10
නෙත්මි රත්නායකට එරෙහිව තරග වට 2-0ක ජයක් වාර්තා කරමින් දකුණු පළාත් විවෘත බැඩ්මින්ටන් තරගාවලියේ කාන්තා ශූරතාව දිනා ගැනීමට ජාතික බැඩ්මින්ටන් ශූරි රනිත්මා ලියනගේ සමත් වූවාය.
පිට පිට දෙවරක්ම ජාතික බැඩ්මින්ටන් ශූරිය බවට පත්වූ යොවුන් ක්‍රීඩිකා රනිත්මා ඉන් නොනැවතී ප්‍රවීනා විජේසුන්දර සමඟ එක්ව කාන්තා විවෘත යුගල ශූරතාව දිනා ගනිමින් මෙවර තරගාවලියේ ද්විත්ව ශූරතාවට හිමිකම් කීමට ද සමත් වූවාය. එම තරගයේදී ඔවුන් හමුවේ ඉරූෂි අමන්දි සහ සඳති දෙව්මිණි තරග වට 2-0කින් පරාජයට පත්වූහ.
ගාල්ල දඩැල්ලේ දිස්ත්‍රික් ක්‍රීඩා සංකීර්ණයේ පසුගියදා පැවති මේ තරගාවලියේ පිරිමි ශූරතාව දිනා ගැනීමට ආශිංස හේරත් සමත්වූයේ ඒකල අවසන් මහා තරගයේදී තරග වට 2-1 කින් තුලිත් පල්ලියගුරු පරාජයට පත් කරමිනි. රනිත්මාට අමතරව ඉන්දුනීසියානු ක්‍රීඩක මාර්සිලෝ විටෝරියෝ ද ද්විත්ව ශූරතා දිනා ගැනීම කැපී පෙනිණි. ඔහු පිරිමි විවෘත යුගල අවසන් මහා තරගයේදී ඇලන් ධර්මරාසපුත්‍ර සමඟ එක්ව ලෝචන ද සිල්වා සහ ආශිංස හේරත් තරග වට 2-1කින් පරාජයට පත් කළ අතර, විවෘත මිශ්‍ර යුගල අවසන් මහා තරගයේදී සාරා ක්‍රිස්ටීන් සමඟ එක්ව තරග වට 2-0කින් තිළිණ රාජකරුණා සහ වරංගනා ජයවර්ධන පරාජයට පත් කිරීමට සමත් විය.
ශ්‍රී ලංකා බැඩ්මින්ටන් ආයතනයේ අනුමැතිය යටතේ දකුණු පළාත් බැඩ්මින්ටන් සංගමය විසින් මෙහෙයවනු ලැබූ දකුණු පළාත් විවෘත බැඩ්මින්ටන් තරගාවලිය ජාතික ශ්‍රේණිගත කිරීමේ පළමු මට්ටමේ තරගාවලියක් ලෙස පැවැති අතර, ජයග්‍රාහක ජයග්‍රාහිකාවන්ට කුසලාන, පදක්කම් සහ සහතිකපත්වලට අමතරව රුපියල් හත්ලක්ෂ පනස්දහසක මුදල් ත්‍යාග පිරිනැමිණි.
