සුරේෂ් සලේ මහතාට එරෙහිව සිදු කෙරෙන මෙම විමර්ශනයට අදාළව, කරුණා අම්මාන් ලබා දුන් සාක්ෂිය පිළිබඳව අප මීට පෙර ඔබව දැනුවත් කළා. නමුත් අද අප හෙළි කරන්නේ ඊටත් වඩා බරපතල කතාවක්. යුධ හමුදා බුද්ධි අංශයට අනුයුක්තව දැවැන්ත මෙහෙයුම් සිදු කළ, පළමුවන සන්නද්ධ බුද්ධි බලකායේ නිලධාරියෙකු හෙවත් කෝප්රල්වරයෙකු විසින් අධිකරණයට ලබා දුන් ඒ අතිශය රහසිගත කටඋත්තරයයි මේ.
⠀
මෙම හෙළිදරව්ව සිදු කරන නිලධාරීන් සිය රාජකාරිය ඉටු කළේ දිවි හිමියෙන්. ඔවුන්ගේ ජීවිතවලට පවතින දැඩි අවදානම හේතුවෙන්, අප කිසිදු විටෙක ඔවුන්ගේ සැබෑ නම් හෙළි කරන්නේ නැහැ. ඒ වෙනුවට අප මෙම ප්රධාන බුද්ධි නිලධාරියා ප්රදීප් යන අනවර්ථ නාමයෙන් හඳුන්වනු ලබනවා. මෙය හුදෙක් කටකතාවක් නොවෙයි; මෙය නිල වශයෙන් අධිකරණය හමුවේ ගොනු කර ඇති කරුණු සංක්ෂිප්තයක්. ඉන්දියාව සහ ශ්රී ලංකාව අතර පැවති, එහෙත් අප කිසිවෙකුත් නොදැන සිටි බිහිසුණු බුද්ධි තොරතුරු හුවමාරුවක් ගැන මේ කතාවෙන් හෙළිවනවා. සහරාන් හෂීම් ඇතුළු මරාගෙන මැරෙන ත්රස්තවාදීන් ප්රහාරය එල්ල කිරීමට පෙර, ඉන්දීය විශේෂ බුද්ධි ඒකකයක් මගින් ලබා දුන් නිශ්චිත පෙර දැනුම්දීම්, ශ්රී ලංකාවේ ආරක්ෂක බලධාරීන් විසින් නොසලකා හැරියේ කෙසේද යන්න මෙහිදී මනාව පැහැදිලි වෙනවා.
⠀
ප්රදීප් යනු යුධ හමුදා බුද්ධි අංශය තුළ සුවිශේෂී කාර්යභාරයක් ඉටු කළ නිලධාරියෙක්. ඔහුගේ ප්රධාන රාජකාරිය වූයේ දේශීය මෙන්ම විදේශීය බුද්ධි තොරතුරුකරුවන්ගේ දැවැන්ත ජාලයක් ගොඩනැගීම සහ ඔවුන් මෙහෙයවීමයි. ජාතික ආරක්ෂාවට තර්ජනයක් විය හැකි දේශපාලන ගැටුම්, බෙදුම්වාදය, ත්රස්තවාදය, අන්තවාදය සහ මත්ද්රව්ය ජාවාරම් පිළිබඳව ඔහු සිය තොරතුරුකරුවන් හරහා දිනපතා සූක්ෂමව තොරතුරු රැස් කළා. ඔහු එක් එක් තොරතුරුකරු වෙනුවෙන් වෙන වෙනම රහසිගත ලිපිගොනු පවත්වාගෙන ගිය අතර, එම තොරතුරු සිය අණදෙන නිලධාරියා හරහා යුධ හමුදා බුද්ධි අධ්යක්ෂ මණ්ඩලයට අඛණ්ඩව යොමු කිරීමට කටයුතු කළා. තොරතුරු රැස් කිරීම, විශ්ලේෂණය කිරීම සහ වාර්තා කිරීම අතිශය ක්රමානුකූලව සහ විධිමත්ව සිදුවූ බව ප්රදීප්ගේ මෙම සාක්ෂිය මගින් මනාව තහවුරු වනවා.
