උපයාගත් ආකාරය හෙළි කළ නොහැකි රුපියල් මිලියන 59කට අධික මුදලක් බැංකු ගිණුමක තැන්පත් කිරීම සම්බන්ධයෙන් මුදල් විශුද්ධිකරණය වැළැක්වීමේ පනත යටතේ ගොනු කර තිබූ නඩුවකින් ඩේසි ෆොරස්ට් මහත්මිය නිදහස් කිරීමට කොළඹ මහාධිකරණය අද (03) නියෝග කළේය.
නඩු කටයුත්තකට සහභාගී වී කරුණු අවබෝධ කර ගැනීමට තරම් යහපත් මානසික සෞඛ්‍ය තත්ත්වයක ඇය පසු නොවන බවට කොළඹ අධිකරණ වෛද්‍ය නිලධාරීවරයා ප්‍රමුඛ විශේෂඥ වෛද්‍ය මණ්ඩලයක් විසින් ලබාදී තිබූ වෛද්‍ය නිර්දේශය සලකා බැලීමෙන් අනතුරුව මහාධිකරණ විනිසුරුවරයා විසින් මෙම නියෝගය නිකුත් කරනු ලැබීය.
මෙම නඩුව කැඳවූ අවස්ථාවේදී එහි විත්තිකරුවන් වන හිටපු නාවික හමුදා නිලධාරී යෝෂිත රාජපක්ෂ සහ ඩේසි ෆොරස්ට් යන දෙදෙනාම අධිකරණය හමුවේ පෙනී සිටියහ.
එහිදී නීතිපතිවරයා විසින් ඉදිරිපත් කරන ලද සංශෝධිත අධිචෝදනා පත්‍රය විවෘත අධිකරණයේදී කියවා දීමෙන් අනතුරුව, විත්තිකාර යෝෂිත රාජපක්ෂ මහතා තමන් එම චෝදනාවලට නිවැරදිකරු බව අධිකරණය හමුවේ ප්‍රකාශ කළේය.
ඉදිරිපත් වූ කරුණු සලකා බැලූ මහාධිකරණ විනිසුරුවරයා, නඩුවේ පූර්ව නඩු විභාග සම්මන්ත්‍රණය ලබන දෙසැම්බර් මස 02 වැනිදා පැවැත්වීමට නියෝග කළේය.
