7
අයිසීසී චැම්පියන්ස් කුසලාන ක්‍රිකට් තරගාවලියේ ශූරතාව දිනා ගැනීමට ඉන්දියාව ඊයේ (9) සමත් විය.
මේ සමඟ වැඩිම වාර ගණනක් චැම්පියන්ස් කුසලානය දිනාගත් කණ්ඩායම බවට පත්වූ ඉන්දියාව හමුවේ ඊයේ ඩුබායිහිදී පැවති අවසන් තරගයේදී නවසීලන්තය කඩුලු 4කින් පරාජය විය.
ඉන්දියාව චැම්පියන්ස් කුසලානය දිනාගත් තෙවැනි අවස්ථාව මෙය වන අතර, මින් පෙර 2013දී සහ 2002දී (ශ්‍රී ලංකා සමඟ සම ශූරතාව) දිනා ගෙන තිබිණි. නවසීලන්තය අනුශූරයන් බවට පත්වූ දෙවැනි අවස්ථාව මෙය වන අතර, 2009දී ඔස්ට්‍රේලියාව හමුවේ ද ඔවුන් අනුශූරයන් වී තිබේ.
ඊයේ තරගයේ පළමුව පන්දුවට පහර දෙමින් නවසීලන්තය දුන් ලකුණු 252ක ඉලක්කය හඹාගිය ඉන්දියාව පන්දු 6ක් ඉතිරිව තිබියදී ජයග්‍රාහී ඉලක්කය පසු කළේ 6ක් දැවී තිබියදීය.
පන්දු 83කින් ලකුණු 76ක් රැස් කරමින් ඉන්දීය ඉනිමට සාර්ථක ආරම්භයක් දුන් නායක රෝහිත් ශර්මා පළමු කඩුල්ලට ශුබ්මන් ගිල් සමඟ එක්ව ලකුණු 105ක සබඳතාවක් ගොඩනැඟුවේය. ගිල් ලකුණු 31කට දැවී ගිය අතර, සුපිරි පිතිකරු විරාට් කෝලිට ඊයේ රැස් කළ හැකි වූයේ එක් ලකුණක් පමණි. ශ්‍රේයාස් අයියර් ලකුණු 48ක්, ලෝකේෂ් රාහුල් නොදැවී 34ක් රැස් කරමින් ඉන්දීය ජයග්‍රහණයට දායකවූහ. පන්දු යැවීමේදී මිචෙල් සැන්ට්නර් සහ මයිකල් බ්‍රේස්වෙල් කඩුලු 2 බැගින් දවා ගත්හ.
තරගයේ කාසියේ වාසිය දිනා පළමුව පන්දුවට පහරදීමට පිටියට පිවිසි නවසීලන්ත ඉනිමට සාර්ථක ආරම්භයක් දීමට විල් යංග්ට (15) සහ රචින් රවින්ද්‍රට (37) අවස්ථාවක් නොලැබුණු අතර, ලකුණු 69ක් වෙද්දී ඔවුහු දෙදෙනාම යළි ක්‍රීඩාගාරයේ අසුන් ගත්හ. එහෙත් අංක 4 පිතිකරු ලෙස පිටියට පිවිසි ඩැරිල් මිචෙල් මන්දගාමී අර්ධ ශතකයක් රැස් කරමින් මුළු ලකුණු සංඛ්‍යාව 211 දක්වා ඉදිරියට ගෙන ගියේය. ඔහු පන්දු 101කින් ලකුණු 63ක් ලබා සිටියදී 6 වැනි කඩුල්ල ලෙස දැවී ගිය අතර, ඉන් පෙර ග්ලේන් පිලිප්ස් (34) සමඟ ලකුණු 57ක් සහ මයිකල් බ්‍රේස්වෙල් සමඟ ලකුණු 46ක් එක් කිරීමට සමත් විය.
නොදැවුණු ඉනිමක් ක්‍රීඩා කළ බ්‍රේස්වෙල් පන්දු 40කින් ලකුණු 53ක් රැස් කළේ හතරේ පහර 3ක් සහ හයේ පහර 2ක් සමඟිනි.
පන්දු යැවීමේදි කුල්දීප් යාදව් සහ වරුන් චක්‍රවර්ති කඩුලු 2 බැඟින් දවාගත්හ.
නවසීලන්තය – 251/7 (ඕවර 50) ඩැරිල් මිචෙල් 63, මයිකල් බ්‍රේස්වෙල් නොදැවී 53, රචින් රවින්ද්‍ර 37, ග්ලේන් පිලිප්ස් 34 (කුල්දීප් යාදව් 40/2, වරුන් චක්‍රවර්ති 45/2)
ඉන්දියාව – 254/6 (ඕවර 49) රෝහිත් ශර්මා 76, ශ්‍රේයාස් අයියර් 48, ලෝකේෂ් රාහුල් නොදැවී 34, ශුබ්මන් ගිල් 31 (මයිකල් බ්‍රේස්වෙල් 28/2, මිචෙල් සැන්ට්නර් 46/2)