⠀
වසර 2016 දී ප්රදීප්ගේ බුද්ධි ජාලයට අලුත් තොරතුරුකරුවෙකු සම්බන්ධ වෙනවා. ඉන්දියාවේ සිට පැමිණි ඔහු හිටපු එල්.ටී.ටී.ඊ මුහුදු කොටි සාමාජිකයෙක්. අප ඔහුව චාල්ස් ලෙස හඳුන්වමු. කාලයක් තිස්සේ ඉන්දියාවේ ජීවත් වූ චාල්ස්ට දකුණු ඉන්දියාව තුළ අතිශය ප්රබල බුද්ධි ජාලයක් සහ සබඳතා ගොඩනැගී තිබුණා. ඔහුගේ සුවිශේෂීම සම්බන්ධතාවය වූයේ ඉන්දියාවේ තමිල්නාඩු ප්රාන්ත පොලිසිය යටතේ ක්රියාත්මක වන කියු අංශය නමැති විශේෂ බුද්ධි ඒකකයේ ප්රධානියා සමඟයි. කියු අංශය යනු ඉන්දීය මධ්යම බුද්ධි සේවය හෙවත් රෝ (RAW) සංවිධානය සමඟ සෘජුවම බද්ධ වී ක්රියාත්මක වන, ත්රස්තවාදය, ආයුධ ජාවාරම් සහ අන්තවාදී ක්රියාකාරකම් පිළිබඳව නිරන්තරයෙන් සෙවිල්ලෙන් සිටින ඉන්දියාවේ ප්රබලතම බුද්ධි ඒකකයක් බව අප වටහා ගත යුතුයි.
⠀
මෙම කියු අංශයේ එවකට ප්රධානියා ලෙස කටයුතු කළේ ඊශ්වරමූර්ති නමැති අති දක්ෂ පොලිස් ප්රධානියායි. චාල්ස් සහ ඊශ්වරමූර්ති අතර තිබුණේ ඉතා සමීප සබඳතාවයක්. චාල්ස් හරහා ප්රදීප්ට ඊශ්වරමූර්ති සමඟ සම්බන්ධ වීමට අවස්ථාව හිමිවනවා. මෙම සම්බන්ධතාවය කෙතරම් දුරදිග ගියාද යත්, එක් අවස්ථාවකදී ප්රදීප්ගේ අණදෙන නිලධාරියා පවා දුරකථනයෙන් ඊශ්වරමූර්ති සමඟ සෘජුවම සාකච්ඡා කරනවා. ඉන්පසුව, නීතිවිරෝධී ලෙස ඉන්දියාවට පලා යන පුද්ගලයින්, සරණාගත කඳවුරුවල සිටින ශ්රී ලාංකිකයින් සහ ඉන්දියාවේ සැඟවී සිටින හිටපු ත්රස්තවාදීන් පිළිබඳව වටිනා තොරතුරු රැසක් ඊශ්වරමූර්තිගෙන් චාල්ස් හරහා ප්රදීප් වෙත ගලා එන්නට පටන් ගන්නවා. මෙය දෙරටේ බුද්ධි අංශ අතර සිදුවූ නිල නොවන එහෙත් අතිශය සාර්ථක තොරතුරු හුවමාරු ජාලයක් බවට පත්ව තිබුණා.
