11
රටවල් 16ක ක්‍රීඩක ක්‍රීඩිකාවන් 260 දෙනකු සහභාගි වූ HUNDRED ශ්‍රී ලංකා ජාත්‍යන්තර තරගමාලාවේ ශ්‍රී ලංකාවට හිමි වූ එකම පදක්කමට හිමිකම් කියමින් පිරිමි ඒකල අවසන් මහා තරගයේ රිදී පදක්කම දිනා ගැනීමට බුවනෙක ගුණතිලක සමත් විය.
කොළඹ සාන්ත ජෝසප් ගෘහස්ථ ක්‍රීඩා සංකීර්ණයේ පසුගියදා පැවති එම තරගාවලියේ පිරිමි ඒකල අවසන් මහා තරගයට එක්වූ බුවනෙක ලකුණු 21-18ක් සහ 21-13ක් ලෙස පරාජයට පත් කළ ඉන්දුනීසියාවේ ජෙලන්ඩ් ෆජාර් තරගාවලියේ ශූරයා බවට පත්විය.
ලෝක බැඩ්මින්ටන් සම්මේලනයේ සහ ආසියානු බැඩ්මින්ටන් සංගමයේ අනුමැතිය යටතේ ශ්‍රී ලංකා බැඩ්මින්ටන් ආයතනය විසින් මෙහෙයවනු ලැබූ ‘HUNDRED ශ්‍රී ලංකා’ ජාත්‍යන්තර තරගමාලාවේ කාන්තා ඒකල අවසන් මහා තරගයට තායිලන්තයේම ක්‍රීඩිකාවන් දෙදෙනකු එක්වීම කැපී පෙනිණි. එහිදී ලකුණු 13-21ක්, 21-14ක් සහ 21-14ක් ලෙස ලලින්රාට් චායිවන් පරාජය කළ තිඩප්‍රොන් ක්ලීබ්යිසූන් තරගාවලියේ ශූරිය බවට පත්වූවාය.
තරග ඉසව් 5කින් සමන්විතව පැවති තරගාවලියේ පිරිමි යුගල ශූරතාව දිනා ගැනීමට මැලේසියාවේ බ්‍රයන් ගුන්ටින් සහ මොහොමඩ් ෆස්රික් සමත්වූ අතර, කාන්තා යුගල ශූරතාව සහ මිශ්‍ර යුගල ශූරතාව ජපානයට හිමිවිය. හිනා ඔසාවා සහ කාරි සාටෝ කාන්තා මිශ්‍ර යුගල ශූරතාව දිනා ගත් අතර, යූටා වටනාබේ සහ මායා ටගූචි මිශ්‍ර යුගල ශුරතාවට හිමිකම් කීහ.
ෆවුස් මොහොමඩ්
