රක්ෂිත බන්ධනාගාරගත කර සිටින හිටපු ජනාධිපති ආර්යා ශිරන්ති රාජපක්ෂ මහත්මිය වෛද්‍ය ප්‍රතිකාර සඳහා කොළඹ නවලෝක රෝහලට ඇතුළත් කරන ලෙසට අධිකරණයෙන් මෙතෙක් කිසිදු නියෝගයක් ලැබී නොමැති බව බන්ධනාගාර නිලධාරීන් කියති.
බන්ධනාගාර මාධ්‍ය ප්‍රකාශක සේනක පල්ලෙතැන්න මහතා ප්‍රකාශ කරන්නේ, බන්ධනාගාර රෝහලේ වෛද්‍යවරුන් වෙත ඇයව ඉදිරිපත් කිරීමෙන් අනතුරුව, ඉදිරි දිනයකදී ජාතික අක්ෂි රෝහල වෙත ඇයව යොමු කරන ලෙසට පමණක් මේ වන විට නිර්දේශ ලැබී ඇති බවයි.
ඒ අනුව ඇයව හෙට දිනයේදී ජාතික අක්ෂි රෝහල වෙත ඉදිරිපත් කරන බවත් මාධ්‍ය ප්‍රකාශකරවයා සඳහන් කළේය.
ශිරන්ති රාජපක්ෂ මහත්මියට මීට පෙර ප්‍රතිකාර කළ වෛද්‍යවරයා හමුවට ඉදිරිපත් කිරීම පිණිස ඇයව නවලෝක රෝහල වෙත යොමු කරන ලෙස කොළඹ අතිරේක මහේස්ත්‍රාත්වරිය බන්ධනාගාරයට නියෝග කළ බවට මාධ්‍ය රැසක් වාර්තා කර තිබිණි.
එහෙත් එවැනි නියෝගයක් තමන් වෙත ලැබී නොමැති බව බන්ධනාගාර කියයි.
ශිරන්ති රාජපක්ෂ මහත්මියව එළඹෙන 13 වනදා දක්වා රක්ෂිත බන්ධනාගාරගත කිරීමට නියෝග කර සිටී.
මේ පුවත තව අයට බලන්න