⠀
කෙසේ වෙතත්, කතාවේ හැරවුම් ලක්ෂය සනිටුහන් වන්නේ 2018 වසරේ අගභාගයේදීයි. ඉන්දීය කියු අංශයේ ප්රධානී ඊශ්වරමූර්ති, චාල්ස් හරහා ශ්රී ලංකා යුධ හමුදා බුද්ධි අංශයට අතිශය බරපතල අනතුරු ඇඟවීමක් සිදු කරනවා. මඩකලපුව ප්රදේශයේ සහරාන් හෂීම් නමැති මවුලවිවරයෙකු දැඩි අන්තවාදී අදහස් පතුරුවමින් සිටිනවා, යූටියුබ් හරහා ඔහු සිදුකරන දේශනා පිළිබඳව වහාම සොයා බලන්න, මොහු අතිශය භයානක පුද්ගලයෙක්, මොහුගෙන් ඉදිරියේදී දැවැන්ත තර්ජනයක් එල්ල වීමට ඉඩ තිබෙනවා යැයි ඊශ්වරමූර්ති නිශ්චිතවම අනතුරු අඟවනවා. ඒ වන විටත් සහරාන්ගේ යූටියුබ් නාලිකාවේ සබැඳියන් පවා ඉන්දීය බුද්ධි ප්රධානියා විසින් ශ්රී ලංකාවේ බුද්ධි අංශ වෙත ලබා දීමට තරම් කාරුණික වී තිබුණා. මෙය පාස්කු ප්රහාරයට මාස ගණනාවකට පෙර ලැබුණු පැහැදිලි පූර්ව අනතුරු ඇඟවීමක්.
⠀
ඊශ්වරමූර්ති එතැනින් නැවතුනේ නැහැ. අයි.එස්.අයි.එස් ත්රස්තවාදීන් විසින් භාවිතා කරන ලද, අරාබි භාෂාවෙන් රචිත බෝම්බ නිෂ්පාදනය කිරීමේ සහ මරාගෙන මැරෙන ප්රහාර එල්ල කිරීමේ තාක්ෂණික අත්පොතක් සහරාන්ගේ කණ්ඩායම විසින් දෙමළ භාෂාවට පරිවර්තනය කර ඇති බවත් ඔහු අනාවරණය කළා. එම පරිවර්තනය කරන ලද අත්පොතේ ඡායාරූප පවා වට්ස්ඇප් හරහා චාල්ස්ට එවා, එය ප්රදීප් වෙත ලබා දීමට ඊශ්වරමූර්ති කටයුතු කළා. මෙම බිහිසුණු තොරතුරු ලැබුණු වහාම, ප්රදීප් ක්රියාත්මක වී ඒ සියල්ල සිය අණදෙන නිලධාරියා හරහා යුධ හමුදා බුද්ධි අධ්යක්ෂවරයා වෙත නිල වශයෙන් වාර්තා කිරීමට පියවර ගත්තා. තත්ත්වයේ බරපතලකම තේරුම් ගත් ඔවුන් වහාම ක්රියාත්මක විය යුතුව තිබුණත්, සිදුවූයේ කුමක්ද යන්න අදටත් විශාල අභිරහසක්.
⠀
මෙම තොරතුරුවල ඇති අතිශය භයානක ස්වභාවය හේතුවෙන්, චාල්ස් විසින් ඉන්දීය බුද්ධි ප්රධානී ඊශ්වරමූර්ති සහ ශ්රී ලංකාවේ පළමුවන සන්නද්ධ බුද්ධි බලකායේ අණදෙන නිලධාරියා අතර යළිත් වට්ස්ඇප් තාක්ෂණය ඔස්සේ සෘජු කතාබහක් සංවිධානය කරනවා. ඉංග්රීසි භාෂාවෙන් සිදුවූ මෙම සාකච්ඡාවෙන් පසුව, අණදෙන නිලධාරියා විසින් වහාම ක්රියාත්මක වන පරිදි සහරාන් හෂීම් පිළිබඳව සම්පූර්ණ බුද්ධි වාර්තාවක් සකස් කරන ලෙස ප්රදීප්ට නියෝග කරනවා. ඒ අනුව සකස් කරන ලද සවිස්තරාත්මක වාර්තාව, අණදෙන නිලධාරියාගේ අත්සනින් යුතුව යුධ හමුදා බුද්ධි අධ්යක්ෂ මණ්ඩලය වෙත නිල වශයෙන් යොමු කර තිබෙනවා. එම අතිශය රහසිගත වාර්තාවේ පිටපතක් අදටත් චාල්ස්ගේ නමින් පවත්වාගෙන ගිය බුද්ධි ලිපිගොනුව තුළ සුරක්ෂිතව පවතින බව ප්රදීප් සිය සාක්ෂියෙන් තහවුරු කර තිබෙනවා.
