1
මොරටුව වේල්ස් කුමර විදුහල සහ සාන්ත සෙබස්තියන් විදුහල අතර මොරටු රන් සටන වාර්ෂික මහා ක්‍රිකට් තරගයට සමගාමීව 40 වැනි වරට පැවති වාර්ෂික එක්දින ක්‍රිකට් තරගය ලකුණු 105කින් ජය ගැනීමට වේල්ස් කුමර විදුහල සමත් වූ අතර, දෙපිල අතර ඊයේ පැවති තෙවැනි වාර්ෂික විස්සයි20 තරගය ලකුණු 89කින් ජය ගැනීමට සාන්ත සෙබස්තියන් විදුහල සමත් විය.
මොරටුව ද සොයිසා ක්‍රීඩාංගණයේදී ඊයේ පැවති විස්සයි20 තරගයේ පළමුව පන්දුවට පහර දෙමින් සාන්ත සෙබස්තියන් පිල දුන් ලකුණු 172ක ඉලක්කය හමුවේ වේල්ස් කුමරයට ඕවර 20 අවසානයේ කඩුලු 7ක් දැවී රැස් කළ හැකි වූයේ ලකුණු 82ක් පමණි.
සුවස් මෙන්ඩිස් ලකුණු 30ක් රැස් කරමින් වේල්ස් කුමර පිළිතුරු ඉනිමේ වැඩිම ලකුණුලාභියා වූ අතර, පන්දු යැවීමේදී අදේශ් අල්මේදා කඩුලු 4ක් බිඳ දැමීය.
සාන්ත සෙබස්තියන් පිල වෙනුවෙන් උෂෙන් සිල්වා (64) සහ නායක රයන් දිසානායක (නොදැවී 57) අර්ධ ශතක රැස් කළ අතර, පන්දු යැවීමේදී රුසඳු සිල්වා සහ ගවේෂ් රෝහණ කඩුලු 2 බැඟින් දවා ගත්හ.
පෙරේදා පැවති එක්දින තරගයේදී වේල්ස් කුමර පිල පළමුව පන්දුවට පහර දෙමින් කඩුලු 7කට ලකුණු 224ක් රැස් කළ අතර, සාන්ත සෙබස්තියන් පිලට පිළිතුරු ලෙස සියල්ලන් දැවී රැස් කළ හැකි වූයේ ලකුණු 119ක් පමණි.
ගවේෂ් ප්‍රනාන්දු (57), නෙතුල් අනුහස් (26/4) වේල්ස් කුමරය වෙනුවෙන් දස්කම් දැක්වූ අතර, අදේශ් අල්මේදා (28/4) සාන්ත සෙබස්තියන් පිල වෙනුවෙන් පන්දුවෙන් දස්කම් දැක්වීය.
නෙතුල් අනුහස් (වේල්ස් කුමර) එක්දින තරගයේ වීරයා ලෙසත්, රයන් දිසානායක (සා. බෙස්තියන්) විස්සයි20 තරගයේ වීරයා ලෙසත් සම්මාන දිනා ගත්හ.
නිරෝෂාන් ප්රියංකර
