12
බංග්ලාදේශයේ තහනම් කරනු ලැබූ අන්තවාදී ඉස්ලාමීය කණ්ඩායමක් විසින් පවත්වනු ලැබූ රැලියක් විසුරුවා හැරීමට පොලීසිය කඳුළුගෑස් සහ බැටන් පොලු භාවිත කිරීම හේතුවෙන් ප්‍රචණ්ඩ ක්‍රියා පැතිරී ගිය බව විදෙස් මාධ්‍ය වාර්තා කරයි. ඩකා අගනුවර බයිතුල් මුකරම් නමැති ප්‍රදේශයේ පවත්වා ඇති එම රැලියට දහස් සංඛ්‍යාත පිරිසක් එක්වී සිටි බවත්, එය විසුරුවා හැරීමේදී සිදුවූ ප්‍රචණ්ඩ ක්‍රියාවලින් බොහෝ දෙනකු තුවාල ලැබූ බවත් විදෙස් මාධ්‍ය වැඩිදුරටත් වාර්තා කරයි. වසර 2009 බංග්ලාදේශ ත්‍රස්ත විරෝධී පනත යටතේ තහනම් සංවිධාන විසින් පවත්වනු ලබන ඕනැම ආකාරයක රැස්වීමක්, පා ගමනක්,පෝස්ටර සහ අත් පත්‍රිකා බෙදා හැරීමක් හෝ ප්‍රවර්ධන කටයුතු අපරාධ නීතිය යටතේ වරදක් වන බැවින් තහනම් කර ඇති හිස්බුට් ටහ්රීර් නමැති එම සංවිධානයේ රැලිය විසුරුවා හැරීමට පොලීසිය පියවර ගෙන ඇති බවත් විදෙස් මාධ්‍ය සඳහන් කරයි. ඉදිරියේදී නැවත මෙවැනි පා ගමන් සිදු කරන්නේ නම් නීතිමය ක්‍රියාමාර්ග ගන්නා බවට පොලිසිය එම සංවිධානයට දැනුම් දී ඇතැයි ද වාර්තා වේ.