⠀
සහරාන් පිළිබඳව තවදුරටත් විමර්ශනය කිරීමේදී, ප්රදීප්ට මන්නාරම ප්රදේශයේ සිටින සිය වෙනත් තොරතුරුකරුවෙකුගෙන් තවත් කම්පනයට පත් කරන තොරතුරක් ලැබෙනවා. සහරාන් හෂීම් මුහුදු මාර්ගයෙන් රහසිගතව ඉන්දියාවට ගොස් නැවත ශ්රී ලංකාවට පැමිණ ඇති බව ඉන් හෙළි වනවා. වඩාත් බරපතල කරුණ වන්නේ, සහරාන්ගේ මෙම නීතිවිරෝධී ඉන්දීය සංචාරය සඳහා එවකට ප්රබල දේශපාලනඥයෙකු වූ රිෂාඩ් බදියුදීන් මහතාගේ සහාය ලැබී ඇති බවට බුද්ධි තොරතුරු වාර්තා වීමයි. මෙම දේශපාලනඥයා අන්තවාදයට උදව් කළාද, නැතහොත් හුදෙක් මිනිස් ජාවාරමක් ලෙස ඊට සහාය දුන්නාද යන්න පැහැදිලි නැතත්, ප්රදීප් විසින් ප්රබල දේශපාලනඥයෙකුගේ සහාය ලැබී ඇති බව සඳහන් කරමින් බුද්ධි අධ්යක්ෂ මණ්ඩලයට වාර්තා කර තිබුණා. එය යහපාලන ආණ්ඩුව සමයේ සිදුවූ බරපතල සිදුවීමක්.
⠀
2018 නොවැම්බර් 30 වැනිදා, මුළු රටම කම්පනයට පත් කරමින් මඩකලපුව වවුනතිව් පොලිස් මුරපොළේ රාජකාරියේ නිරතව සිටි පොලිස් නිලධාරීන් දෙදෙනෙකු අමානුෂික ලෙස ඝාතනය කර ඔවුන්ගේ ගිනිඅවි පැහැරගෙන යනවා. මෙම සිදුවීම වාර්තා වූ වහාම, එදින උදෑසනම චාල්ස් ප්රදීප්ට දුරකථනයෙන් අමතනවා. වවුනතිව් සිද්ධිය ආරංචිද? ඒක කළේ මම කලින් කිව්ව සහරාන්ගේ කණ්ඩායම තමයි කියලා ඊශ්වරමූර්ති මට දැන් කිව්වා යැයි චාල්ස් ප්රදීප්ට පවසනවා. ඒ වන විටත් ඉන්දීය කියු අංශයේ ප්රධානියා, ශ්රී ලංකාවේ සිදුවූ මෙම ඝාතනය සහරාන්ගේ අන්තවාදී කල්ලිය විසින් සිදු කළ එකක් බවට සියයට සියයක් නිවැරදිව හඳුනාගෙන, ඒ බව චාල්ස් හරහා ශ්රී ලංකා බුද්ධි අංශ වෙත දැනුම් දී අවසන්ව තිබුණා.
⠀
එහිදී ඊශ්වරමූර්ති ප්රකාශ කර තිබූ දෙමළ වදනක අර්ථය වූයේ, මම ඔබට කල් තියා මේ පුද්ගලයා ගැන කිව්වා, ඒත් ඔයාලට ඒක කියලා වැඩක් වුණේ නැහැ යන්නයි. තමන් ලබා දුන් නිශ්චිත බුද්ධි තොරතුරු ශ්රී ලංකාවේ බලධාරීන් නොසලකා හැරීම ගැන ඉන්දීය බුද්ධි ප්රධානියා තුළ විශාල කලකිරීමක් තිබූ බව මින් පැහැදිලියි. ප්රදීප් වහාම ක්රියාත්මක වී, සහරාන් පිළිබඳව තමන් මීට පෙර ලබා දුන් වාර්තාවද රැගෙන සිය අණදෙන නිලධාරියා හමුවට ගොස්, වවුනතිව් පොලිස් නිලධාරීන් ඝාතනය කළේ සහරාන්ගේ කල්ලිය බවට දැනුවත් කරනවා. මේ ගැන තවදුරටත් හොයලා බලන්න යැයි අණදෙන නිලධාරියා පැවසුවත්, ඊට එහා ගිය කිසිදු වැදගත් පියවරක් හෝ මෙහෙයුමක් දියත් කිරීමට ඔවුන් කටයුතු කර තිබුණේ නැහැ.
