9
වත්මන් ආණ්ඩුව තදාසන්න ප්‍රදේශවල තිබූ මාර්ග බාධා ඉවත් කර, හමුදා කඳවුරු ඉවත් කර සංදර්ශන පෙන්නුව ද අද අධිකරණයට පැමිණ සාක්ෂිකරුවන්, වින්දිතයන් ඝාතනය කරන තත්ත්වයට ආරක්ෂාව නැති වී ඇතැයි හිටපු පාර්ලිමේන්තු මන්ත්‍රී ඉන්දික අනුරුද්ධ මහතා පැවසීය.
ඒ මහතා මේ බව පැවසුවේ ශ්‍රී ලංකා පොදුජන පෙරමුණ පක්ෂ මූලස්ථානයේ ඊයේ (19) පැවති මාධ්‍ය හමුවකට සහභාගි වෙමිනි.
එහිදී ඒ මහතා මෙසේ ද කීවේය.
“මේ රජය ගෙනාපු අය-වැය තුළ ජනතාවට ලැබෙන්නේ මොනවා ද කියලා පරීක්ෂා කරමින් සිටින වේලාවක්. රජය පත්වෙද්දි අපි කිව්ව දෙයක් තමයි මේ රජය ජනතාවට බලාපොරොත්තු විශාල ප්‍රමාණයක් දුන්නා.
බලාපොරොත්තුවලට නොදෙවෙනි අය-වැයක් අද ඉදිරිපත් කරලා තිබෙනවා. බලාපොරොත්තු දුන් ඒවා ඉටුවීත් නොමැති බව මේ අයවැය තුළ අපිට පේන්න තිබෙනවා. ඉටුකරන්න පුළුවන් තත්ත්වයේ දේවල් තියෙයි ද? නොතියෙයි ද කියන තර්කයේ අද සමාජයට ඇවිත් තිබෙනවා.
අද වෙද්දි රටේ ආරක්ෂාවට කුමක්ද සිදු වෙලා තිබෙන්නේ? ඒ නිසා මේ අය-වැය තුළ ආරක්ෂක වියදම් පැතිකඩයටත් සැලකිය යුතු දායකත්වයක් ලබා දීලා නැහැ. අද උදේ පාන්දර වෙද්දි ආරංචි වෙන්නේ කොහේ හෝ තැනක වෙඩි තැබීමක්, ජීවිත විනාශයක් වැනි පාතාලයේ හිස එසවීමක් වැනි තැනට අද ඇවිත් තිබෙනවා.
අධිකරණ භූමිය ඇතුළට ගිහින් අධිකරණයට ගෙන එන වැරදිකරුවන් හෝ සාක්ෂිකරුවන් ඝාතනය කරන තැනට අද පාතාලය හිස ඔසවලා තිබෙනවා. ඒවගේම අද ආරක්ෂාව ලබාදෙන්න ආණ්ඩුවට බැරි වෙලා තිබෙනවා. මේ මාසය පුරා, වසර පුරා වැඩිම ප්‍රමාණයක් වර්ධනය වෙනවා දැක්කේ මිනීමැරීම් සහ මහා පාරේ ඝාතනය කිරීම්. ඒ නිසා ආණ්ඩුව මේ වගකීම ගන්න ඕනෑ. ජාතික ආරක්ෂාව පැත්තෙන් ආණ්ඩුව ෆේල්.
මහින්ද අලුත්ගෙදර
