‘අපේ ආණ්ඩුව වසර දෙකයි – රටට සුබයි’ තේමාව යටතේ නොච්චියාගම සිංහාරගම ක්රීඩාංගණයේදී පැවති ජන රැළිය අමතමින් ජනාධිපතිවරයා මේ බව සඳහන් කළේය.
“දැන් රජය කෙතරම් විවේචනය කරනවාද කියනවා නම්, ඊයේ දිනයේ මට අසන්නට ලැබුණා එක්තරා පුද්ගලයෙක් ගිනිපෙට්ටි දෙකක කූරුවලින් වෙඩි බෙහෙත් අරගෙන බෝම්බයක් හදනවා කියනවා මට ගහන්න. පව් ඒ අන්කල්. සමාජයේ අද විවේචනය කිරීමට ඇති නිදහස ඒ ආකාරයෙන් පාවිච්චි කරනවා. ආණ්ඩුව ජනතාවගේ උවමනාවන් ඉටු කරන්නේ නැත්නම් ආණ්ඩුවට බනින්න, විවේචනය කරන්න ජනතාවට අයිතියක් තිබෙනවා. පාලකයන් ප්රශ්න කරන දේශපාලන සංස්කෘතියක් රට තුළ බිහිවිය යුතුයි.
ලංකා ඉතිහාසයේ ප්රථම වතාවට වසර දෙකක කාලයක් මුළුල්ලේ කිසිදු මහජන උද්ඝෝෂණයකට ජල ප්රහාර, රබර් උණ්ඩ, බැටන් ප්රහාර හෝ කඳුළු ගෑස් එල්ල කර නැහැ. භාවිතයට නොගැනීම නිසා කඳුළු ගෑස් තොග කල් ඉකුත් වී ඇති බව පොලිස්පතිවරයා මෑතකදී මට පැවසුවා. අතීතයේදී දේශපාලනඥයන්ට ජනතාව බියෙන් ගැහුණා. කළු පටි බැඳගත් මැර කල්ලි යොදවා මිනිසුන් බියවද්දන යුගයක් අනුරාධපුරයේද තිබුණා. අද අප ඒ සියල්ල වෙනස් කර ජනතාව සහ පාලකයා අතර සහයෝගීතාව මත පදනම් වූ අලුත් සබඳතාවක් ගොඩනගා තිබෙනවා.
එදා අනුරාධපුරයේ සෑම මන්ත්රීවරයෙක්ම ඇමතිවරුන් බවට පත් කරමින් රජයේ වාහන, ඉන්ධන, නිල නිවාස, ලයිට් බිල් සහ වතුර බිල් සියල්ල මහජන මුදලින් නඩත්තු කළා. අප මැතිවරණයේදී පොරොන්දු වූ පරිදිම අමාත්ය ධුර සංඛ්යාව 25කට සීමා කර වසර දෙකක් තිස්සේ රට පාලනය කරමින් ඉතිහාසගත වෙනසක් සිදු කර තිබෙනවා. අද රාජ්ය ඇමතිවරුන් නෑ. ඇමතිවරුන්ට නිල නිවාස, වතුර සහ විදුලි බිල් ගෙවීම් හෝ විශාල ආරක්ෂක පරිවාර රථ පෙළපාළි නෑ.
හිටපු ජනාධිපතිවරුන් නඩත්තු කිරීම සඳහා මහජන මුදලින් ලබාදුන් බංගලා, වාහන සහ කාර්යාල පහසුකම් නව පනතක් මගින් අහෝසි කළා සේම, ආණ්ඩුක්රම ව්යවස්ථාවෙන් හිමිව ඇති ඉතිරි වරප්රසාද පිළිබඳවද ඉදිරියේදී අවශ්ය පියවර ගන්නවා. රටක් ඉදිරියට ගෙන යාමට නම් දේශපාලන සංස්කෘතිය සහ ආර්ථිකය මුළුමනින්ම පරිවර්තනය කළ යුතුයි.” යැයි ජනාධිපතිවරයා වැඩිදුරටත් අවධාරණය කළේය.
