33
ජාතික ඔලිම්පික් කමිටු මහලේකම් මැක්ස්වෙල් ද සිල්වා මහතා හා සභාපති සුරේෂ් සුබ්‍රමනියම් මහතා අතර මතුව තිබෙන ගැටුම්කාරී තත්ත්වය හමුවේ ඔලිම්පික් කමිටුව විසුරුවා ඉක්මන් නිලවරණයක් ඉල්ලා සිටීමට ජාතික ක්‍රීඩා සංගම් කිහිපයක් මේ දිනවල ලිපියක් සකස් කරමින් පවතී. මෙලෙස හදිසි නිලවරණයක් ඉල්ලා සිටීමට කටයුතු කරමින් සිටින්නේ මහලේකම් මැක්ස්වෙල් ද සිල්වා මහතාට හිතවත් ක්‍රීඩා සංගම් නිලධාරීන් පිරිසක් බව වාර්තා වේ.
ශ්‍රී ලංකා ඔලිම්පික් කමිටුවේ සාමාජික සංගම් 33ක් ඇති අතර, එයින් සංගම් 11ක අත්සන් සහිත ඉල්ලීමක් ඇත්නම් ඔලිම්පික් කමිටුව විසුරුවා ඉක්මන් නිලවරණයක් පැවැත්වීමේ හැකියාව ඇත. එම ඉල්ලීම විධායක සභාවේ අනුමැතිය අනුව ක්‍රියාත්මක කිරීමේ හැකියාව ඔලිම්පික් කමිටුවට ව්‍යවස්ථාවෙන් ලැබී ඇත. ශ්‍රී ලංකා ඔලිම්පික් කමිටුවේ මහලේකම් – සභාපති ගැටුමෙන් ක්‍රීඩාවට යහපතක් නැති බවත්, මෙය තනතුරු ලබා ගැනීමේ පොරයක් බවත් ඔලිම්පික් කමිටුවේ සාමාජික සංගම් ප්‍රධානීන් කිහිපදෙනකුගේ මතය වී ඇත.
එලෙස ඔලිම්පික් කමිටුව විසුරුවා ඉක්මන් නිලවරණයක් පැවත්වීමට කටයුතු කළහොත්, වත්මන් සභාපති සුරේෂ් සුබ්‍රමනියම් මහතාට යළි සභාපති තනතුරට ක්‍රීඩා රෙගුලාසි අනුව නාමයෝජනා ලබාදිය නොහැකිය. ඒ මහතා අවස්ථා දෙකකදී සභාපති ලෙස කටයුතු කර ඇති බැවින් යළි එම තනතුරට නාමයෝජනා ලබාදීමේ නීතිමය බාධා මතුව තිබේ. එහෙත් ක්‍රීඩා රෙගුලාසි අනුව ජාතික ඔලිම්පික් කමිටු මහලේකම් මැක්ස්වෙල් ද සිල්වා මහතාට සභාපති තනතුර වෙනුවෙන් නාමයෝජනා ඉදිරිපත් කිරීමේ හැකියාව පවතී. මෙවැනි වටපිටාවක් නිර්මාණය වී තිබියදී මහ ලේකම් – සභාපති අතර ආරවුල් හට ගැනීම ජාතික ඔලිම්පික් කමිටුවේ ඉදිරි කටයුතුවලට බාධාවක් බව ක්‍රීඩා සංගම් ප්‍රධානීහූ පවසති.
මේ අතර ජාතික ඔලිම්පික් කමිටු සභාපති සුරේෂ් සුබ්‍රමනියම් මහතා විසින් රුපියල් කෝටි 50ක වන්දියක් ඉල්ලා ජාතික ඔලිම්පික් කමිටු මහලේකම් මැක්ස්වෙල් ද සිල්වා මහතා වෙත කොළඹ දිසා අධිකරණයේ නඩුවක් ගොනු කිරීමට පියවර ගෙන ඇත. ඔලිම්පික් විධායක සභාවේ සාකච්ඡා කරන ලද කරුණු කිහිපයක් ඊමේල් පණිවිඩයක් මඟින් අනෙකුත් විධායක සභිකයින්ට මහලේකම් මැක්ස්වෙල් ද සිල්වා මහතා විසින් යොමු කර ඇති අතර, එමඟින් තමන්ගේ කීර්තිනාමයට හානියක් සිදුවූවේ යැයි සඳහන් කරමින් ඔලිම්පික් කමිටු සභාපතිවරයා මෙම නඩුව පවරා තිබේ.
වසර 2018දී ජාතික ඔලිම්පික් කමිටු සභාපති ලෙස පත්වූ සුබ්‍රමනියම් මහතා යළි 2021දී නැවතත් තේරී පත්වූ අතර, වත්මන් තත්ත්වය අනුව ජාතික ඔලිම්පික් කමිටු පරිපාලනය බෙදී වෙන්වී ඇත.
ප්‍රින්ස් ගුණසේකර
