22
බටහිර මියන්මාරයේ ඉන්දීය දේශසීමාව ආසන්නයේ පිහිටි කතෝලික ප්‍රදේශයක් වන චින් ප්‍රාන්තයේ බලය අත්පත් කරගනිමින් සිටින එරට කැරලිකරුවන් එම ප්‍රාන්තයේ ප්‍රධාන හමුදා කඳවුර ආසන්නයටම පැමිණ සිටින බව විදෙස් මාධ්‍ය වාර්තා කරයි. බටහිර මියන්මාරයේ වැඩි බලයක් අත්කර ගැනීමට කැරලිකරුවන් සමත්වූවද, චින් ප්‍රාන්තයේ සිට කිලෝමීටර් 179ක් දුරින් දකුණින් පිහිටි කියුක්පියු නගරයේ බලය රැක ගැනීමට එරට හමුදාව සමත් වී ඇති බව වාර්තා වේ. මියන්මාරයට ඇතුළු වී සිටින චීන හමුදාව කියුක්පියු ප්‍රදේශයේ පෞද්ගලික හමුදා කඳවුරක් ස්ථාපිත කිරීම හේතුවෙන් දකුණු මියන්මාරයේ පළාත් රැසක් කැරලිකරුවන්ගෙන් රැක ගැනීමට එරට හමුදාවට හැකිවූ බව විදෙස් මාධ්‍ය වැඩිදුරටත් වාර්තා කරයි.
මියන්මාරයේ සිවිල් ගැටුම් උත්සන්න වන විට දැඩි අවදානමකට ලක්වී තිබූ චීන – මියන්මාර ආර්ථික කොරිඩෝව ආරක්ෂා කරගැනීම සඳහා මියන්මාරයේ දේශසීමා තුළ චීන ආරක්ෂක හමුදාවන්ට ක්‍රියාත්මක වීමට නීතිමය කටයුතු සිදු කරන ලෙස චීනය මීට පෙර මියන්මාර රජයෙන් ඉල්ලා තිබූ බවත්, පසුගිය පෙබරවාරි 18 වැනිදා මියන්මාරය පෞද්ගලික ආරක්ෂක සේවා නීතිය ක්‍රියාත්මක කරමින් චීන හමුදාවට මියන්මාර දේශසීමා විවෘත කිරීමෙන් පසු කිලෝමීටර් 800ක් දිගින් යුතු තෙල් හා ගෑස් නළ මාර්ග ඇතුළත් චීන-මියන්මාර ආර්ථික කොරිඩෝව ආරක්ෂා කරගැනීමට මියන්මාර හමුදාව සමත්වූ බවත් වාර්තා වේ.
