ඉබ්‍රාහිම් පසුව එවකට රග්බි ආයතනයේ පරිපාලනයේ ‘කැපිල්ලට’ හසුවූ අතර, ඔහු මෙවර ප්‍රධාන පුහුණුකරු ලෙස ස්වේච්ඡාවෙන් කටයුතු කිරීමට ඉදිරිපත් වීම කැපී පෙනෙන සිදුවීමකි.
මහනුවර කිංග්ස්වුඩ් විදුහලෙන් රග්බි ක්‍රීඩාවට එක්වී 1998 සිට 2006 දක්වා ජාතික කණ්ඩායම නියෝජනය කළ නිල්ෆර් ඉබ්‍රාහිම් වසර 2011 සිට 2018 දක්වා වසර අටක කාලය තුළ පාසල් පුහුණුකරුවකු ලෙස මෙරට ප්‍රධානතම පාසල් කණ්ඩායම් 3ක් සභාපති කුසලාන පිළිමලුන් පිටුදැකීමේ පාසල් රග්බි තරගාවලියේ අවසන් තරගයට රැගෙන යෑමට ක්‍රීඩකයන් මෙහෙයවූ අතර, ඉන් වසර 4ක්ම කුසලානය දිනා ගැනීමට එම විදුහල් සමත් විය.
2014දී ඉසිපතන විදුහල් පිල ලීග්, පිළිමලුන් පිටුදැකීමේ සහ සත් සාමාජික රග්බි ශූරතා ත්‍රිත්වයත්, 2016දී ලීග් සහ පිළිමලුන් පිටුදැකීමේ ශූරතා ද්විත්වයත්, 2017 වසරේදී සාන්ත ජෝසප් විදුහල් පිල ඉතිහාසයේ පළමු වතාවට පිළිමලුන් පිටුදැකීමේ රග්බි ශූරතාවත් දිනා ගනු ලැබුවේ නිල්ෆර්ගේ පුහුණුකාරීත්වය යටතේය.
15 සාමාජික සහ සත් සාමාජික රග්බි මුහුණුවර ද්විත්වයේම දෙවැනි මට්ටමේ සහතිකලත් පුහුණුකරුවකු වන නිල්ෆර් ඉබ්‍රාහිම් වසර 2022 සිට පොලිස් ක්‍රීඩා සමාජයේ ප්‍රධාන පුහුණුකරු ලෙස කටයුතු කරන අතර, වසර 33කට පසු පොලිස් ක්‍රීඩා සමාජයට පිළිමලුන් පිටුදැකීමේ රග්බි ශූරතාවත්, වසර 35කට පසු සත් සාමාජික රග්බි ශූරතාවත් අත්කර ගැනීමට විශිෂ්ට දායකත්වයක් ලබා දුන්නේය.
ශ්‍රී ලංකා රග්බි කණ්ඩායමට ස්වේච්ඡාවෙන් කටයුතු කිරීමට පුහුණු කාර්ය මණ්ඩලයක් ඉල්ලා නිවේදනය කර ඇත්තේ වසර 2025 දී ආසියානු සත් සාමාජික රග්බි තරගමාලාවට ඇතුළත් වීම සඳහා නේපාලයේ පැවැත්වෙන සුදුසුකම් ලැබීමේ තරගාවලියට සහභාගි වීමටය. ඒ සඳහා සහභාගි වන ලෙස ආසියානු රග්බි සංගමයෙන් ඇරයුම් ලැබී ඇතැයි වාර්තා වේ.
ෆවුස් මොහොමඩ්