⠀
මෙම සිද්ධියෙන් පසු පැවති යුධ හමුදා බුද්ධි අධ්යක්ෂ මණ්ඩලයේ මාසික සමාලෝචන රැස්වීමේදී වවුනතිව් ඝාතනය පිළිබඳව දීර්ඝව සාකච්ඡා වී තිබෙනවා. එහිදී ප්රදීප්ගේ අණදෙන නිලධාරියා විසින්, මෙම ඝාතන සිදු කර ඇත්තේ සහරාන්ගේ කණ්ඩායම බවට තොරතුරු ලැබී ඇති බව බුද්ධි අධ්යක්ෂවරයාට නිල වශයෙන් දැනුම් දී තිබෙනවා. එහෙත්, ඝාතනය සිදු කර තිබූ අමානුෂික ස්වභාවය හේතුවෙන්, බුද්ධි අධ්යක්ෂ මණ්ඩලය සැක කර ඇත්තේ මෙය යළි හිස ඔසවන එල්.ටී.ටී.ඊ සංවිධානයේ ක්රියාවක් විය හැකි බවයි. ඒ අනුව, සහරාන් පිළිබඳව සෙවීම පසෙක තබා, එල්.ටී.ටී.ඊ ය සම්බන්ධයෙන් විමර්ශනය කරන ලෙස ඔවුන් අණදෙන නිලධාරියාට උපදෙස් දී තිබෙනවා. මෙය පරීක්ෂණ සම්පූර්ණයෙන්ම වෙනත් අතකට හැරවූ, බරපතල ඓතිහාසික අතපසුවීමක් බව දැන් පැහැදිලියි.
⠀
ප්රදීප් මෙම තීරණය සිය තොරතුරුකරු වන චාල්ස්ට දැනුම් දුන් විට, හිටපු මුහුදු කොටි සාමාජිකයෙකු වූ චාල්ස් එය තරයේ ප්රතික්ෂේප කර තිබෙනවා. එල්.ටී.ටී.ඊ එකෙන් කවදාවත් ඔය විදිහට අමානුෂික විදිහට පොලිස් නිලධාරීන්ව මරන්නේ නැහැ, මේක අනිවාර්යයෙන්ම ඉස්ලාමීය අන්තවාදීන්ගේ වැඩක් යැයි ඔහු සහතික කර ප්රකාශ කර තිබෙනවා. මීට අමතරව මස්පි නමැති තවත් බුද්ධි තොරතුරුකරුවෙකුද, වවුනතිව් ඝාතනයෙන් පසු සහරාන්ගේ කණ්ඩායම සාදයක් පැවැත්වූ බවට යුධ හමුදා බුද්ධි අංශයට තොරතුරු ලබා දී තිබුණා. එහෙත් ඒ සියල්ල නොසලකා හැර, අජන්තන් නමැති හිටපු එල්.ටී.ටී.ඊ සාමාජිකයෙකුට ව්යාජ සාක්ෂි නිර්මාණය කර මෙම ඝාතනයේ චෝදනාව පැටවීමට ඇතැම් බුද්ධි නිලධාරීන් කටයුතු කළ බවට අද වන විට බරපතල චෝදනා එල්ල වී තිබෙනවා.
