9
ශ්‍රී ලංකා පාසල් ක්‍රිකට් සංගමය විසින් ශ්‍රී ලංකා ක්‍රිකට් අනුග්‍රහය ඇතිව සංවිධානය කළ අවුරුදු 19න් පහළ දෙවැනි කොටස ටියර් ‘ඒ’ අන්තර් පාසල් එක්දින ක්‍රිකට් තරගාවලියේ ශූරතාව දිනා ගැනීමට වෙන්නප්පුව සාන්ත ජෝසප් වාස් විදුහල සමත් විය.
පසුගියදා මග්ගොන සරේ ක්‍රිකට් ක්‍රීඩාංගණයේ පැවති අවසන් තරගයේදී සාන්ත ජෝසප් වාස් විදුහල හොරණ තක්ෂිලා මධ්‍ය මහා විද්‍යාලයට එරෙහිව ලකුණු 16ක ජයක් ලබමින් ශූරයන් බවට පත් විය.
කාසියේ වාසිය හිමි කරගත් ජෝසප් වාස් පිල පළමුව පන්දුවට පහර දෙමින් ඕවර 47.5කදී සියල්ලන් දැවී ලකුණු 153ක් රැස් කළ අතර, පිළිතුරු ලෙස තක්ෂිලා පිලට සියල්ලන් දැවී රැස් කළ හැකි වූයේ ලකුණු 137ක් පමණි.
වෙන්නප්පුව සාන්ත ජෝසප් වාස් පිල මීට පෙර දෙදින තරගාවලියේ ශූරයන් බවට පත්වෙමින් පළමු කොටස ටියර් ‘බී’ තරගාවලියට උසස්වීම් ලැබීය.
සාන්ත ජෝසප් වාස් – 153. සාවියෝ ප්‍රනාන්දු 31, ෂෙහාර ප්‍රනාන්දු 26, කාවින්ද රත්නායක 22, ආකර්ෂ වර්ණකුලසූරිය නොදැවී 20 (රශාන් දීමන්ත 31/3, යොමාෂ් යසිත් 35/3, තිළිණ කුමාර 22/2)
තක්ෂිලා – 137. කුවිඳු මධුභාෂ 72 (හිමාල් රවිහංස 32/4, මතිෂාන් ප්‍රනාන්දු 22/3)
