12
රුසියාව සමඟ පවතින යුද ගැටුම් සම්බන්ධව ඩොනල්ඩ් ට්‍රම්ප් යුක්රේන ජනාධිපති වොලොදිමිර් සෙලෙන්සිට චෝදනා එල්ල කර ඇතැයි විදෙස් මාධ්‍ය වාර්තා කරයි. අමෙරිකානු ජනාධිපතිවරයා මේ චෝදනාව එල්ල කර ඇත්තේ යුක්රේන යුද අර්බුදයට විසඳුම් සෙවීම සඳහා අමෙරිකානු සහ රුසියානු ජ්‍යෙෂ්ඨ නිලධාරීන් අතර සෞදි අරාබියේ රියාද් නුවරදී පළමු වටයේ සාකච්ඡාව අවසන් වීමෙන් පසුව බවද විදෙස් මාධ්‍ය වැඩිදුරටත් වාර්තා කරයි.
ෆ්ලොරිඩා ප්‍රාන්තයේ පිහිටි සිය වතුයායේදී මාධ්‍ය හමුවකට එක්වූ ඩොනල්ඩ් ට්‍රම්ප් රුසියාව සහ යුක්රේනය අතර යුද්ධය අවසන් කිරිමට තමාට හැකි බවත්, මේ වනවිට සාකච්ඡා සාර්ථකව පැවැත්වෙන බවත් සඳහන් කර තිබේ.
සෞදි අරාබියේ පැවැති සාකච්ඡාව සඳහා යුක්රේනයට ඇරයුම් නොකළ බවට සෙලෙන්ස්කි විසින් එල්ල කරනු ලැබූ චෝදනාවට ද ජනාධිපති ට්‍රම්ප් ප්‍රතිචාර දක්වා ඇති අතර, එම යුද ගැටුම් අවසන් කරගැනීමට යුක්රේනයට වසර 3ක කාලයක් තිබූ බවත්, යුක්රේනය ඒ සඳහා උත්සාහ නොගත් බවත් ප්‍රකාශ කර ඇතැයි වාර්තා වේ. යුක්රේනයේ මැතිවරණයක් පැවැත්විය යුතු බවට යුද ගැටුම් අවසන් කිරීම සඳහා රුසියානු ජනාධිපති ව්ලැදිමිර් පුටින් ඉදිරිපත් කර ඇති කොන්දේසියට ට්‍රම්ප් එකඟතාව පළ කර ඇති අතර, මේ මස අග භාගයේදී රුසියානු ජනාධිපතිවරයා මුණ ගැසීමේ බලාපොරොත්තුවෙන් පසුවන බව වාර්තා වේ.
