2
ශිෂ්‍ය විරෝධතා අතරතුර බන්ධනාගාරවලින් පලාගිය නමගිය අපරාධකරුවන් 900ක් පමණ තවමත් නිදැල්ලේ පසුවන බව බංග්ලාදේශයේ මාධ්‍ය වාර්තා කළේය. අපරාධ නඩුවලින් මරණ දඬුවම් සහ ජීවිතාන්තය දක්වා සිර දඬුවම් නියම වී සිටි දරුණු අපරාධකරුවන් රැසක් ඒ අතර සිටින බව ද එරට මාධ්‍ය වැඩිදුරටත් වාර්තා කළේය.
ශෙයික් හසීනා අගමැතිධුරයෙන් ඉවත්වී රටින් පිටවීමෙන් පසු අවාමි ලීග් රජයේ පාලනය බිඳ වැටෙද්දී එරට බන්ධනාගාර 17ක ප්‍රචණ්ඩකාරී සිදුවීම් ආරම්භ වී තිබූ අතර, එහිදී රැඳවියන් දෙදහසක් පලාගිය බවත්, ඉන් 1100ක් පමණ නැවත අත්අඩංගුවට ගැනීමට හැකිවූ බවත් බංග්ලාදේශයේ බන්ධනාගාර මූලස්ථානය ප්‍රකාශ කළේය.
අතුරුදන්වී සිටින සෙසු සිරකරුවන් අත්අඩංගුවට ගැනීම සඳහා හමුදා මෙහෙයුම් අඛණ්ඩව ක්‍රියාත්මක වුවද මේ වනවිටත් එය සාර්ථක වී නැති බවත් බංග්ලාදේශ මාධ්‍ය සඳහන් කළේය.
බන්ධනාගාර තුළ සිදුවූ ප්‍රචණ්ඩ ක්‍රියා අතරතුර එහි සිටි නියාමකවරුන් 282 දෙනකුට තුවාල සිදු කර තිබූ අතර, ඉන් කිහිපදෙනකු තවමත් රෝහල්ගතව ප්‍රතිකාර ගනිමින් සිටින බව ද වාර්තා වේ. රැඳවියන් බන්ධනාගාරවලින් පලායද්දී ගිනි අවි 94ක් රැගෙන ගොස් තිබූ අතර, ඉන් 65ක් පසුව හමුදාව විසින් සොයා ගනු ලැබූ බව එරට මාධ්‍ය වාර්තා කළේය.
පසුගියදා බන්ධනාගාර මූලස්ථානයේ පැවැති මාධ්‍ය හමුවේදී බන්ධනාගාර කොමසාරිස් බ්‍රිගේඩියර් ජෙනරාල් සයිඩ් හොසේන් වැඩිදුරටත් ප්‍රකාශ කර ඇත්තේ අතුරුදන්වී සිටින රැඳවියන් අත්අඩංගුවට ගැනීම සඳහා මහජන සහාය අපේක්ෂා කරන බවය.