⠀
ඉන්පසුව උදාවන්නේ ශ්රී ලංකා ඉතිහාසයේ අඳුරුතම දිනයයි. 2019 අප්රේල් 21 වනදා උදෑසන, කොළඹ, මීගමුව සහ මඩකලපුව ප්රදේශවල ක්රිස්තියානි පල්ලි සහ සුපිරි හෝටල් ඉලක්ක කරගනිමින් මරාගෙන මැරෙන බෝම්බ ප්රහාර මාලාවක් ක්රියාත්මක වෙනවා. පළමු බෝම්බය පුපුරා ගොස් පැයක් ගතවීමටත් මත්තෙන්, චාල්ස් යළිත් වරක් ප්රදීප්ගේ දුරකථනයට අමතනවා. මම කෑගහලා කිව්ව දේවල් ඕගොල්ලෝ පිළිගත්තේ නැහැ, අන්න අර මම කිව්ව ටීම් එකෙන් තමයි අද බෝම්බ පුපුරවාගෙන තියෙන්නේ, සහරාන් ෂැංග්රිලා හෝටලේ බෝම්බයක් පුපුරවාගෙන මැරිලා ඉන්නවා යැයි ඔහු අතිශය නිවැරදිව, සිද්ධිය වූ මොහොතේම තොරතුරු ලබා දෙනවා. ප්රදීප් වහාම ක්රියාත්මක වී සිය අණදෙන නිලධාරියාව මේ සම්බන්ධයෙන් දැනුවත් කිරීමට කටයුතු කරනවා. තමන් ලැබූ තොරතුරු ගැන ප්රදීප් දැඩි කම්පනයකින් පසු වී තිබෙනවා.
⠀
ප්රහාරයෙන් දින කිහිපයකට පසු, 2019 අප්රේල් 26 වනදා සයින්දමරුදු ප්රදේශයේදී ත්රස්තවාදීන් පිරිසක් ආරක්ෂක අංශ සමඟ ගැටී බෝම්බ පුපුරවාගෙන මිය යනවා. මෙම පිපුරුම සිදුවන අතරතුරේදීම ඉන්දීය බුද්ධි ප්රධානී ඊශ්වරමූර්ති, චාල්ස්ගේ දුරකථනය හරහා ප්රදීප් සමඟ සෘජුවම සම්බන්ධ වෙනවා. ඕගොල්ලන්ට මම කලින්ම කිව්වට ඇහුවේ නැහැ, දැන් වෙන්න ඕන දේ වෙලා ඉවරයි, අන්න වවුනතිව්වලදී පොලිසියේ දෙන්නව මරලා උස්සපු පිස්තෝල දෙක අර සයින්දමරුදු වල බෝම්බ පුපුරපු තැන ඇති, ගිහිල්ලා ගන්න යැයි ඔහු උපහාසාත්මක ස්වරයකින් පවසනවා. ඉන්දියාවේ සිට ඊශ්වරමූර්ති ලබා දුන් සෑම තොරතුරක්ම සියයට සියයක්ම නිවැරදි වූ බවත්, එම තොරතුරු මත නිසි පියවර ගත්තා නම් මෙම විනාශය වළක්වා ගැනීමට තිබූ බවත් ප්රදීප් සාක්ෂි දෙමින් පවසනවා.
⠀
සයින්දමරුදු පිපුරුමෙන් ජීවිතය බේරා ගත් බව පැවසෙන, ත්රස්තවාදියෙකුගේ බිරිඳක වූ සාරා ජැස්මින් සම්බන්ධයෙන්ද ප්රදීප් තවදුරටත් විමර්ශනය කර තිබෙනවා. ඇය මන්නාරම එරුක්කලම්පිඩ්ඩි ප්රදේශයේ පදිංචි අලව්දීන් නමැති ව්යාපාරිකයෙකුගේ නිවසේ රහසිගතව සැඟවී සිට ඉන්දියාවට පලාගොස් ඇති බව ඔහුගේ තොරතුරුකරුවන් විසින් අනාවරණය කරගෙන තිබෙනවා. ඒ සඳහා යොදාගත් ස්කූටරය සහ විශේෂ බෝට්ටුව අලව්දීන්ගේ නිවස තුළ සඟවා තිබූ අයුරු දැක්වෙන ඡායාරූප පවා ප්රදීප් වෙත ලැබී තිබෙනවා. එම සියලු සාක්ෂි ගොනු කර ඔහු යුධ හමුදා බුද්ධි අධ්යක්ෂ මණ්ඩලයට තවත් සවිස්තරාත්මක වාර්තාවක් යොමු කර තිබෙනවා. සාරා ජැස්මින් අදටත් ජීවතුන් අතර සිටිනවාද? ඇය ඉන්දියාවට පලාගියේ කෙසේද? යන්න මෙම සාක්ෂිය හරහා දැවැන්ත ප්රශ්නාර්ථයක් ලෙස අප හමුවේ ඉතිරි කර තිබෙනවා.
