ආයුධ සන්නද්ධ කණ්ඩායමක් මධ්‍යම හයිටි රාජ්‍යයේ මිරෙබලයිස් නුවර බන්ධනාගාරයකින් සිරකරුවන් 500ක් නිදහස් කර ඇතැයි විදෙස් මාධ්‍ය වාර්තා කරයි. මිරෙබලයිස් නුවරට කඩා වැදුණු අවිගත් විශාල පිරිසක් ගොඩනැඟිලි සහ මෝටර් රථවලට වෙඩි තබමින් බන්ධනාගාරය වෙත ගිය බවත්, පොලිස් ස්ථානයකට වෙඩි ප්‍රහාරයක් එල්ල කර ඇති බවත් විදෙස් මාධ්‍ය වැඩිදුරටත් වාර්තා කරයි. මිරෙබලයිස් නුවර විශාල ප්‍රදේශයක් අත්පත් කරගෙන සිටින බව කියන එම ආයුධ සන්නද්ධ කණ්ඩායම බන්ධනාගාරයෙන් නිදහස් කරගෙන ඇත්තේ ඔවුන්ගේ සාමාජිකයන් පිරිසක් බව ද වාර්තා වේ.
මේ වන විට නගරයේ ආරක්ෂාවට අතිරේක පොලිස් කණ්ඩායම් යොදවා ඇතැයි හයිටි රාජ්‍යයේ පොලිස් ප්‍රධානියා ප්‍රකාශ කර ඇති අතර, බන්ධනාගාරයෙන් පලා ගිය සිරකරුවන් සොයා මෙහෙයුමක් ද ආරම්භ කර ඇතැයි විදෙස් මාධ්‍ය සඳහන් කරයි. එක්සත් ජාතීන්ගේ සංඛ්‍යා ලේඛනවලට අනුව හයිටි රාජ්‍යයේ සන්නද්ධ කල්ලිවල ක්‍රියාකාරකම් ඉහළ අගයක් පෙන්නුම් කරන අතර, පසුගිය වසරේදී අවිගත් පුද්ගලයන් අතර සිදුවූ ගැටුම්වලින් පුද්ගලයන් 5,600ක් ඝාතනය වී ඇතැයි වාර්තා වේ. මීට අමතරව පසුගිය වසරේදී පුද්ගලයන් 1,494 දෙනකු අවිගත් පුද්ගලයන්ගේ පැහැරගැනීම්වලට ලක්වී ඇතැයි ද වාර්තා වේ.
The post අවිගත් කල්ලියක් හයිටි රාජ්‍යයේ බන්ධනාගාරයකින් රැඳවියෝ 500ක් නිදහස් කරයි appeared first on දිනමිණ.
