ඉඩම් කොටස් අලෙවි කිරීමට අදාල ගිවිසුමේ සහ ඉඩම පැවරීමේ ඔප්පුවේ ඩේසි ෆොරස්ට් නැමැත්තියකගේ නම සඳහන් වුවත් ඔප්පුව ලියන අවස්ථාවේදි හෝ ගිවිසුම් අත්සන් කරන අවස්ථාවේදි ඩේසි ෆොරස්ට් නැමැත්තිය නොසිටි බවත් තමාට වාහනයකින් විජේරාම හෝ එවැනි නම සඳහන් යම්කිසි රැගෙන ගොස් එකි ඔප්පුවට හා ගිවිසුමට අත්සන් ලබාගත් බවත් ඇය පවසා සිටියා.
එමෙන්ම පෙර සඥහන් කළ මුදල තමාට ලැබුනේ දෙවරකදි බවද පැමිණිල්ල මෙහෙය වන නියෝජ්ය සොලිසිටර් ජෙනරාල් ජනක බණ්ඩාර මහතාගේ මෙහෙය වීම යටතේ සාක්ෂි දෙමින් එම කාන්තාව ප්රකාශ කළා.
පැමිණිල්ලේ 53 වන සාක්ෂිකාරිය ලෙස කැඳවු කාන්තාව සාක්ෂි කූඩුවේ සිට දැඩි අයාසයකින් විනාඩි 20 ක පමණ කාලයක් සාක්ෂි දෙමින් සිටියදි වාඩිවි සිටි පුටුවට බරවි හිස තබා ගැනීම නිසා ඇය සාක්ෂි කූඩුවෙන් බස්සවා විත්ති කූඩුව අසල බංකුවක වාඩි කරවීමට සිදු විය.
තමන් දීර්ඝ කාලයක සිට රෝගාතුරව රෝහල්ගතව ප්රතිකාර ලබන තැනැත්තියක බවත් අධිකරණය හමුවේ පෙනි සිටියේ රෝහල්ගතව ප්රතිකාර ලබමින් සිටින විටදි බවත් එම සාක්ෂිකාරිය කොළඹ මහාධිකරණ විනිසුරු උදේශ් රණතුංග මහතා ඉදිරියේ දිව්රුම් පිට සාක්ෂි දෙමින් ප්රකාශ කළා.
යෝෂිත රාජපක්ෂට එරෙහිව උපයාගත් ආකාරය අනාවරණය කළ නොහැකි රුපියල් ලක්ෂ 700කට අධික මුදලක් යොදවා ඉඩමක් හා දේපල මිලදි ගැනීමට කුමන්ත්රණය කිරිම ඇතුළු චෝදනා යටතේ පවරා ඇති නඩුව අද (10) කොළඹ මහාධිකරණ විනිසුරු උදේශ් රණතුංග මහතා ඉදිරියේ කැඳවණු ලැබුවා.
එකි නඩු කටයුත්තට අදාල පෙරකී දෙහිවල ගාලු පාරේ මිහිඳු මාවතේ පිහිටි ඉඩම් කොටසක් විත්තිකාර යෝෂිත රාජපක්ෂ මහතාගේ අනු දැනුම මත ඔහුගේ මිත්තනියක වන ඩේසි ෆොරස්ට් මහත්මිය නමින් මිලදීගෙන තිබූ අතර එකී ඉඩම් කොටස පැවරීමට අදාළ ලේඛනවල සඳහන් අත්සන් එම සාක්ෂිකාරියගේදැයි සනාථ කර ගැනීම සඳහා ඇය සාක්ෂියට කැඳවා තිබුණා.
ඇයගේ අසනීප තත්ත්වය නිසා විත්තිකූඩුව අසල බංකුව වෙත පැමිණි විත්තිය වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් හරස් ප්රශ්න කිහිපයක් ඇසීමෙන් පසුව ඇයගේ සාක්ෂිය අවසන් කළා.
එම නඩුවේ පැමිණිල්ලේ 16 වන සාක්ෂිකරු ලෙස කැඳවා තිබූ පාලිත ගමගේ නමැත්තා එකී ඉඩම් ගනුදෙනුව සම්බන්ධයෙන් විමර්ශන නිලධාරීන්ට මින් පෙර ලබාදී තිබූ සාක්ෂිවලට පරස්පර ආකාරයෙන් සාක්ෂි ලබාදීම නිසා ඔහු පැමිණිල්ලට අගතිදායී සාක්ෂිකරුවකු ලෙස පැමිණිල්ල මෙහෙයවු නියෝජ්ය සොලිසිටර් ජෙනරාල් ජනක බණ්ඩාර මහතා විසින් නම් කොට ඔහුගේ සාක්ෂිය අවසන් කළා.
නඩු විභාගයෙන් අනතුරුව ඔහුට එරෙහිව සුදුසු නීතිමය පියවර ගන්නා බව පෙන්වා දෙමින් පැමිණිල්ල කළ කරුණු දැක්වීම සලකා බැලූ මහාධිකරණ විනිසුරුවරයා රුපියල් ලක්ෂ 20ක බැඳුම්කරයක මත එම සාක්ෂිකරු මුදා හැරීමට නියෝග කළා.
වැඩිදුර සාක්ෂි විභාගය ලබන 2වනදා දක්වා කල් තැබුවා.
මේ පුවත තව අයට බලන්න
