23
ජංගම දුරකතන හා ලැප්ටොප් පරිගණකත් පිපිරිලා
මියගිය ගණන 25යි: තවත් 600කට තුවාල
නිවාස-ගොඩනැඟිලි සහ මෝටර් රථවලටත් හානි
පිපිරීමට ලක්වූයේ වසර 10කට පෙර නිෂ්පාදනය අත්හිටවූ වෝකි ටෝකි
ලෙබනනයේ පේජර් පණිවිඩ යන්ත්‍ර පිපිරීමේ සිදුවීමෙන් දිනක් ගතවීමටත් පෙර හෙස්බුල්ලා සංවිධානයේ සාමාජිකයන් සතු වෝකි ටෝකී යන්ත්‍ර විශාල ප්‍රමාණයක් එකවර පිපිරී යෑමෙන් හෙස්බුල්ලා සාමාජිකයන් ඇතුළු පුද්ගලයන් 25 දෙනකු ජීවිතක්ෂයට පත්වී ඇතැයි විදෙස් මාධ්‍ය වාර්තා කළේය. දකුණු ලෙබනනයේ පෙරේදා පස්වරුවේ සිදුවූ එම වෝකි ටෝකී පණිවිඩ යන්ත්‍ර පිපිරීමෙන් 708 දෙනකු තුවාල ලබා ඇතැයි ද විදෙස් මාධ්‍ය වැඩිදුරටත් වාර්තා කළේය.
පසුගියදා සිදුවූ පේජර් යන්ත්‍ර පිපිරීමෙන් මියගිය පිරිසගේ අවසන් කටයුතු සිදුවෙමින් පැවැති ස්ථානවල අධික ජනතාවක් එක්රැස්ව සිටි බවත්, වෝකි ටොකී යන්ත්‍ර පිපිරීමෙන් වැඩිදෙනකු මිය යෑමට සහ තුවාල ලැබීමට එය හේතු වී ඇති බවත් විදෙස් මාධ්‍ය සඳහන් කළේය. එම සිදුවීම් ද්විත්වය හේතුවෙන් මියගිය පිරිස 37ක් බවත්, තුවාල ලැබූ පිරිස තුන්දහසකට අධික බවත් ලෙබනනයේ සෞඛ්‍ය අමාත්‍යාංශය සඳහන් කර ඇතැයි වාර්තා වේ. වෝකි ටෝකී පණිවිඩ පද්ධති පිපිරීම පේජර් යන්ත්‍ර පිපිරීමේ සිදුවීමට වඩා බරපතළ වූ බවත්, එම පිපිරීම්වලින් නිවාස, ගොඩනැඟිලි සහ මෝටර් රථ විශාල ප්‍රමාණයක්ද ගිනිගෙන විනාශ වූ බවත් වැඩිදුරටත් වාර්තා වේ. විනාශය බරපතළ වී ඇත්තේ වෝකි ටෝකී යන්ත්‍ර පමණක් නොව මෝටර් රථවල රේඩියෝ, ලැප්ටොප් පරිගණක සහ ජංගම දුරකතන රැසක් ද පිපිරීමට ලක්වීම හේතුවෙන් බව ලෙබනනයේ මාධ්‍ය වාර්තා කළේය.
පිපිරීමට ලක්වී ඇත්තේ ජපානයේ නිෂ්පාදිත වෝකි ටෝකි පණිවිඩ යන්ත්‍ර තොගයක් බව වාර්තා වුවද, එම වර්ගයේ වෝකි ටෝකී යන්ත්‍ර නිපදවීම වසර 10කට පෙර අත්හිටවූ බව ජපාන නිෂ්පාදන සමාගම නිවේදනය කර ඇතැයි ද වාර්තා වේ.
එම සිදුවීම් ද්විත්වයම ඊශ්‍රායලයේ අවශ්‍යතාව මත මොසාඩ් ඔත්තු සේවය විසින් සිදු කළ බවට හෙස්බුල්ලා සංවිධානය සහ ලෙබනන් රජය චෝදනා කර ඇති අතර, එම චෝදනාවලට ඊශ්‍රායලය මෙතෙක් ප්‍රතිචාර දක්වා නැති බවත් වාර්තා වේ. එසේ වුවද ඊශ්‍රායලය ගාසා යුද්ධය නව අදියරක් ආරම්භ කළ බවට එරට ආරක්ෂක ඇමැති යෝව් ගැලන්ට් නිවේදනයක් නිකුත් කරමින් ප්‍රකාශ කර ඇතැයි විදෙස් මාධ්‍ය සඳහන් කළේය.
එම ප්‍රහාර ද්විත්වය පිළිබඳ ලෙබනනයේ ඉල්ලීම පරිදි එක්සත් ජාතීන්ගේ ආරක්ෂක මණ්ඩලයේ හදිසි රැස්වීමක් කැඳවා ඇති අතර, කලාපයේ වත්මන් ආරක්ෂක තත්ත්වය පිළිබඳ එහිදී සාකච්ඡා කරනු ඇතැයි විදෙස් මාධ්‍ය වාර්තා කළේය.
මේ අතර වහාම ක්‍රියාත්මක වන පරිදි පේජර් හෝ වෝකි ටෝකී යන්ත්‍ර රැගෙන යෑම ලෙබනනයේ සියලු ගුවන් මගීන්ට තහනම් කිරීමට එරට සිවිල් ගුවන් සේවා අධ්‍යක්ෂවරයා පියවර ගෙන ඇත. හෙස්බුල්ලා සංවිධානයට එල්ල වූ අනපේක්ෂිත ප්‍රහාරමාලාවෙන් එම සංවිධානයේ සාමාජිකයන් අතර සන්නිවේදනය මුළුමනින්ම බිඳ වැටී ඇති අතර, ඊයේ පස්වරුවේ එම සංවිධානයේ නායක හසන් නස්රල්ලා එම ප්‍රහාර සම්බන්ධව විශේෂ ප්‍රකාශයක් සිදු කිරීමට නියමිතව සිටි බව ද වාර්තා වේ.
