19
තමන්ගේ දරුවන්ට, තමන්ගේ ප්‍රදේශයට සහ තමන්ගේ රටට යහපතක් සිදු කිරීමේ අපේක්ෂාව ඇතිව ජනතාව ඉදිරි මැතිවරණයේදී ඡන්දය පාවිච්චි කළ යුතු බව එක්සත් ජාතික පක්ෂයේ උප නායක, නීතිඥ අකිල විරාජ් කාරියවසම් මහතා ප්‍රකාශ කළේය.
ඒ මහතා මේ බව පැවසුවේ සිරිකොත පක්ෂ මූලස්ථානයේදී පෙරේදා (13) පැවති මාධ්‍ය හමුවට එක්වෙමිනි.
එහිදී වැඩිදුරටත් අදහස් දැක්වූ ඒ මහතා මෙසේ ද පැවසීය.
“තව දින තිස් අටකින් ජනතාවගෙන් මේ රට ඉදිරියට ගෙන යන්න කවුද සුදුසු කියන කාරණය විමසන්න නියමිතයි. සමහර වෙලාවට කතාවට ජාතිකත්වයට සහ විවිධ හේතුවලට පවතින රුචිකත්වය නිසා ජනතාව මැතිවරණවලදී වැරදි තීන්දු ගත්තා. එවැනි තීන්දුවක් තමයි අපි 2019දී අත්දුටුවේ කියන එක සඳහන් කළ යුතුයි. එවැනි තීන්දු නිසා රටක් විදිහට අපි බරපතළ අර්බුදයකට මුහුණ දුන්නා. වර්තමාන ජනාධිපතිවරයා තමන්ගේ අත්දැකීම් පාවිච්චි කරමින් ඉතා සාර්ථකව රට ඉදිරියට ගෙන යමින් ඔහුගේ වචනයෙන්ම කියනවා නම් වැල් පාලමෙන් එගොඩ වෙන්න උත්සාහ කරන මොහොතකයි අපේ රට සිටින්නේ. තමන්ගේ දරුවන්ට, තමන්ගේ ප්‍රදේශයට, තමන්ගේ රටට යහපතක් සිදු කිරීමේ අපේක්ෂාවෙන් තමයි ජනතාව මැතිවරණයේදී ඡන්දය පාවිච්චි කරන්නේ. බොහෝ වේලාවට මිනිසුන් කල්පනා කරන්නේ සමාජ මාධ්‍ය කියන නිසා හෝ කවුරුන් හෝ කියන නිසා හෝ පෞද්ගලික රුචිඅරුචිකම් නිසා හෝ ඡන්දය පාවිච්චි කරනවා. මෙයාට තමයි මේ පාර රැල්ල තියෙන්නෙ, මෙයාට දෙන්න ඕනෙ කියලා හිතනවා. එහෙම ඡන්දය පාවිච්චි කිරීමේදී නැවත රටේ ජනතාව තමයි අමාරුවක වැටෙන්නේ.
අපි දිනුවත් පැරදුණත් ප්‍රතිපත්තිවල හිටපු පිරිසක් කියන එක හැමෝම දන්නවා. මම ලක්ෂ තුනක විතර ඡන්ද ප්‍රමාණයක් අරගෙන ලංකාවේ පස්වෙනියට වැඩිම ඡන්ද අරගෙන ඊළඟ මැතිවරණයේදී ජනතාව ගෙදර යැව්වා. බොහෝ වෙලාවට තමන්ට පාර්ලිමේන්තු යන්න පුළුවන් කොහොමද? අර ලැයිස්තුවේ කවුද ඉන්නේ? මේ ලැයිස්තුවේ කවුද ඉන්නේ? මට එතකොට මේ දිස්ත්‍රික්කයෙන් පාර්ලිමේන්තු යන්න පුළුවන් ද කියන කාරණය තමයි ඔවුන් සොයා බලන්නේ. දේශපාලන පිල් මාරු සිදු කරන්නෙත් එවැනි කාරණා පදනම් කරගෙනයි.
අපි හම්බ කරගත්තොත් අපි කනවයි කියන ප්‍රතිපත්තියේ ඉදීම වැරදියි. පසුගිය කාලයේ අපි හම්බ කරගත්තත් අපට කන්න විදිහක් තිබුණේ නෑ. ඒ නිසා දේශපාලනය තුළට ඇවිල්ලා හරි විදිහට හැසිරීම අත්‍යවශ්‍යයි. බංග්ලාදේශයට අද රනිල් වික්‍රමසිංහ වගේ නායකයෙක් හිටියා නම් මේ ගැටලුව ඇතිවෙන්නේ නෑ. පකිස්ථානයේ මේ තත්ත්වය උදා වෙලා තිබෙනවා. මේ වැඩපිළිවෙළ ඉදිරියට යනවා නම් මේ වැඩපිළිවෙළට සහාය දී ඉදිරියට යා යුතුයි. අපි ගෝල්ෆේස් එක දෙපාරක් පිරෙව්වා. නමුත් ඊළඟ මැතිවරණයේදී අපි පරාජය වුණා. එනිසා ජනතාව බුද්ධිමත්ව මේ වෙලාවේ තීරණ ගත යුතුයි. රනිල් වික්‍රමසිංහ මහතා වගේ කෙනෙක් නැවත හදා ගන්නත් බෑ. පරිචය කියන දේ පොත් කියවලා ගන්න පුළුවන් එකක් නෙමෙයි. දේශපාලන ක්ෂේත්‍රයේ අත්දැකීම් ලබා දැන් හොඳම තැනක ඔහු ඉන්නේ. එනිසා ඔහුට අවුරුදු පහක්වත් තව මේ රටේ පාලනය දිය යුතුයි. රටක් ගොඩ දාන්න පුළුවන් නායකයෙක් කියන එක මුළු ලෝකෙම පිළිගන්නවා. ඒ දෙයින් ප්‍රයෝජනයක් ගන්නව ද? නැද්ද? කියන එක මේ රටේ ජනතාව තේරුම් ගත යුතුයි. මේ රට ගොඩ දාන්න පුළුවන්, ඉදිරිපත් වෙලා ඉන්න අයගෙන් එකම නායකයා වර්තමාන ජනාධිපතිතුමා පමණයි. අපි වෙනස් වන ලෝකයත් එක්ක ගනුදෙනු කර ඉදිරියට යන්නේ කොහොමද කියන එක ජනාධිපතිවරයා සාකච්ඡා කරනවා.
මුලින්ම තුන්වේල කන එකට අවශ්‍ය ක්‍රමවේදය සකස් කළා. ඊට පස්සේ බෙහෙත් ටික ගන්න සැලැස්සුවා. ඊට පස්සේ අස්වැසුම දෙන්න ක්‍රියා කළා. විදුලි මිල පහත දමා තිබෙනවා. එතුමා කියපු දේ ඒ ආකාරයෙන්ම ඉෂ්ට කර තිබෙනවා. ඒ නිසා රටට දෙන නායකත්වය තමයි වැදගත් වෙන්නේ. අපට හොඳ ඇන්ජින් එකක් තිබෙනවා, හොඳ ඩ්‍රයිවර් කෙනෙක් ඉන්නවා. එතුමා තමයි එදත් රුපියල් දස දහසකින් වැටුප් වැඩි කළේ. අදත් එය සිදු කළේ එතුමා පමණයි.”
නෙත්මි පූජනී රත්නායක සහ මැද කොළඹ සමූහ – ආරියරත්න ගනේගොඩ
