16
පැනමා ඇළ ඇතුළු බටහිර අර්ධගෝලයේ සිදුවන චීන සහ හොංකොං ව්‍යාපාරවල බලපෑම් අවම කිරීමට පියවර ගන්නා ලෙස අමෙරිකාවේ නියෝජිත මන්ත්‍රී මණ්ඩලයේ ප්‍රවාහන හා සමුද්‍රීය ආරක්ෂාව පිළිබඳ අභ්‍යන්තර ආරක්ෂක උපකමිටුවේ ප්‍රධානි කාලෝස් ජිමෙන්ස් රජයට අනතුරු අඟවා ඇතැයි විදෙස් මාධ්‍ය වාර්තා කරයි. පැනමා ඇළ අමෙරිකාවට අත්පත් කරගත යුතු බවට ඩොනල්ඩ් ට්‍රම්ප් ජනපති පදවියේ දිවුරුම් දීමෙන් පසු කළ ප්‍රකාශය හේතුවෙන් අමෙරිකාව සහ පැනමාව අතර මතුවූ අර්බුදය එම අනතුරු ඇඟවීමෙන් තවදුරටත් ඇදී යනු ඇතැයි ද විදෙස් මාධ්‍ය වැඩිදුරටත් වාර්තා කරයි. පැනමා ඇළේ චීන බලපෑම් වහාම අවම කිරීමට පියවර නොගන්නේ නම් ඊට ප්‍රතිචාර දැක්වීමට අමෙරිකාව සූදානම් බවට පසුගියදා පැනමාවේ සංචාරය කළ අමෙරිකාවේ රාජ්‍ය ලේකම් මාර්කෝ රුබියෝ පැනමා නායක ජොස් රාවුල්ට අනතුරු ඇඟවූ බවත්, පැනමා ඇළ සම්බන්ධව උද්ගත වී ඇති අර්බුදය පිළිබඳ අමෙරිකාව සමඟ සාකච්ඡා නොකරන බවට ජොස් රාවුල් ප්‍රකාශ කර ඇති බවත් වාර්තා වේ. පැනමා ඇළ මාර්ගය චීනයට ලබා දී ඇති බවට අමෙරිකාව එල්ල කරන චෝදනාව ද පැනමා නායකයා ප්‍රතික්ෂේප කර තිබිණි. අත්ලාන්තික් හා පැසිෆික් සාගර එකට යා කරමින් සියවසකට පමණ පෙර ඉදි කළ එම මුහුදු ගමන් මාර්ගය පැනමා රාජ්‍ය යටතේ පවතින අතර, බටහිර සමුද්‍රීය වෙළෙඳ ක්ෂේත්‍රය තුළ අතිශය වැදගත් ස්ථානයක් ද වේ.
