24
ප්‍රමාණවත් යටිතල පහසුකම් සැපයීමට රජය අසමත් වීම හේතුවෙන් පාකිස්තානයේ බලුකිස්තාන ප්‍රාන්තයේ දිස්ත්‍රික්ක 35ක පාසල් 3694ක් වසා දමා ඇතැයි එරට මාධ්‍ය වාර්තා කළේය. එම ප්‍රාන්තයේ දිස්ත්‍රික්කවල පාසල් රැසක විදුලිය, සනීපාරක්ෂක පහසුකම්, තාප්ප වැනි මූලික පහසුකම් පවා නැති බවත්, ගුරු හිඟය දැඩි ලෙස බලපා ඇති බවත් එරට මාධ්‍ය වැඩිදුරටත් වාර්තා කළේය.
මේ වන විට පාකිස්තානයේ පවතින දැඩි ආර්ථික අර්බුදය හේතුවෙන් මධ්‍යම රජයෙන් ප්‍රාන්තවලට සපයනු ලබන ප්‍රතිපාදන සීමා කර ඇතැයි ද, එරට ප්‍රාන්ත අතුරින් ගැටලු රැසක් ඇති බලුකිස්තාන ප්‍රාන්තයට එය දැඩි ලෙස බලපෑම් එල්ල කර ඇතැයි ද විදෙස් මාධ්‍ය සඳහන් කළේය.
වසර ගණනාවක් පුරා පාකිස්තානයේ සාක්ෂරතාව දුර්වල මට්ටමක පවතින බවත්, ආර්ථික අර්බුදය හේතුවෙන් පාසල් අධ්‍යාපනයට ප්‍රමාණවත් යටිතල පහසුකම් නොලැබීමෙන් එම තත්ත්වය තවත් ඉහළ යනු ඇති බවත් පාකිස්තානයේ විද්වතුන් ප්‍රකාශ කර ඇතැයි ද වාර්තා වේ.
