16
ශ්‍රී ලංකා ජාතික පාපන්දු කණ්ඩායම ඊයේ අලුයම මියන්මාරය බලා පිටත්ව ගියේය. මේ 10 වැනිදා හා 13 වැනිදා මියන්මාර ජාතික පාපන්දු කණ්ඩායම සමඟ පාපන්දු තරග දෙකක් පැවැත්වීමට කටයුතු යොදා ඇත. මේ තරග දෙක මියන්මාරයේ යෙන්ගොන්හිදි පැවැත්වෙන අතර, කණ්ඩායම් දෙකම ලෝක පාපන්දු ශ්‍රේණිගත කිරීමේ ඉදිරියට පැමිණීමේ අපේක්ෂාවෙන් තරග බිමට පිවිසෙති.
වසර අටකට පසු ශ්‍රී ලංකාව පසුගියදා ෆීෆා පාපන්දු ලෝක ශ්‍රේණිගත කිරීම්වල 200 වැනි ස්ථානය දක්වා ඉහළට පැමිණි අතර, එයට ප්‍රධාන හේතුව වූයේ කාම්බෝජයට එරෙහි තරගය ජය ගැනීමය. මේ හේතුවෙන් ශ්‍රී ලංකා පාපන්දු පිලේ විශ්වාසය ඉහළ නැංවී ඇති අතර, ඉදිරි තරගවලට එම තත්ත්වය සුබදායක ලෙස බලපානු ඇතැයි විශ්වාස කෙරේ.
මියන්මාරය දැනට ෆීෆා පාපන්දු ලෝක ශ්‍රේණිගත කිරීම්වල 167 වැනි ස්ථානයේ පසුවන බැවින් මේ තරග දෙකේදී ශ්‍රී ලංකාවට ප්‍රබල ප්‍රතිවාදියෙකු වනු ඇත.
ශ්‍රී ලංකා පාපන්දු කණ්ඩායම හා මියන්මාරය අතර, ඉතිහාසයේ තරග දෙකක් පවත්වා එම තරග දෙකම මියන්මාරය ජය වාර්තා කළේය. 2008දී පැවැති ආසියානු පාපන්දු සම්මේලන කුසලාන තරගාවලියේදී මියන්මාරය ගෝල් 3-1කින් ශ්‍රී ලංකාව පරාජය කළ අතර, 2010දී අන්තර්ජාතික සුහද පාපන්දු තරගයකදී ගෝල් 4-0කින් මියන්මාරය ජය ගත්තේය. මෙවර මියන්මාරය හා ශ්‍රී ලංකාව තරග බිමට පිවිසෙන්නේ වසර 14කට පසුවීම විශේෂත්වයකි.
ප්‍රින්ස් ගුණසේකර
