20
අන්තවාදය, ප්‍රචණ්ඩත්වය සහ ත්‍රස්තවාදය වර්ධනය වී ඇති රටවල් ශ්‍රේණිගත කිරීමේ ගෝලීය ත්‍රස්තවාදී දර්ශකයට අනුව මේ වසරේදී පාකිස්තානය දෙවැනි ස්ථානයට පත්වී තිබේ. ඔස්ට්‍රේලියාවේ සිඩ්නි නුවර මූලස්ථානය කරගත් ජාත්‍යන්තර ආර්ථිකය සහ සාමය සඳහා වන සංවිධානය විසින් නිකුත් කරනු ලබන එම දර්ශකයට අනුව පාකිස්තානය නවතම ශ්‍රේණිගත කිරීම්වල දෙවැනි ස්ථානයට පත්වී ඇත්තේ එරට ත්‍රස්ත ක්‍රියාකාරකම් මැඬ පැවැත්වීමට ආරක්ෂක අංශ දැඩි උත්සාහයක නිරත වූවද, බලුකිස්තානය හා කයිබර් පක්ටුන්ක්වා වැනි ප්‍රාන්තවල අඛණ්ඩව සිදුවන ත්‍රස්ත ක්‍රියාකාරකම් සැලකිල්ලට ගනිමින් බව වාර්තා වේ.
ත්‍රස්තවාදයේ වැඩිම බලපෑම් ඇති රටවල් අනුව එම දර්ශකයේ ශ්‍රේණිගත කිරීම් 100ක් සිදු කර ඇති බවත්, බටහිර අප්‍රිකානු රටක් වන බුර්කිනා ෆාසෝ නවතම දර්ශකයේ පළමු ස්ථානයට පත්වී ඇති බවත් විදෙස් මාධ්‍ය වාර්තා කරයි.
ත්‍රස්තවාදී ක්‍රියාකාරකම් හේතුවෙන් විවිධ ප්‍රහාර, ජීවිත සහ දේපළ හානි ඇතුළු කරුණු රැසක් විශ්ලේෂණය කරමින් අභ්‍යන්තර ස්ථාවරත්වයට සහ ආර්ථික වර්ධනයට බලපෑම් සිදුවන රටවල් ලෙස හඳුන්වා දී ඇති එම දර්ශකයේ සිරියාව තුන්වැනි ස්ථානයේ සහ තවත් බටහිර අප්‍රිකානු රටක් වන මාලි රාජ්‍යය සිව්වැනි ස්ථානයේ පසුවන බව විදෙස් මාධ්‍ය වැඩිදුරටත් වාර්තා කරයි. එම දර්ශකයේ ඊශ්‍රායලය 8 වැනි ස්ථානයටත්, ඇෆ්ගනිස්තානය 9 වැනි ස්ථානයටත් පත්වී ඇත.