⠀
මේ සියලු තොරතුරු, ලිපිගොනු සහ වාර්තා අදටත් සුරක්ෂිතව පවතින බව මෙම නිර්භීත බුද්ධි නිලධාරියා අධිකරණය හමුවේ දිවුරා ප්රකාශ කර තිබෙනවා. ඔහු මෙම සාක්ෂිය ලබා දෙන්නේ තම ජීවිතය පවා දැඩි අවදානමකට ලක් කරමින්. ඉන්දියාවේ කියු අංශයේ ප්රධානියා සහ චාල්ස් හරහා ලැබුණු මේ රන් හා සමාන බුද්ධි තොරතුරු වැළලී ගියේ කාගේ වුවමනාවටද? වවුනතිව් ඝාතනයේ සැබෑ සුලමුල වසන් කර, අහිංසකයින් පිට වරද පැටවූයේ ඇයි? මේවා හුදෙක් ප්රශ්න පමණක් නොව, අහිංසක ජීවිත තුන්සියයකට ආසන්න ප්රමාණයක් බිලිගත් ම්ලේච්ඡ කුමන්ත්රණයක නොවිසඳුණු අභිරහස් බව අප තේරුම් ගත යුතුයි. විමර්ශකයින් දැන් ඉන්දීය බුද්ධි ප්රධානියා වූ ඊශ්වරමූර්තිගෙන්ද ප්රකාශයක් ලබාගෙන ඇති බවට තොරතුරු වාර්තා වනවා.
⠀
මෙම බිහිසුණු හෙළිදරව්වෙන් අපට උගත හැකි ප්රධාන කරුණු කිහිපයක් තිබෙනවා:
• ඉන්දීය බුද්ධි අංශය පාස්කු ප්රහාරයට පෙර සහරාන් ගැන සියලු තොරතුරු ලබා දී තිබීම
• බෝම්බ සෑදීමේ අත්පොත් පවා කල් තියා අපගේ යුධ හමුදා බුද්ධි අංශය වෙත ලැබී තිබීම
• වවුනතිව් ඝාතනය සහරාන්ගේ වැඩක් බව දැන දැනත් විමර්ශන වෙනත් අතකට හැරවීම
• සාරා ජැස්මින් ඉන්දියාවට පලා යාම සඳහා ව්යාපාරිකයෙකුගේ සහාය ලබා ගැනීම
⠀
අප මේ අනාවරණය කරන්නේ කිසිවෙකු හෝ වරදකරුවන් කිරීමට හෝ නිවැරදිකරුවන් කිරීමට නොවෙයි. මේ රටේ ජනතාවගෙන් වසන් කර තිබූ, පද්ධතියක් ලෙස අප කොතරම් දුරට අසමත් වී ඇත්දැයි පෙන්වා දෙන තිත්ත ඇත්ත සමාජගත කිරීමටයි. චෝදනාවලට ලක්වන පාර්ශ්වයන්ට සිය නිර්දෝෂීභාවය ඔප්පු කිරීමට අධිකරණය හමුවේ පූර්ණ අයිතියක් පවතිනවා. අවසාන තීන්දුව ලබා දිය යුත්තේ ගරු අධිකරණය විසින් පමණයි.
උපුටා ගැනීම : News Alerts LK
